برجاء المشورة

**mohamedsamir03** · 19-08-2014 02:48 PM

انا عندى ثلاجة التكييف نيو اكسنت اللى موجودة تحت التابلوة باظت بعد ما كشفت على التكييف مرتين عند 2 صنايعية
واكد ان الثلاجة بايظة ولازم نفك التابلوة عشان نغيرها

والاهم انها غالية ومش موجودة ولفيت عليها كتييير وقلقان من فك التابلوة

وامبارح وانا فى التوفيقية بسال عليها صاحب محل قالى حاجة غريبة قاللى الغى الثلاجة دى خالص وكانها مش موجودة لانها هاتلغى الساخن بس لكن التكيف هايشتغل عادى
انا حسيت انة بيشتغلنى بس قعد يشرح واكدلى انه عملها فى عربية صديقة وتمام

فانا على حد علمى البسيط ان الثلاجة دى هى اللى بتبقى ساقعة والهواء بيعدى عليها يبرد ويدخل على العربية

وبالمناسبة بشعر ان فية هواء ساخن دائما داخل الصالون

انا مش فاهم حاجة

ومش عارف دة صح ولا غلط

ارجو الافادة

**mohamedsamir03** · 19-08-2014 04:32 PM

سؤال تانى اللى فاهمة من مواضيع قراتها ان داخل الثلاجة الداخلية مياة ولا اية
طيب اية علاقة الفريون بالموضوع
لان بتاع التكييف لما كان بيضغط هواء فى الدائرة عشان يختبر اى تسريب

التسريب ظهر من الثلاجة معنى كدة ان اللى بيمر فى المواسير غاز مشى مياة طيب المياة زى ما فهمى وصلنى من اللى قرأتة دى تبقى فين

معلش لو سؤللى عبيط بس انا حابب افهم

وبشكركم

**amoor89** · 19-08-2014 05:27 PM

بص هنمشى واحدة واحدة
اولا التكييف السخن والبارد هما دورتين منفصلين تماما عن بعض يعنى مفيش حاجة اسمها تلاجة للسخن والبارد
التكييف البارد اللى بيعتمد على الفريون بيبقى ليه سربنتينة صغيرة داخل التابلوه متوصلة بالكومبروسر والسربنتينة الكبيرة اللى قدام الراديتير والدراير أو فلتر الفريون ودى بتبقى دورة مغلقة على نفسها تحت ضغط عالى اللى هو ضغط الفريون ودى اللى بتدينا الهوا البارد الخارج من فتحات التكييف
اما التكييف السخن فدى دورة تانية منفصلة تماما عن البارد ودى بتتكون من سربنتينة صغيره داخل التابلوه برده ومتوصلة بالراديتير والخراطيم بتاعته اللى هى دورة تبريد الموتور ودى بيكون جواها مية طبعا وبتبقى سخنة فبتدخل على السربنتينة اللى جوة التابلوه ولما تعمل التكييف على السخن الهوا بيعدى عليها ويكتسب السخونة من حرارتها ده الموضوع باختصار
الخلاصة الاتنين اللى حضرتك روحتلهم سيبك منهم لانهم نصابين اسأل عن حد يكون موثوق ومجرب من المنتدى ويكون قريب منك والتلاجة هتلاقيها عند بتوع الاستيراد ولو مش عايز استيراد فى توكيل ساندن فى القاهرة ببقى عنده التلاجة جديدة لاى عربية وارخص من التوكيل
تحياتى

**mohamedsamir03** · 19-08-2014 05:45 PM

بشكر حضرتك جدا على ردك السريع
وعلى نعاونك
كدة تمام يعنى فية 2 سربنتينة داخل التابلوة

هما ال 2 صنايعية قالو ان الثلاجة اتخرمت لانها نفست من جوة وطلعت ريحة وحشة من جوة التابلوة
ودة بعد ما كبسوا الدائرة هوا الاول

لكن بياع المحل اللى قال الغي الثلاجة

المشكلة فى فك التابلوة لانة مش هارجع زى الاول بالتاكيد
لان عشان تتغير لازم نفك التابلوة