الموضوع: هل ممكن أداء السيارة يتأثر باختلاف قطر الكاوتش؟؟؟ ... اتعرف على أساسيات عزم الدوران

معظمنا عدت علينا تجربة شراء كاوتش جديد للعربية

وكتير مننا فكر إنه يغير مقاس الكاوتش لأسباب مختلفة... منها مثلا إنه عايز ثبات أحسن أو عايز يعلّي العربية علشان المطبات مثلا.

حد فكر إنه لما يغير قطر الكاوتش إنه بالطريقة دي بيأثر على أداء العربية؟؟؟


إزاي يعني؟؟

تغيير قطر الكاوتش له تأثير على السرعة والسحب وبالتالي استهلاك البنزين بيتأثر .



طيب قوللي مثل.. لو حبيت أجيب كاوتش أعلى... إيه اللي يحصل؟؟

زيادة قطر الكاوتش بتعمل حاجتين:

1- يزود السرعة القصوى ... وبالتالي فـفي حالة المشي على سرعات ثابتة (زي الطرق السريعة مثلا).. فالمفترض إن استهلاك البنزين يقل، لإن العجل بيلف عدد لفات أقل عشان يوصل نفس المسافة نتيجة إن القطر بقى أكبر


2- يقلل التسارع (السحب) ... وبالتالي فـفي حالة التسارع أو وجود مقاومة عالية (زي صعود مناطق عالية مثلا).. فاللي بيحصل إن استهلاك البنزين هيزيد... لإن العزم اللي واصل للعجل بقى أقل من الأول نتيجة تكبير القطر، وبالتالي عشان ناخد نفس التسارع القديم لازم ندوس بنزين أكتر عشان نزود العزم

الفرق في التسارع احتمال ما يكونش محسوس إذا كان الفرق في القطر صغير، بس بيبان كل ما الفرق كبر.



بس كلمة عزم اتقالت كذا مرة في الكلام اللي فوق ده... هو يعني إيه عزم؟؟؟


باختصار ... العزم ده تقدر تعتبره القوة الدورانية... وبتتحسب عن طريق ضرب القوة المحركة × المسافة إلى مركز الدوران


[IMG3]http://craig.backfire.ca/img/pound-feet-wrench.png[/IMG3]

بمعنى إننا كل ما بعدنا عن مركز الدوران هنحتاج قوة أقل علشان نحرك الجزء اللي بيلف ده.


وده مثلا هو السبب في إن مقبض أي باب في الدنيا لازم تبقى في أبعد نقطة عن المفصلات... ولو حصل إن فيه باب المقبض بتاعه في المنتصف بنبقى محتاجين نبذل قوة أكبر علشان نحركه بنفس السرعة مقارنة بالباب العادي..


دي هي نفس الفكرة اللي بيتولد بيها العزم داخل المحرك اللي بيشتغل بالبنزين أو السولار..




كده عمود الكرنك بقى فيه عزم...


طيب ازاي الموتور بيحرك العربية؟؟؟


فعليا... العربية علشان تتحرك عايزة منظومة كاملة إسمها منظومة نقل الحركة (Powertrain System) وهي مكونة من التالي:

1- موتور (أيا كان نوعه) ... هو اللي بيدور بقوة كافية (عزم) وبيطلع الحركة الأساسية اللي بتمشي العربية.
2- دبرياج (أو محول عزم) ... لفصل حركة الموتور عن السيارة عند الحاجة
3- فتيس ... علشان يساعد الموتور إنه يحرك العربية بسهولة
4- كورونا ... علشان ينقل الحركة من الفتيس إلى العجلات المحركة
5- وصلات ... علشان توصل الحركة للأماكن البعيدة .. وبتكون بين الكورونا والعجلات.. وأحيانا كمان بين الكورونا والفتيس أو بين الفتيس والموتور.
6- عجلات ... هي اللي بتطلع الحركة النهائية للسيارة


[IMG3]http://auto.edu.vn/attachments/layout-ht-truyen-dong-jpg.68/[/IMG3]





نيجي بقى لكيفية نقل الحركة والعزم للعجلات...

الموتور لما بيشتغل .. العزم اللي طالع منه هيتنقل بعد كده لاسطوانة الدبرياج (أو محول العزم) ومن ثم إلى العمود الرئيسي داخل صندوق التروس



التروس اللي راكبة على العمود الرئيسي هتحول العزم إلى قوة خطية

[IMG3]http://craig.backfire.ca/img/torque-force.png[/IMG3]

وبالتالي مقدار القوة الخطية دي يختلف باختلاف المسافة (نصف قطر الترس)


كل ترس من دي إسمه الترس القائد (Driver) .. لإنه بيقود الحركة، والتروس اللي هتستلم الحركة إسمها (المنقاد Driven)



يبقى نفس القوة الخطية الناتجة من الترس القائد هتتنقل إلى الترس المنقاد (زي ما هي) ، ولكن العزم عليه قد يتغير باختلاف نصف قطره (لو كان أصغر العزم هيصغر... ولو كان أكبر العزم هيكبر)

[IMG3]http://craig.backfire.ca/img/gearbox-example.png[/IMG3]

في علب التروس... أبطأ نسبة تعشيق هي اللي فيها أصغر ترس قائد مع أكبر ترس منقاد... والعكس صحيح



طيب ليه بناخد أكبر عزم من النسبة البطيئة؟

بافتراض إننا ثبتنا سرعة الدوران... يبقى العزم الخارج من الموتور له قيمة محددة
والترس القائد في علبة التروس هيتنقله العزم ده بالكامل... ولإن نصف قطره صغير جدا... فالقوة الخطية الخارجة منه هتبقى كبيرة جدا




في المقابل... القوة الكبيرة جدا دي هتتنقل للترس الكبير (المنقاد) ... ولإنه قطره كبير، فالعزم الناتج منه هيكبر أكتر لإن القوة اضربت في مسافة أكبر


وبالتالي ... العزم الناتج هيقل كل ما عشقنا نسب أسرع (تروس منقادة أصغر)



طيب... إيه اللي بيحصل للعجل لما نكبر قطره؟؟؟

العجل هنا نقدر نعتبره زي الترس القائد

وهنفترض إن العزم اللي جايله ثابت... يبقى القوة الخطية اللي هتتطلع منه هتصغر كل ما كبرنا قطره

القوة الخطية هنا هي اللي بتتنقل للشارع عشان تحرك العربية

[IMG3]http://craig.backfire.ca/img/wheel-torque-accel.png[/IMG3]


يبقى القوة الفعلية اللي بتحرك العربية بقت أقل، وبالتالي التسارع هيقل



علشان كده... لازم نراعي جدا إننا نحافظ على القطر الخارجي للكاوتش ثابت مهما غيرنا مقاسات الكاوتش .. لإن مقاس الكاوتش (بمعنى أصح قطر الكاوتش) له ارتباط مباشر بحسابات صانع السيارة لما صممها بموتور له قوة وعزم معين وكمان حطله فتيس بيطلع الطاقة اللي في الموتور بأنسب طريقة لطبيعة استخدام العربية.




يا رب أكون قدرت أبسط المعلومات بالشكل الكافي ... وما حدش يتلخبط :)


لو عايز معلومات مفصلة... تقدر تدخل على الرابط ده:
Horsepower and Torque - Craig's Website at Backfire.ca



...

المشاركة الأصلية كتبت بواسطة waleed_aboammar

في حاجة مهمة: بالنسبة لتعريض الكاوتش برضه ليه نفس التأثير لأنه برضو بيزود العزم (الحمل) على العربية في المقابل بيعزز ثبات العربية و فايدته الأكبر في رفع كفاءة الفرامل بتقليل مشوار التباطؤ نتيجة زيادة سطح الاحتكاك بين الكاوتش و الأرض.

التأثير السلبي لزيادة عرض الكاوتش مش جاي نتيجة زيادة مساحة التلامس والاحتكاك..

بالعكس.. زيادة مساحة التلامس معناها قدرة أكبر على نقل قوة الحركة ومنع انزلاق العجل نتيجة زيادة القوة الدافعة..


المشكلة الأساسية لزيادة عرض الكاوتش هي زيادة مقاومة الهوا على السيارة لإن السطح المواجه للهوا بقى أكبر.. وبالتالي الهوا مبقاش بيعدي بسهولة زي الأول..

وده في الآخر بتحسه في العربية في شكل ضعف السحب وزيادة استهلاك البنزين على السرعات العالية فقط.


...