الموضوع: عاوز اروح من حلوان الي طالبية فيصل

ممكن تاخد الاوتوستراد حتى المعادى و من هناك تطلع الدائرى و فى الحاله دى قدامك حلين :

1- تنزل نزله المريوطيه و تمشى ش فيصل على طول فى اتجاه الجيزه لغايه الطالبيه (الشارع و المنطقة مشهورين جداً و على ناصيه الشارع فيه شركه المطاحن انت هاتلف اليوتيرن من قدامها)

(السكه دى مضمونه 100% و خط مستقيم بس مشكلتها لو ش فيصل فيه زحمه)

2- تكمل الدائرى و ماتنزلش المريوطيه و تاخد الكوبرى بتاع الوصله الجديده (الكوبرى مطلعه مكتوب عليه اكتوبر - مصر اسكندريه الصحراوى و بيعدى فوق المريوطيه) و تنزل نزله صفط اللبن و تدخل الطالبيه من ورا من ناحيه كفرطهرمس

(السكه دى اقل فى الزحمه شويه عن ش فيصل بس مش مضمونه لان الشارع بتاع صفط اللبن كان متكسر من فتره نتيجه حفر توصيل الغاز الطبيعى مش عارف دلوقتى اتصلح و اللا ايه)

و ممكن تاخد الكورنيش من حلوان فى اتجاه التحرير لغايه القصر العينى او كوبرى عباس (ايهما اقل ازدحاماً) و منه الى ميدان الجيزه ثم ش فيصل من اوله عبر كوبرى فيصل

(الطريق ده فيه : زحمه الكورنيش + زحمه الجيزه + زحمه ش فيصل و يستحسن تبعد عنو بس لو رايح بدرى او راجع بالليل متأخر هايكون طريق ممتاز)

لو هاتروح مواصلات اسهل سكه : اركب المترو و انزل محطه فيصل و من هناك اركب ميكروباصات بتاعت المساكن و انزل الاخر عند مطعم الشبراوى (المساكن دى تعتبر فى منتصف ش الطالبيه)

(لو رايح لوحدك تقضى مصلحه او واجب مجامله و مش معاك حد او عيله و كده روح مترو اسهل)