الموضوع: بحمد لله استلمت ورخصت سوزوكي سويفت 2015 ديزاير سيدان

عن السوزوكى السيدان أتحدث

رحت اتفرجت عليها وقارنت بينها و بين الهاتشباك - فرق باين فى وسع الشنطه و الارتفاع العام و فرق بسيط فى الصالون وارتفاع السقف لصالح الديزاير
على طول قدمت المشيئة و من غير تردد حجزت بمبلغ 5000
و استلمت بعد 15 يوم من مودرن موتورز م. نصر

العربية كان عدادها 53 كم و سألت ليه قالولى بتيجى سواقه من ابو رواش

الترخيص كلفنى يوم و حوالى 1350 ج
شامل كل الحاجات من طفاية و مثلث و شنطة اسعافات وضريبة 3 سنين ( 835 ج) و تأمين اجبارى (275ج )
و فيه حوالى 105 جنيه ض.رفاهية مالكوش دعوى بيها الا اذا كنتوا بعتوا عربية و لم تسجل للان زى حالاتى

انا سوقتها حوالى 150 كم فقط و مبدئيا قدرت احكم على التالى :

- وسع العربية معقول جدا - تاخد 4 افراد ناضجين مستريح
- الموتور ناعم جدا و لا تسمعله صوت و سحبته جميلة حتى مع التكييف
- العربية عالية و لا تؤثر عليها الجبال ( قصدى مطباتنا و شوارعنا الجميلة )
- العغشه مش بنعومة الفيرنا طبعا ( اللى كانت معيا و اللى تعتبر من انعم العفشات)
لكن ده مقابل الارتفاع الرائع و الثبات الجيد - الامان ليه افضلية هنا من وجهة نظرى
- استهلاك البنزين 14.8 كم / لتر حاليا مع وجود فردين معايا و بالتكييف - ممتاز و لاحظوا انى لسه بلين و اعتقد هايتحسن بعد ال5000 كم زى كل العربيات لأنهم بره بيشتكوا ان معدلاتهم فى حدود 17 كم /لتر عقبالنا يا رب :)
- النظام الصوتى بالنسبة لى رائع بمعنى الكلمة
- الصالون و التقفيل و العزل جيد جدا - مافيش اصوات طول الطريق (قافل الازاز و مشغل التكييف ومن غير كاسيت حاليا علشان انا ودنى حساسة شوية و مع اى عربية اركبها من ناحية الصالون و الموتور و الطريق )

و طبعا جزيل الشكر لـ د / ايمن اللى لم يبخل باى معلومة و دقته فى الطرح و الشكر ايضا لكل الزملاء الذين ذكروا ارائهم بكل حيادية
دى انطباعات مبدأية و اى جديد سوف اواليكم بيه
باركولى بأه يا أحلى اخوة فى أحلى منتدى و ادعولى بالخير
و اللى عنده سؤال يتفضل و انا تحت امره
خالص تحياتى

الف مبروووووووووك ياكبير ... هو مافيش أخبار إذا كان هينزل من السويفت سواء السيدان أو الهاتشباك مانيوال ولاكله أوتوماتيك بس ؟