الموضوع: سوزوكى ديزاير وﻻ برتون جين 2

الديزاير أفضل من ناحية

1- الارتفاع عن الأرض 17 سم .. زي العربيات الكروس وفي نفس الوقت قاعدة عجلات عريضة وكاوتش 15 عريض 185 وعفشة قوية ... يعني الارتفاع مش مؤثر على ثبات العربية - بالعكس ثباتها كويس جدا بالنسبة لفئتها

2- التوفير الرائع في استهلاك الوقود ... 300 ك/20 لتر جوة المدينة (البيرسونا .. أو الجين .. بتعمل 210 -220 ك/20 لتر) ... للأسف ماحسبتش لسة على طرق السفر استهلاكها عامل إيه بمقارنته بالجين (بس الجين بتعمل 300 ك/20 لتر في السفر)

3- هدوء العربية وصوتها الناعم بفارق ملحوظ جدا جدا عن البروتون (صوت البروتون مش وحش على فكرة أنا بحب أسمعه وأنا طالع جامد بيها صوتها محبب للنفس) ... لكن السويفت طلعة ناعمة صوت مش مسموع لغاية سرعة 100 كيلومتر أو 120 حسب مقاومة الهواء والطريق

----------------------

الجين (أو البيرسونا) أفضل من ناحية

1- قوة الموتور وعزمه وقدرته على السفر والعربية مرتاحة أكثر

2- الشنطة أكبر طبعا من الديزاير (بس اللى هايحدد هل شنطة الديزاير كافية ليك ولا لأ مقارنتك انت الشخصية للعربيتين

3- البيرسونا فيها كروز كونترول وده مفيد جدا في السفر (ما أعرفش الجين 2014 - 2015 فيها ولا لأ)

4- طبعا ثبات الجين أو البيرسونا العالي جدا وعفشتها متعددة نقاط التعليق

----------------

الإثنين متفقين بالنسبة لي من ناحية الشكل الحلو والتقفيل من جوة ... دي فيها حاجات حلوة مش موجودة في دي .. وبرضه دي فيها حاجات حلوة مش موجودة في التانية

------------------

وده كان رد لي على أخ فاضل كان بيسأل نفس السؤال ده على الفيس بس كان السؤال عن البيرسونا مش الجين

أعتقد كدة الفروق هاتتقلص أكثر
على فكرة أنا معايا البيرسونا ومعايا السويفت الهاتش باك فاللي بقوله من واقع ركوبي للعربيتين بس تقييمي هايكون على الهاتش باك

عفشة البيرسونا أريح من السويفت بقليل ومرنة عنها شوية .. وده مش معناه إن السويفت وحشة

البيرسونا الإليجانس عيوب تقفيلها قليلة جدا بالمقارنة بالموديلات الأقدم منها

بتتميز بالكروز كونترول والشنطة الكبيرة ... الوسع الداخلي متقارب ولكنه لصالح البيرسونا برضه وزي ما قلت أريح في السفر بكتير وبتعمل معدل استهلاك وقود كويس جدا في السفر بيوصل لـ 270 - 300 ك/20لتر

عدادات البيرسونا ليدات كلها منورة على طول سواء بالنهار أو بالليل ونورها بالليل بيقل شوية عشان الوهج بتاعها ما يضايقاكش ي الظلام

شاشة الكمبيوتر بتاعة السويفت أحلى وبياناتها دقيقة أكثر من البيرسونا وفيها بيانات أكثر زي استهلاك الوقود اللحظي وإثنين عداد تريب مش واحد

البيرسونا فيها كب هولدرز إثنين قدام وإثنين ورا في الكونسول اللى في النص

الديزاير فيها واحد بس قدام وفيها مسند في منتصف الكنبة اللى ورا مش عارف فيه كب هولدر ولا لأ

فرش السويفت أحلى بكتير من البيرسونا ... البيرسونا لازم تعملها فرش جلد كلها والبيبان والدركسيون عشان تستمتع بيها صح

الباور بتاع السويفت كهرباء وخفيف لدرجة رائعة جوة المدينة
الباور بتاع البيرسونا هيدروليك تقيل وقطر دورانها أقل من السويفت (يعني مثلا تلف في حتة ضيقة على كذا مرة أكثر من السويفت)

السويفت عربية عالية جدا عن الأرض وبتنزل منها للأرض مش بتقوم من على الكرسي للأرض (مش عارف فاهمني ولا لأ)
البيرسونا عربية عادية وبتحك في مطبات كتير لو محمل فيها أوزان كبيرة

مافيش مقارنة بين ثبات البيرسونا العالي جدا في المناورات والملفات الحادة على سرعات عالية .. وبين ثبات السويفت الكويس جدا وأفضل من أي عربية تانية في نفس الفئة السعرية دي برضه ولكنه لا يرقى للبيرسونا

السويفت خمس جنوط سبور بالاستبن
البيرسونا الاستبن جنط موتوسيكل صغير

السويفت موتورها صوته واستجابته أنعم بكتير جدا عن البيرسونا
البيرسونا صوت موتورها قوي ومسموع (هو مش وحش وتحب تسمعه وانت بطلع بيها) لأن طلعتها ما شاء الله شبه السيارات السبور العالية شوية ... لكن السويفت جنبه مش بسمعها نهائي لدرجة إني كذا مرة أحاول أشغلها وهي شغالة أصلا

السويفت بتعمل استهلاك وقود جوة البلد في حدود 300 ك/20لتر ... ماجربتهاش في السفر لسة
البيرسونا بتعمل جوة البلد 200 - 220 ك/20لتر وساعات أقل لو زحمة شديدة ... وفي السفر 270 - 300 في السفر

ده اللى في دماغي دلوقتي

------------

بس خد بالك إن المقارنة الصح مش بين البيرسونا والسويفت

الصح بين السويفت الديزاير والنيسان تيدا سيدان أو الميتسوبيشي الأتراج مثلا

وفي الحالتين دول السويفت تكسب من غير كلام

نقطة كمان أحب أضيفها إن نظام الصوت في البيرسونا قوي ورائع
في السويفت نقي ولكن بيز ضعيف