ترخيص العربية افيدووونى

**دينا** · 05-09-2014 08:35 PM

السلام عليكم ورحمة الله وبركاتة

من فضلكم انا هرخص العربيه اخر الشهر ان شاء الله

هى كدا كملت سنة وانا اللى هعمل اجرائتها بنفسى

انا جيباها قسط تبع البنك حد يعرف بقا ايه الاجراءات

وهعمل ايه ف المرور وهدفع ايه والحوارات دى كلها ؟

**reda elgohary** · 05-09-2014 08:48 PM

حضرتك مرور ايه ؟
عشان هتفرق من واحد للتانى حسب التعقيدات والنصب بتاع الناس اللى خارج المرور .

**دينا** · 05-09-2014 10:01 PM

انا من السويس

**scientist9508** · 05-09-2014 11:16 PM

بكل أسف و خجل و حزن . . تجهزى لكثير من الرشاوى و الأتاوات (رشوه لكل مرحله إبتداءآ من الفحص وحتى النهايه)

**J A G U A R** · 05-09-2014 11:17 PM

وعليكم السلام ورحمه الله وبركاته

ازيك يا دينا :)

معقوله هاتعملى الاجرائات لواحدك !!
ده انا عمرى ما عملتها لواحدى هههههه

لو العربيه لسه عليها اقساط لبنك يبقى الرخصه لازم تتجدد سنه مش اكتر لغايه الاقساط ما تخلص

انا مش خبره اوى فى الموضوع ده بس هاقول على اللى اعرفه وهو طبعا بيكون يوم رخم جدا

الاول بيتدفع تأمين اجبارى لتجديد سنه ولو مفيش اقساط بتجددى زى ما انتى عاوزه
وفى نماذج ودوسيهات بيطلبوها تشتريها
والعربيه بتدخل نص ساعه فحص وكشف
وفى ضريبه بتندفع وبيطلبو شهاده مخالفات
وبيشوفو طفايه الحريق وفاضيه و لا مليانه
وبتستنى بتاع ساعه ولا ساعتين لغايه ما الرخصه تطلع
ده غير كل شويه روح هات مش عارف ايه روح اعمل كذا روح اشترى كذا روح نيل كذا
هو بيكون يوم ازرق وطويل ويخنق جدا والواحد بيكره نفسه فى اليوم ده

علشان كده منصحكيش تروحى لواحدك
وتشوفى واحد سلكاوى هايجيب من الاخر وهيساعد وهايسهل كل حاجه

**ibrahimahmed** · 06-09-2014 12:39 AM

اولا طالما فات سنة بس يبقى انتى هاترخصى بس بدون فحص ... فحص اى عربية بيبقى فى حالتين مالهومش تالت ... يا اما عدى على ميعاد اخر فحص 3 سنين يا اما هايتم بيع العربية ونقل ملكيتها لشخص اخر ... فى الحالتين دول بس بيبقى فيه فحص مع تجديد الترخيص ... غير كدة بيبقى ترخيص بس
وبما ان حضرتك بتقولى عدى سنة بس يبقى هايكون تجديد الترخيص فقط بدون فحص السيارة ... الفحص بتاعك هايكون فى تجديد الترخيص سنة 2016 ان شاء الله
ثانيا :بالنسبة لإجراءات الترخيص بالنسبة لحضرتك هاتكون كالتالى :
1- هاتروحى البنك اللى انتى مقسطة معاه تطلبى جواب بالموافقة على تجديد الترخيص ... لازم الجواب ده تروحى بيه المرور عشان من غيرة مفيش ترخيص هايتم ... ولازم تطلبى الجواب ده من البنك بدرى لانه بياخد شهر تقريبا فى اصداره ... فمتستنيش لاخر يوم فى الرخصة وتعملى الكلام ده عشان جواب البنك هايطول ورخصتك الحالية هاتنتهى مدتها وانتى لسه مستنية جواب البنك .... واكيد البنك قالك الكلام ده فى بداية التعاقد ( لو ما قالوش يبقو بيستهبلو الصراحة لانها حاجة اساسية )
2- فى المرور ان شاء الله الموضوع هايبقى سهل لانه ترخيص بس مش ترخيص وفحص زى ما قلت قبل كده ... هاتروحى بدرى تعملى شهادة مخالفات ولو فيه على العربية مخالفات هاتدفعيها وتطلع شهادة المخالفات تاخديها وتروحى على شباك تجديد الترخيص معاكى اصل البطاقة ورخصة العربية وشهادة المخالفات وجواب البنك وصورتين من كل مستند من دول احتياطى وتسلمى الاوراق
3-الراجل اللى واقف على الشباك هياخد منك الاوراق يراجعها ويحسبلك الضريبة ويكتبهالك فى ورقة ( فى حدود من 200 ل 300 جنيه ) ... هاتروحى تدفعيها فى الخزنة وترجعيلو بالوصل يحطو مع الورق .
4- هتستنى نص ساعة او ساعة او ساعتين حسب زحمة المرور ... وهايندهو اسمك فى شباك استلام الرخص عشان تاخدى الرخصة الجديدة ... والف مبروك مقدما

**دينا** · 12-09-2014 03:07 AM

ربنا يباركلك يااستاذ ابرااهيم

انا فعلا ابتديت اعمل ف الورق بتاع البنك اصل فى اوراق

طلبها منى البنك اعملها قبل مااخد الافاده

وعالاسبوع الجاى هرجعلهم تانى وارجع عالمرور وربنا ييسر

**Abo_Mazen** · 12-09-2014 02:44 PM

شوية معلومات متأكد منها ..

العربيه القسط بتفحص وبتجدد كل سنه ..أنا عارف إن الفحص بيكون كل تلات سنين ..لكن العربيه القسط لازم تفحص كل سنه ..هو ده النظام ..وده عشان البنك يتأكد إن العربيه موجوده وما تمش التصرف فيها ..سواء بالإعدام أو تغيير أي جزء فيها

مفيش حاجه هتتعمل قبل جواب البنك ما يطلع ..يعني لازم يكون جواب النبك موجود عشان نبدأ نرخص نجدد نفحص ..بس لازم يكون جواب البنك موجود

أي حاجه بعد كده نتفق نختلف فيها ..بس الحاجتين اللي فوق دول أساسيين مفيهومش خلاف

**ibrahimahmed** · 12-09-2014 03:05 PM

المشاركة الأصلية كتبت بواسطة m_m_sh_a

شوية معلومات متأكد منها ..

العربيه القسط بتفحص وبتجدد كل سنه ..أنا عارف إن الفحص بيكون كل تلات سنين ..لكن العربيه القسط لازم تفحص كل سنه ..هو ده النظام ..وده عشان البنك يتأكد إن العربيه موجوده وما تمش التصرف فيها ..سواء بالإعدام أو تغيير أي جزء فيها

مفيش حاجه هتتعمل قبل جواب البنك ما يطلع ..يعني لازم يكون جواب النبك موجود عشان نبدأ نرخص نجدد نفحص ..بس لازم يكون جواب البنك موجود

أي حاجه بعد كده نتفق نختلف فيها ..بس الحاجتين اللي فوق دول أساسيين مفيهومش خلاف

موضوع جواب البنك انا متفق معاك فيه وانا ذكرته قبل كده فى ردى السابق على الاستاذة دينا ... اما بخصوص الفحص انا مختلف معاك لان حصلت وقائع موكدة امامى وهى ان صديق ليا فى العمل مرخص عربيته بس من غير فحص لان ميعاد الفحص اللى مكتوب فى الرخصة مجاش ... وهو طبعا عربيته قسط بنك ومكتوب على الرخصة حظر بيع ... واخويا قسط عربيته مع البنك برضو وكان بيرخص كل سنة عادى بس فحص بعد 3 سنين من بداية اول ترخيص حسب ماهو مكتوب فى الرخصة
وبعدين هانروح بعيد ليه ... انا نفسى لسه شارى العربية زيرو قسط الشهر اللى فات ومرخص عادى ومكتوب فى الرخصة ان تاريخ الفحص 2017 ( يعنى بعد 3 سنين ) مع العلم انى مرخص سنة واحدة غصب عنى لان العربية قسط ...لو كلامك مظبوط كانو كتبو فى الرخصة ان تاريخ الفحص 2015 مش 2017
اما بخصوص البنك يمكن حضرتك تقصد الترخيص نفسه مش الفحص ... لان فكرة الترخيص سنة واحدة اجبارى للعربيات القسط هو عشان حاجتين ... اول حاجة هى اللى حضرتك ذكرتها ان البنك يتاكد ان العربية موجودة ... تانى حاجة انه يربطك بجواب البنك عشان لو انت متاخر فى اقساط ولا حاجة البنك مش هايديك الجواب وبالتالى مش هاتعرف ترخص غير لما تدفع الاقساط المتاخرة عليك
بس صدقنى الفحص مرتبط بال 3 سنين او نقل الملكية فقط