دليل العاملين فى المدن السياحية من أجل تعامل أفضل مع المصريين

**fepsceasar** · 10-09-2014 12:07 PM

1- لا داعي لتقييم العميل المصري وتحاول تحكم على تعليمه او بيئته الاجتماعية والثقافية لانه مش جايلك زيارة عائلية
2- ما تشغلش بالك بكمية الاكل اللى بياخدها لانه مش من بيتكم والفندق بيكسب كويس وغالبا اسعار المصريين أغلى من الافواج الاجانب، ولو فى حاجة محددة الكمية يا ريت يبقى فى لافتة بالموضوع ده علشان ما تحسش انك مبسوط وانت بتحرج واحد طلب صوباع كفتة زيادة
3- ما تبصش بقرف لواحد مصري وتحس باستيجما لانه عمل تصرف مش كويس ممكن اثناء الرسيبشن بكل ود توضحله بعض الاساسيات عن المطعم والبوفيه والشاطئ وأهمية عدم رمى الاكياس البلاستيك والمخلفات عليه
4-ما تردش بزعيق على عميل مصري طلب عصير زيادة أو طلب يغير الكوباية وتقوله ده الموجود ..ما تعش فى الدور اوى وانت عارف العصير ده عبارة عن اي كلام
5- ما تضحكش على واحدة بتنادى على ابنها وبلغها انك ممكن تكلف حد يروح يلفت نظره انها عاوزاه ومش قادرة تروحله
واخيرا وليس اخرا الاجانب ما علهمش سكر والمصريين مش كخة ..ولا احنا ما بنحبش نستقوى غير على بعض

**Khaled Online** · 10-09-2014 12:18 PM

أحييك عالموضوع وعلى أسلوبك الراقي في العرض
من زمان وبنقول قطاع السياحة الداخلية محتاج يغير طريقة معاملته للمصريين والرد المعتاد (لأ مهو المصريين صعبين قوي) على أساس كل اللي رايحين من عينة مهرجانات أوكا مثلا

**fepsceasar** · 11-09-2014 08:48 AM

المشاركة الأصلية كتبت بواسطة khaled online

أحييك عالموضوع وعلى أسلوبك الراقي في العرض
من زمان وبنقول قطاع السياحة الداخلية محتاج يغير طريقة معاملته للمصريين والرد المعتاد (لأ مهو المصريين صعبين قوي) على أساس كل اللي رايحين من عينة مهرجانات أوكا مثلا

حتى لو عائلة محترمة بتحس ان فى حالة تحفز من العاملين ضد المصريين، ده انا ساعات بقعد فى المطعم بتفرج على عند متبادل

**Khaled Online** · 11-09-2014 09:48 AM

المشاركة الأصلية كتبت بواسطة fepsceasar

حتى لو عائلة محترمة بتحس ان فى حالة تحفز من العاملين ضد المصريين، ده انا ساعات بقعد فى المطعم بتفرج على عند متبادل

بالزبط كده. ياريت يعرفوا إن اللي بيخرج من عندهم مضايق مابيرجعش وكمان بيقول لكل اللي ناوي يحجز ابعد عن المكان الفلاني

**amr011111** · 11-09-2014 12:12 PM

هتلاقى اللى بيعمل بالسياحه ده بيعمل اكتر من كده
احتمال كبير يكون بيغطس فى حلة اللحمه قبل ما تخرج للعملاء

**بحار** · 12-09-2014 06:06 AM

احيك على الكلام الجميل ده .. فعلا العامل فى مجال السياحه بيعرف ينقد النزيل المصرى والفرق بينه وبين الاجنبى .. بس مابيعرفش ينقد نفسة ويعرف الفرق بينه اللى طفش السياح بطلب التبس والعامل برة اللى خلى دول مافيهاش اثار بيدخلها ملايين السياح سنويا واضعاف دخل بلدنا من السياحه ..

**canner** · 15-09-2014 12:49 PM

المشكلة من زمان اللى انا شايفها انا لما كنت بروح فندق و السياحة كويسة الاقيه بيعاملنى بأستبياع و الاسعار عالية جدا و العكس لما السياحة تبقى مش كويسة و تلاقى اغلب الفنادق قفلت و مشت الناس اللى شغاله عندها

طيب ما تكون عندك سياسة السياحة الداخلية مش الاساسى الاجانب و العرب و المصريين فى المرتبة الاخيرة

فيه مصريين كتير محترمين و يكونوا احسن من الاجانب كمان بس دول لازم تشجعهم انهم يجولك مش يبصوا للسفر بره

مثلا انا كنت ايام الدراسة كان عاجبنى فندق فى شرم و لما سألت عن الليلة لقتها غالية عليا ساعتها و لما اشتغلت روحت و كنت عاوز انزل هناك بس قاللى ان الغرف كلها محجوزة قلت مش مشكلة اقعد فى فندق يومين و ارجع تانى قاللى الفندق محجوز لحد تلات شهور قدام

المهم دخلت على النت و بدور على الفندق و شفت الحجز بتاعه لقيت فيه اماكن فاضيه و كنت ح احجز فيه عنداً فى الراجل بس قلت ما دام هم مش عاوزنى انا كمان مش عاوزهم و قعدت فى فندق تانى

فيه فنادق كتير اعرفها مش بتنزل مصريين فيها