رابطة ملاك الأتراج ،، عايزين معلومات مهمه عن السياره

**bedo84** · 07-09-2014 08:26 PM

السلام عليكم ورحمة الله

يا جماعه مفيش اي موضوع متثبت عن العربيه الجميلة اتراج ولا معلومات من ملاكها مش لاقي غير مواضيع ناس بتهاجم

العربيه وتقول 1300 ومش عارف ايه بدون اي تجربه وبدون عمل حساب لسمعة شركه محترمه زي ميتسوبيشي أكيد مش

نزله تخدع الناس وتلم فلوسهم وخلاص ،، انا عن نفسي التنين قرايبي بيسألوني عنها وطبعا مش قدر أديهم معلومات كافيه

أرجو من الساده ملاك السياره الجديده علي السوق المصري ميتسوبيشي اتراج يدونا معلومات كافيه عن :

السحب ،، الثبات ،، الارتفاع عن الارض والعفشه ناعمه ولا لا ،، التكييف ومدي تأثيره في الطوالي والزحمه

هل 1300 سي سي عيب ام ميزه مستقبلا من وجهة نظرك خاصه الناس ال عماله تشتكي انها 1300 سي سي

رأيك بصفه عامه وهل مبسوط من اختيارك ولا لا ،،، وفي النهايه التوكيل وقطع الغيار ،،

الموضوع دا ممكن يتسبب ان ناس كتيره تشتري من مشاركتك ،، أرجو عدم البخل باي معلومة تعرفها

**مؤمن حمزه** · 07-09-2014 08:29 PM

* * * * * * * * * *
اولا ده جروب جديد على الفيس لملاك الاتراج هيتم تفعيله فى خلال ساعات انا احد الادمينز فيه...ياريت الناس تشارك فيه علشان نقدر نفيد من يريد ان يشترى العربيه.....

ممنوع وضع روابط لمنتديات أو مواقع أو أي وسيلة مقروءة أخرى منافسة او غير منافسة دون الرجوع للإدارة
م.ع.3

**mestca** · 07-09-2014 11:54 PM

انا برحب بالموضوع دة و انا من ملاك تحفة متشوبيشى اتراج ماشى بالعربية 2100 ك و مرخص من يوم 4-8 و العربية الحمد لله ممتازة فى النعومة و العفشة و السحب سحب 1600 ما تحسشش انها 1200 ابداء العربية ثابتة على الطريق قوى و استهلاك البنزين فى حدود 300 جوة البلد و 400 او اكتر شوية على السريع

**مؤمن حمزه** · 08-09-2014 02:07 AM

احنا اتكلمنا كتير على العربيه....

ببساطه افضل عربيه نزلت السنه دى....عربيه ماسجلتش اى عيب ...عربيه سحبها ممتاز موتور ماشاء الله .واسعه بحر من جوه..ثبات .عفشه ممتازه.علو عن الارض...بتعمل 800 كيلو و اكتر فى التنك.....

العربيه المفاجاه

**ro6mio** · 08-09-2014 02:23 AM

الحمد لله استلمت من يومين
مشيت بيها حوالي 250 كيلو مقفلتش التكيف وطبعا وسع غريب ونعومه وثبات ل 130 140
ومحستش ابدا انها 1200 وكل اللي جربها قال كده

**مؤمن حمزه** · 08-09-2014 02:37 AM

بلاش تكييف كتير فى الاول يا استاذنا استنى لحد ما تكسر اول الف كم علشان الموتور....

**gozo** · 08-09-2014 02:42 AM

انا بعد مشفت سؤالك يا بيدو عملت موضوع عن العربية بعد ما جبتها و جربتها واتمنى يفيدك و يفيد اي حد بيفكر فيها .
وفعلا زي ما استاذ مؤمن بيقولك يا ro6mio حاول متستخدمش التكييف كتير و كمان مكتوب في الكاتالوج متزودش عن 100 كيلو في اول الف غير في الضرورة و متعملش كيك داون او فرملة مفاجاة عشان تحافظ على الماتور .
نصيحة لو مشاويرك مش كتير حاول تخلص ال 1000 كيلو في مشوار لاسكندرية مثلا و بعد كده دوس براحتك

**ro6mio** · 08-09-2014 02:31 PM

بحاول الار بي ام اخره يبقي 3 وهي كده كده بتبقي ماشي 100 والار بي ام علي 2 واقل سنه

**reyad_mohamed** · 09-09-2014 03:11 PM

السلام عليكم ورحمة الله
الحمد لله بعد قصه طويله حجزت رينو وبعدين غيرت ل هيونداى اى تن وكانت النهاية الساحرة اتراج استلمت من يومين بس حكايه مش متخيل انها 1200سى سى ولا 3 سلندر سحب العربيه حكايه لدرجت انك تتفاجئ انك ماشى على 140 فى اقل من 30 ثانيه مع التكيف على 2 تحفه
العفشه ممتازة هى مش ناعمة قوى فى الطريق المكسر اما فى المطبات الصناعية والطريق العادى ممتازة جدا
موضوع توفير البنزين لكل 20كيلو 1 لتر ده مش مظبوط الطبيعى اللى لحظته بالفعل 15 كيلو لكل لتر
التكيف نفسه ممتاز ولكن له تأثير فى سحب العربيه لما التكيف بيكون على درجة اكثر من 2 لحظتها اكثر من مره بس اجمالا سحب مع تكيف على درجة 2 ممتازة العربيه جدا جدا بس جو العربيه بالدخل مش بيكون ثلاجة بصراحة بس معقول الجو جدا بالداخل لما ترفع التكيف على 3 او 4 بتبقى فريزر مش ثلاجة بس السحب بيقل لحد ما توصل سرعة 100 متحسش بفرق بس اعتقد ده كده عمل شاق على الموتور
الثبات لحد 140 ثبات تام ومتحسش اصلا انك ماشى بالسرعة دى اكثر من ذلك مجربتش بصراحة بس حرام الواحد يمشى على اكثر من كده فى البلد الخربانه دى مفهاش طريق كويس
الفرامل ممتازه فى البطئ والسريع وعلى فكره فى اوبشن فى الفتيس كويس بيساعد فى السرعة العالية جدا مع الفرامل وضع b بس بيحمل على الموتور انصح باستخدامه فى السرعة العالية جدا فقط
الصالون انا مش هحكى عليه لانه فوق الوصف مريح جدا ووااااااااااااااااااااااس ع قدام والمقعد الخلفى

**mr_vampire** · 09-09-2014 03:28 PM

انا زميلكم بس لانسر. تصحيح بسيط . سرعة التكييف ( المروحة ) مبتاثرش علي السحب ولا علي درجة التبريد لان ده سرعة المروحة فقط. اللي بياثر هو بكرة ظبط درجة الحرارة لان ده اللي بيخلي الكومبريسور يفصل علي فترات طويلة او قصيرة ( حسب درجة الحرارة المطلوبة ).

شغل المروحة فقط مع عدم تشغيل التبريد مش هتحس بحاجة فالسحب.

وربنا يباركلو فالعربية الجديدة ويكفيكو شرها ويديكو خيرها.

بس محدش اتكلم علي امكانياتها واسعارها للهاي لاين والبيز لاين .

فلو تكلمونا اكتر عن الامكانيات والاسعار للافادة.