تاثير الاسبراتير على العربيه فى حاله التقديم والتاخير ؟

**amostafa85** · 03-09-2014 10:37 AM

السلام عليكم ورحمه الله وبركاته على اعضاء نيل موتور
نوع العربيه اكسنت 1300 كربراتير

كان عندى اسفسار كده بخصوص كهربه العربيه "الاسبراتير" وعلاقته بالبوجيهات و البنزين و الهوا
تاثير الاسبراتير على العربيه وخصوصا البوجيهات والبنزين ولون العادم" لو الاسبراتير مقدم" "الكهربه مقدمه" ؟
تاثير الاسبراتير على العربيه وخصوصا البوجيهات والبنزين ولون العادم "لو الاسبراتير متاخرة" "الكهربه واطية" ؟

وزاى اقدر اميز ان كهربه العربيه مقدمه او مناخرة ؟

ومين افضل واحد يعرف يظبط المنظومه دى كلها كهربا و هوا وبنزين ؟

**ashourashour** · 03-09-2014 11:58 AM

المشاركة الأصلية كتبت بواسطة amostafa85

السلام عليكم ورحمه الله وبركاته على اعضاء نيل موتور
نوع العربيه اكسنت 1300 كربراتير

كان عندى اسفسار كده بخصوص كهربه العربيه "الاسبراتير" وعلاقته بالبوجيهات و البنزين و الهوا
تاثير الاسبراتير على العربيه وخصوصا البوجيهات والبنزين ولون العادم" لو الاسبراتير مقدم" "الكهربه مقدمه" ؟
تاثير الاسبراتير على العربيه وخصوصا البوجيهات والبنزين ولون العادم "لو الاسبراتير متاخرة" "الكهربه واطية" ؟

وزاى اقدر اميز ان كهربه العربيه مقدمه او مناخرة ؟

ومين افضل واحد يعرف يظبط المنظومه دى كلها كهربا و هوا وبنزين ؟

سواد البوجيهات 90% كاربراتير و 10% تاخير كهرباء .

تقديم الكهربه الزياده ... زياده حراره الموتور .. ضعف شديد في عزم المحرك ... ضعف سحب ... تسقيف شديد ... ارتجاف و رجرجه مع التعجيل
تاخير الكهرباء الزياده ... زياده حراره الموتور ... ضعف شديد فالقدره الحصانيه ... ضعف سحب .

التقديم بيقلل العزم ويزود الحصان ... العربيه بتجري مع سناده البنزين و بالمسايسه لكن لو ضغط مره واحده متسحبش و تسقف
التاخير بيزود العزم و يقلل الحصان ... العربيه تحس بتشب مع الدوسه بس مبتسحبش كويس

التقديم بنسبه بسيطه بيوفر فالبنزين و بيناسب السواق الرايق اللي ملوش فالحرق عالغيارات
التاخير بنسبه بسيطه بيستهلك بنزين اكتر شويه مناسب للسبورت درايف اكتر واللي بيحب يشد ويحرق

السواد ده كربراتير .. ظبط الكربراتير الاول

شوف البكات والاكس والباب

**amostafa85** · 03-09-2014 12:42 PM

@احمد عاشور شكرا على ردك السريع .
بس ازاى اعرف ان البوبه فيها مشكله والاكس انا رفعت صورة الكربراتير والعربيه بارده البوبه بتكون مقفوله ولما تسخن بتفتح شويه بشويه .
كل ماروح لحد بتاع كربراتير عاوز يعمل اكس وباب وخلاص من غير اى مقدمات .
والعربيه كانت كويس وزى الفل لحد ما الميكانيكى لعب فى مسمار الهوا والكهربا

**ashourashour** · 03-09-2014 12:56 PM

اللي باين فوق ده الشفاط او التشوك ولازم يتفتح عالاخر لما العربيه تبدا تسخن

لو فضل مقفول ولو جزئيا العربيه لازم تسود البوجيهات و دخنه سوده و بهدله

الاكس والباب ميبنش غير لما تفك الكربراتير

روح لحد يظبطلك هواء و جرب

**amostafa85** · 03-09-2014 01:10 PM

@احمد
ممكن تصحح المعلموه لو انا فاهم غلط
الشفاط ده اللى هو السخان صح اللى بيقلل الهوا و يزود نسبه البنزين ويعلى الاسبراتير عند الدوران فى الصباح والعربيه بارده
وبعد لما تسخن الشفاط ده بيفتح وبلتالى فيه علاقه عكسيه ان نسبه الهوا تزيد ونسبه البنزين تقل والاسبراتير يوطا .
انا فاهم كده صح ولا غلط

وايه هو افضل وضع لظبط الهوا والعربيه بارده ولا سخنه ومين اللى يظبط ميكانيكى ولا كربراتير ؟

**amostafa85** · 04-09-2014 11:00 AM

تسلم يا احمد باشا الموضوع فعلا فى الشفاط ماكنش بيفتح ساعه التسخين الراجل بتاع الكربراتير روحتلو قالى بيت العربيه ونشوفها الصبح فتح الغطا ودور العربيه الشفاط ماكنش بيفتح عرض عاليا ان يسيبه مفتوح على طول بس انا معرفش ايه الاضرار من انا الشفاط يبقى مفتوح على طول و قولتول خلينا زى مالخواجه شغال
بص لقى سوسته معلقه ظبها بلمفك كده والحمد الله الدخنه بطلت وجربيت النهارده الصبح بردو الحمد الله مافيش دخنه خالص تسلم ياباشا
بس اخر سؤال : لو كان ساب الشفاط مفتوح على طول كان هيحصل ايه ؟ افصد بلشفاط البوابه اللى كنت رافع صورتها ؟
تانى حاجه عندى شك فى استهلاك البنزين ولما بدى العربيه اول او تانى واشيل رجلى من على البنزين والعربيه واخده غيار بتمشى على الهادى لوحدها ده سببه ايه ؟