عندي مشكلة رجرجة مع الطلعة النترا 2009

**dr_abooody** · 31-08-2014 01:29 AM

السلام عليكم
الاول العربية ماشية 85 الف كيلو و البلية باظت عند 70 الف كيلو بالظبط
من خمس شهور فجأة كنت بسمع صوت غريب لما ادوس دبرياج صوت خشن بس العربية كان سحبها كويس و كلة تمام

المهم روحت مركز خدمة معتمد مصر القديمة
قالي يا باشا دة بلية الدبرياج و طالما هتفك يبقى غير الطقم كلة و معاه الزيت مع انة كان لسة في القديم 20 الف بس يلا

المهم غيرتة و دفعت 1600 ج

خدت العربية الصوت راح و كلة تمام

المهم بعد كدة بعمل صيانة ال 80 فلاتر و بوجيهات و كدة بسيطة غيرتهم بره التوكيل عشان ارخص فكانت الرجة بدات تظهر و جرب العربية قالي دة مش طبيعية و ارجعلهم لان دة ممكن يكون الفلام

المهم انا المشكلة دة بتضايقني لما اكون مركب معايا ناس و اجي اطلع بالاعربية بالاول او ارجع مارشدير يحصل رجرجة جامدة و لازم ازود بنزين بحس اكن العربية هتفك من بعضها

روحتلهم التوكيل تاني قالي ياباشا دة مافيهاش حاجة قولتلة مش بتظهر دلوقتي عشان مفيش زحمة و انا مش محمل ناس فهتظهر ضعيف

المهم فك و كدة و قالي الديس شافط هنغيرة قولتلة شافط دة انا مشيت علية 15 الف بس راح مغيرة و دفت 500 ج تمنة و العربية بقت تمام المهمخ سافرت اسكندرية و انا راجع محمل بدأت تظهر الرجة تاني

فاتصلت بيهم قالي دة الفلام كدة احتمال يكون في ريجة و عايز يتخرط

قالي تعالى و نعملة انا بصراحة كبرت دماغي و مش عايز اروحلهم تاني

كلمت كذا واحد ميكانيكي برة و كل واحد قدم اقتراح
واحد قال الاسطوانة و حشة و خامتها وحشة و هنغيرها و كلة تمام
التاني قال الفلام يتخرط

التالت قال الطقم الدبرياج ركب غلط و طبع غلط و هاتلي طقم جديد اركبهولك طبعا مش هدفع 1000 ج تاني دة غير المصنعية

انا دلوقتي مش عارف اعمل ايه هل الفلام هو السبب و هل لو خرطة و هو مش محتاج ممكن يبوظ يا ريت حد يقولي اعمل ايه عشان انا خلاص جبت اخري

**hany63** · 31-08-2014 09:42 AM

نفس اللي حصل معايا بالظبط في عربيه كورولا ٢٠٠٢ لدرجة اني غيرت الطقم مرتين في شهر و كل مره طقم اصلي بالف جنيه لدرجة اني اتقفلت من العربيه و بيعتها لما كل واحد اوديهاله يقول لي ده الطبيعي و من ساعتها بركب اوتوماتك
غلطتي اني وديتها بره التوكيل عند ناس اي كلام
بص ياباشا وديها لمركز مهندس هاني ميخائيل كل القسم بيقول فيه شعر و بيعمل له مواضيع شكر مخصوص
وقول له انك عايز ترجع الدبرياج زيرو و اشرح له موضوع الفلام و اللي يطلب يغيره يتغير بدون نقاش و ربنا يعوض عليك في اللي اتصرف

**john55** · 31-08-2014 01:21 PM

معلش هو الفلام مقصود بيه ايه في العربيه

**msobhy** · 31-08-2014 02:29 PM

ملحوظه رفيعه
العربيه عندى النترا 2010 مانيوال
العربيه عندى كانت بتترج جامد جدااااااااااااا فى الطلعه - زى ما يكون حاجه بتخبط جوه الموتور
خصوصا لو الجو حر - أو مشغل التكييف - أو مركب معايا ناس
وفعلا كنت كل ما أسأل واحد أو يجرب عربيتى يقول لى انها مشكلة اسطوانه وديسك
لغاية لما ربنا كرمنى وحساس الكرنك باظ خااااااااااالص - أو لما غيرته ربنا كرمنى والعربيه رجعت زيرو تانى والحمد لله

**Mecha** · 31-08-2014 04:58 PM

the problem started after 80,000 Km service
they may have fitted wrong spark plug or filters , specially plugs with wrong gap
or they damaged something like broken vacuum hose or sensor plug
revise their work

**dr_abooody** · 31-08-2014 11:52 PM

انا غيرت الطقم الدبرياج و الرجة كانت موجودة و جت صيانة ال80 الف فلاتر و بوجيهات و غيرتها برة التوكيل و المشكلة مازالت موجودة ز و هي وجودة قبل ما اغير البوجيها و بعد ما غيرتها موجودة زي ما هي بس السحب اتحسن زي اي صيانة