فلوانس عربية سفر من الدرجة الأولى...انطباعات بعد 10 ألاف كم

**Hany Saad** · 03-09-2014 09:28 PM

اعزائى الوحوش....الحمد لله اتميت اول 10 ألاف كم مع الفلوانس بسلام و للأمانة التامة أنا مستمتع جداً بهذه السيارة
لاحظوا أن الشهر اللى فات كنت مسافر أمريكا و كندا و أجرت عربية دودج شارجر 2013 موتور 3.5L قوة 300 حصان و قعدت معايا شهر و عملت بيها 5000 كم و قولت أكيد بعد لما ارجع و اسوق الفلوانس هبقى مش طايقها....الحمدلله الفلوانس ليها جاذبية خاصة و محستش خالص انى نازل لعربية صغيرة....طبعاً فيه فرق فى الموتور و لكن الحمدلله على الفلوانس

أسيبكم مع صورة بتوضح بعض الأحصاءات:

زى ما حضراتكم شايفيين دى صورة تابلوه العربية امبارح و انا عند ماستر الطريق الصحراوى و انا مسافر صباحاً للقاهرة
تم التفويل على الأتوماتيك عند بنزينة وطنية اللى على الصحرواى كيلو 30 من الأسكندرية
تكييف شغال على AUTO درجة حرارة 21
نلاحظ الأتى:
- بعد 60كم و هى المسافة من وطنية لماستر و سرعة 100كم/ساعة و كنت مشغل مثبت سرعة
- أظهر عداد المسافة المتبقية ان كمية البنزين الموجودة فى التانك و على نفس هذه الظروف من سرعة 100كم/ساعة يمكننى قطع 1100 كم كما هو مبين فى الصورة....للحقيقة هو كمان وصل ل 1130 كم و لكنى لم استطع التقاط صورة اخرى لعدم الانشغال عن الطريق
- معدل استهلاك السيارة تحت هذه الظروف ( مثبت سرعة على ١٠٠ و طريق اسكندرية القاهرة الصحرواى و درجة حرارة خارجية 34 و تكييف شغال على درجة 21 و مفيش هوا جامد عكس السيارة) هو حوالى 19 كم لكل لتر......19KM/L
- عند سرعة 100كم/ساعة....عدد لفات الموتور هو 1600 لفة فى الدقيقة فقط و لا تسمع صوته
- تكييف ممتاز
- فتيس ممتاز و لا يوجد به اى نتش او اصوات او احساس بالنقل
- الحمد لله عربيتى مفهاش شكوى من اصوات او تزييق او خلافه علماً بأنى موسوس جداً جداً
- لم تظهر معى اى مشاكل نقص زيت او رجة او خلافه لله الحمد
- عفشة انعم ما رأيت و هو معروف عن الفرنسي
- ثبات مرضى جداً
- ارتفاع ممتاز عن الأرض.....الحمد لله محكتش فى اى مطب فى خلال 10 ألاف كم
- رضاء تام عن التوكيل
- فرامل ممتازة جداً و بدون اى اصوات حك او صرخات

* للأمانة فى المطبات الجامدة على سرعة بتحس بالمطب فى الدنجل الخلفى و ده طبيعى بسبب نوع التعليق و طبعاً لو اتغير التعليق الخلفى لمالتى لينك تبقى العربية دى ملهاش حل
- صوت الموتور بيكون عالى بعد 3500 لفة

فعلاً الفلوانس عربية سفر بإمتياز و مناسبة جداً لمصر و شوارعها
تحياتى

**Dr . Mohamed** · 03-09-2014 09:46 PM

ماشاء الله عربية رائعة
ربنا يباركلك فيها و يديك خيرها و يكفيك شرها

**Moratoz** · 03-09-2014 10:26 PM

عجباني الصورة وتلخيصها للأحداث
ربنا يبارك لحضرتك فيها

**Hany Saad** · 03-09-2014 11:47 PM

المشاركة الأصلية كتبت بواسطة ahmedamgad18

ربنا يبارك لك فيها ... ويكفيك شرها

وواضح انها اقتصادية فى استهلاك الوقود على الطرق السريعة ... بحسبة بسيطة كده نقدر نقول ان استهلاكها فى مشوارك ده حوالى 5.26 لتر / 100 كم .
وده معدل ممتاز جدا مع تكييف كمان .... بس عاوزين نعرف استهلاكها ايه فى وسط البلد ؟؟
عشان انا بفكر جديا فى هذه السيارة ..
وشكرا على التقرير الجميل ده .

رداً على سؤال حضرتك....أنا بقالى 6000 كم بحسب متوسط الأستهلاك شامل السفر و داخل البلد و النتيجة 11.8km/l .....يعنى فى خلال سواقة 6000 كم منهم سفر و داخل بلد فولت 508 لتر بنزين و قطعت بيهم 6000 كم

تحياتى