بولو 97 بتسخن مع التكييف

**emad_elsarrag** · 27-08-2014 01:43 PM

مساء الفل علي أحلي و أجدع ناس و ديه أول مشاركة معاكوا ....
لو سمحت معايا عربية بولو 1997 أوتو ماتيك لسه جايبة في عندي مشكلة أنا أشترتها التكيف مش شغال و شحنته و لقيت شغال والكباس شغال المشكلة اني بعد ما مشيت من عند المكانيكي و شغلت التكييف لقيت العربية سخنت !!!!!!!! ؟؟
مع العلم التكيف ما كنش بسقع أوي ....
يا ريت حد يقولي المشكلة ممكن تكون أيه و عايز أروح لكهربائي و مكانيكي كويس .....
وشكرا مقدما للي حيساعدنا......

**shoshasam** · 27-08-2014 03:04 PM

مادام العربية بدأت تسخن بعد تصليح التكييف وتشغيله
يبقي كده مروحة السربنتينه بتاعة التكييف مش شغاله أو ضعيفه
لان عندي في التويوتا بمجرد ما التكييف يشتغل مروحة السربنتينه + مروحة الرادياتير مش بيفصلوا
والموتور درجة حرارته بتقل وبيبقي السحب ممتاز ومش بحس بتقل التكييف علي الموتور أبدا

وكذلك أعمل صيانة لدورة التبريد مش هاتكلفك 100ج وحط مياة خضرا من نوع نضيف
وأغسل الدورة كلها في مركز خدمة لانهم عندهم جهاز كبير شبية بالخلاط بيحط في علبة زيت باكم
عشان يفور كل الصدأ والبلاوي اللي جوا هاتفرق معاك كتير قوي

**Ahmed Saad** · 27-08-2014 03:50 PM

كده يبقى مروحه التكييف فيها مشكله روح لكهربائي فولكس يشوفلك المروحة بتشتغل ولا لا ولو شغاله شغاله بسرعتها ولا ضعيفه وممكن مبدئيا تشغل التكييف والعربيه سخنه طبيعي وفتح الكبوت وشوف اول مالتكييف يشتغل المروحة بتاعت التكييف والريداتير هيشتغلوا مع بعض ولا لا وان شاء الله بسيطه وأبقى طمنا عملت ايه

**emad_elsarrag** · 10-09-2014 06:28 PM

[الناس الجدعة اللي ردت كتر خيركوا كلكوا و شكرا علي المساعدة و جزاكم الله خيرا ....
هو فعلا طلع العيب إن المروحة مش بتشتغل علي السرعة السريعة لما بشغل التكيف و طلع حاجة إسمها المقاومة بايظة و هي قطعة جنب البطارية هي اللي بايظة غيرتها المروحة بقيت تتشتغل أسرع مع التكييف
. والحمد لله التكيف بتعها تلاجة و 100%...
والله أنا كان معايا جولف 5 قبل ما أشتري البولو تكيفها ما كان في حلاوة و برودة تكييف البولو و الحمد لله و كتر خيركم علي المساعدة .
و علي فكرة المقاومة ديه ثمنها 150 جنيه....

بس بإمانة العربية البولو ديه عربية إختراع و تحفة ......
وسؤال صغير هو لما التكيف بيشتغل صوت المروحة بيبقي عالي جدا ؟؟؟ هو الصوت عالي أوي و مافيش حاجة بتحك في المروحة علي فكرة .... عندي بس بس شغالة و ما فيش أي مشاكل ؟؟
وسؤال تاني للناس الجامدين أوي هو انا لو معاية بولو 1400 cc أوتوماتيك أوريجنال المفروض تعمل كام كليومتر في العشرين لتر ..... أنا بتعمل معايا حوالي 200كم ......
هو ده معدل كويس و العادي و لا كتير بس انا كانت معايا الجولف 5 موديل 2005 1600 cc كانت بتعمل معايا نفس معدل الإستهلاك تقريبا ؟؟؟
وشكرا......

**wawamoha** · 15-09-2014 02:59 AM

معلش هو انت جبت البولو اوتو منين ؟؟ و في منها موديل كام ؟؟ لاني كل ما بدور الاقي التسعينات مانيوال و الاوتو في 2011 و 12 ...الخ

و سؤال اخير معلش عامله كام الله يكرمك ؟؟