الموضوع: تقرير صيانه 5000 نيوصنى

اليوم عملت صيانه ال 5000 للنيو صنى بتاعتى 2014

المكان الاتحاد الوطنى بطنطا

الساعه 11.30 ص

انا الحمد لله ماكانش عندى اى مشاكل فى الفرامل او غيره اللهم الا مشكله واحده هى

عداد قرائه البنزين والكيلومترات ظهر معايا مشكلته من حوالى شهرين القرائه والمؤشر كان بيختفى رغم انى باكون مفول قبلها

لاحظت انه بيشتغل اول لما افول ويرجع يختفى بعد ماامشى شويه كيلومترات تقريبا بعد 60-70 ك

عرفت ان المشكله غالبا سببها عوامه البنزين بس مارحتش لهم وقلت خليها فى صيانه ال 5000

المهم قلت لهم عليها وطلبت وضع زيت ال 10000 لانى فى صيانه الالف كنت حاطط ال 5000 المعدنى فغيرته الى شل الترا التخليقى

طبعا عملوا تشيك على العربيه وظبطوها ولكن جينا عند المشكله قالوا لى البنزين فيه ميه ولازم تفضيه

قلت لهم انا بحط 92 ازاى فيه ميه قالوا لو مش عتنزله مش هنركب العوامه ولو عايز تركبها هنمضيك على اقرار مالكش ضمان عليها

قلت لهم فضوا التانك ونضفوه بعتونى اروح اجيب بنزين فى جركن رحت لبنزيه مالقتش 92 رحت لواحده تانيه فى طنطا مارضيوش يدونى فى الجركن ورفضوا رغم انى حكيتهم الموقف لكن للاسف فيه تشديد عليهم

اتصلت بحد قريب لى من محافظه تانيه يجيب لى بنزين اعمل ايه مضطر

المهم على بال مايجى روحت للعامل اللى شغال هناك وقلت له اتصرف لى فى 5 لتر بنزين اطلع بيهم بالفلوس لغايه لما يجى قريبى

الراجل بصراحه اتصرف لى فى 5 لتر واخدت العربيه بعد ماركبوا العوامه والمشكله اتحلت وطلعت الحمد لله بس كنت اتاخرت طبعا هناك مشيت الساعه 4.30

تكاليف الصيانه 519 ج
زيت 10000 - 300 ج
فلتر زيت 61 ج
تركيب الفلتر 25 ج
ضريبه 48 ج
فوم 25 ج
خدمه 85 ج

الاجمالى 519 ج


عرفت منهم ان العوامه ب 600 ج بس هم غيروها فى الضمان من غير كلام لوحدهم

بالنسبه للعربيه السحب والتسارع ماشاء الله انا مبسوط منها جدا الحمد لله

الفرامل كويسه مابتصفرش معايا وحلوه

بس مش عارف بقى هل لانى استخدامى كويس ومش عنيف ولا ايه

كان عندى مشكله استهلاك عالى فى البنزين اول لما استلمت العربيه بس كان بيتحسن تدريجيا لحد ماوصلت الى 4000 ك قبل ماقفل ال5000 الصفيحه عملت معايا 280 ك على الطريق مع تشغيل التكييف احيانا مش كل الطريق

دا تقريبا اللى حصل عايز اعرف بقى ايه حكايه الميه اللى فى البنزين دى وهل ممكن تبوظ العوامه وتخليها تملح وتبوظ كده

واذا كان فعلا دا صحيح نعمل ايه بقى علشان نتفادى ده