بعد اللي حصل ده ..لالالالا لثرموستات الكوع ولو عليها فلوس

**Abo_Mazen** · 15-09-2014 07:00 PM

ليا واحد صاحبي معاه عربيه سوزوكي التو 2009 ..العربيه معاه من الزيرو ..وهو على فكره راجل محافظ جدا على حاجته ..ومحافظ جدا على صيانات عربيته ..وحافظ كل صيانه بيتعمل فيها إيه ..وكل صياناته في التوكيل ..وعربيته عامله تقريبا 39000 كيلو ..ومبيروحش غير التوكيل ..الحاجه الوحيده اللي بيعملها بره هي شغل العفشه فقط

بتكلم معاه من كام يوم لقيته بيقولي ..بس الميكانيكي اللي روحتله آخر مره ده كويس على فكره ..أنا بصراحه إندهشت ..ورفعت حاجبي كده وقلتله ..ميكانيكي ..وآخر مره ..هو إنت من إمتى بتروح لميكانيكيه ..الله ..إنت سبت التوكيل ولا إيه ..

قالي إيه ده ..هو إنت متعرفش ..قلتله معرفش إيه ..قالي مش من كام شهر كنت راجع بليل أنا والعيال ومراتي من المعديه ..والمعديه دي منطقة عندنا في إسكندريه بعد أبو قير تقريبا ..وبعدين فجأة لقيت العربيه سخنت مني ..قلتله سخنت ..إزاي ..ده إنت مياهك خضرا وموبيل كمان ..يعني من الغالي..وزيتك من التوكيل ..إزاي عربيتك تسخن ..قالي آه زمبؤلك كده ..قلتله وبعدين عملت إيه ..قالي إتصلت بواحد حبيبي قوي حكيتله إداني نمرة ميكانيكي قالي إتصل بيه وشوف ممكن يجيلك ولا لأ ..وبعدين إتصلت بالميكانيكي قالي حاول تقرب بالعربيه نواحي العصافره كده عشان أقدر أجيلك بمواصله واحده وأجيلك أسرع بدل ما أجيلك بكذا مواصله وأتأخر عليك ..فأنا بقول لصاحبي ..بس العربيه بتسخن..مشيت بيها إزاي ..قالي ما أنا إضطريت إني أعمل كده لإن المنطقه اللي العربيه عملت فيها الدنيئه صعبه قوي ..من حيث إنها منطقه مقطوعه وفيها زراعات والوقت كان متأخر..والمنطقه دي كانت قبل المعموره البلد وهو جاي من الطابيه ..قلتله وبعدين ..قالي مفيش ..سايستها كده لغاية ما وصلت للعصافره ..منطقه عمرانه بالناس ..والميكانيكي جالي وقطرنا العربيه لغاية العجمي لغاية ما وصلنا الورشة بتاعته وطبعا كنا دخلنا على وش الفجر ..سبتها عند الورشه بتاعته وتاني يوم إبتدى شغل فيها وطلع العيب إن ثرموستات الكوع قافش ومفتحش ..فأنا بقوله طيب مكانش فيه أي مؤشرات إن العربيه تبريدها مش متضبط قبل موضوع ثرموستات الكوع ده ..مثلا بتسخن على السرعات العاليه ..بتسخن في الزحمه ..قالي ولا كان في أي حاجه ..ده حتى وأنا رايح بيها لنسايبي كانت ماشيه زي الفل ولا فيها حاجه.. وطبعا كان متوقع جدا إنها تكون جابت جوااااااااااااان وش سلندر ..طبعا الجوان إتعمل والوش خد مسحه ..والعربيه بقت تمام التمام

الروش بقى في الموضوع إن عربيتي أخت عربيته ..بس 2008 ..وثرموستات الكوع عندي متشال ..مش أنا اللي شايله ..ده أنا واخدها من صاحبها كده ..وبصراحه ..من كتر المواضيع اللي قريتها هنا في المنتدى ..وإزاي إن ثرموستات الكوع دي بتحول العربيه لمركبه فضائيه ..بتمشيى من غير بنزين..وإنها بتطول عمر المحرك وتخليه يقعد معاك بتاع 60 سنه ميعمرش ..كانت مزقزقه في دماغي إني أركبها ..لكن بعد الحادثه دي ..فأنا بقول لثرموستات الكوع ..لالالالالالالالالالالالا لا وألف لا ..ولا إنها تقفش ..ولا إني أقف في طريق مقطوع في نص الليل ..ولا إن العربيه تجيب جوان وش سلندر ..وإن كان على إستهلاك البنزين الزياده ..مش مشكله ...أحسن من حرقة الدم

**muhmado_furp** · 15-09-2014 07:21 PM

هو موضوع أن الترموستات تعلق مره واحده حظ عاثر لصاحب العربية
والطبيعي انها بتعلق وعليه تتغير
وان شايف انها تتغير كل 20 ألف بالكتير وبالاصلي
بس هي فوايدها كتير علي فكره مش زي ماحضرتك بتقول

**Mecha** · 15-09-2014 07:29 PM

فيه عيوب تانيه للدواره من غير ترموستات
الزيت مبيسخنش كويس البساتم بتسلخ
خصوصا عندك اسكندريه , جو بارد الي حد ما ف الشتا
لو ف الاقصر هشيلو علطول

بس لوز '' زمبؤلك'' دي

**mk3** · 15-09-2014 07:50 PM

اهلا بك فى مدرسه الصنايعيه المصريين

**Fo1Fo** · 15-09-2014 07:59 PM

ده رأىي انا مع ترمسوستات الكوعه : ترموستات الكوعه عامل زى (اللوز فى الزور ) أكيد ربنا خلقها لسبب . ولكن اذا تكرر التهابها فأن الدكاتره يفضلوا شيلها . اذا حصل عطل فى الترمستات وهو راكب ها يعمل مشكله كبيره . اما عدم وجوده فأن تأثيره يقتصر فى الصباح الباكر فى أيام الشتاء شديده البروده اثناء القياده على الطرق السريعه . فى هذه الحاله الموتور لن يصل الى درجه حرارة التشغيل المناسبه . للتغلب على هذه المشكله ممكن تسخين العربيه قليلا قبل الوصول للطرق لسريعه.اما القياده داخل المدينه مش ها تفرق .يعنى على سبيل المثال بعد ما شالو الترمستات من عربيتى وقبل المحور ما يتزحم انا كنت بوصل ميدان لبنان من أكتوبر ومؤشر الحراره لم يصل لدرجه حراره التشغيل (اول شرطه -بدايه التدريج اللى هى60 )وده طبعا غلط فلازم أسخن العربيه شويه قبل ماأمسك الطريق السريع . قبل ما يتشال الترموستات كانت اقل درجه حراره تشغيل هى 87 اى كانت بروده الجو .

**abdulkhaleq** · 15-09-2014 08:40 PM

يعني الميكانيكي المصري بفهلوته
اذكى من اللي عمل العربيه ؟؟؟

اللي صنعها حط فيها الجزء ده
اكيد مش منظره :)

**ahmed_moeaz** · 15-09-2014 08:55 PM

ضرره فى حالة عطه اكبر بكتير جدا من فوايدة مهما كانت كتير

**kaza** · 15-09-2014 10:31 PM

ثرموستات الكوع مهم جدا للعربيات وبالاخص في درجات الحرارة تحت الصفر اللي مياة التبريد بتقارب بل بتتجمد بالفعل في الموتور وبالتالي مع تشغيل المحرك بيحصل اجهادات حرارية كبيرة بسبب اختلافات درجات الحرارة حتي في راسالاسطوانات لكل غرفة احتراق بين الاشواط وبالتالي بتقل جسائة المعدن وكتله راس الاسطوانة تتشرخ وتنتهي بس فية حاجة ان ثبات الحرارة بين 90-80انسب حرارة للتبريد وبتثبت خلوصات الموتور ومناخ جيد لسرعة خلط البنزين بالهواء في شكل متجانس الجزيئات للحصول علي احتراق افضل وعوادم اقل بس رائي الشخصي وباكرر الشخصي في مصر مالوش لازمة وعانيت منه في محركي المشحون بسخونة غير عادية وصلت لانصهار لحام المبرد ووش السلندر ومن يوم ماشيلت الثرموستات وعمري ما اشتكيت من السخونة بس علي حساب نعومة الاداء وزيادة طفيفة في استهلاك البنزين عربيتي فيات كروما تربو16الفين

**Abo_Mazen** · 15-09-2014 10:50 PM

بصوا يا جماعة ..أنا قريت عن ثرموستات الكوع دي على مواقع أجنبيه ..قلت بيني وبين نفسي ..سيبك يابني من المواقع العربيه خالص ..ومن المواقع المصرية خالص ..وشوف بقى الخواجات اللي عملوا العربيه دي بيقولوا إيه ..لقيت بقى الخواجات اللي صنعوا العربيه دي بيقولوا إيه ..

بيقولوا إن ده إختراع قديم قوي ..موجود في العربيات من سنة 1934 ..أيون ..التاريخ صح ..هو 1934 فعلا

وبيقولوا كمان إن هما عملوا الإختراع ده بعد ظهور محركات الإحتراق الداخلي ..أو بعد ظهور محركات الإحتراق الداخلي بفتره قليله

وبيقولوا إن وظيفة ثرموستات الكوع دي ..إن هي بتضمن وصول المياه لجميع أجزاء البلوك بدرجة حرارة واحده ..ده حتى في تشيبه إستخدموه وهو إن المياه المحيطه بالمحرك عامله زي ..القميص المائي..وبرضوا شبهوا أهمية الثرموستات دي بأهمية الإحماء اللي بيعملوا البني آدم قبل ما يقوم بأي نشاط أو مشوار طويل ..

وبيقولوا إن الثرموستات دي بتحافظ على درجة حرارة المحرك ضمن مستويات معينه ..وده بيضمن إحتراق جيد للوقود ..وعدم وجود إنبعاثات ضاره من المحرك نتيجة عدم الإحتراق الجيد للوقود مما يؤدي للإضرار بالبيئه

بصراحه ..ملقيتش أي حاجه في المواقع دي بتتكلم عن إن عمر المحرك هينزل للنص..أو إن في أضرار ماديه هتنتج من عدم إستخدام الجزء ده في السيارة ..والإنترنت متاح للجميع وممكن أي حد يفيدنا بأي موقع بيتكلم في الموضوع ده ويقولنا لقى في إيه جديد عشان الكل يستفيد

حاجه تانيه ..تعالو نتكلم بصراحه ..إحنا هنا في مصر ..مصر بلد الأمان ..مصر البلد اللي تطلب الإسعاف فيها تجيلك بالطياره في خلال 60 ثانيه ..وتطلب أي سيارة إنقاذ تجيلك طيارة في خلال 15 دقيقة ..أنا بتريق طبعا

أنا أقصد من حكاية إن إحنا هنا في مصر ..إن ثرموستات الكوع موقف واحد سخيف منها يكرهك في عيشتك ..ويعرض حياتك للخطر ..وده اللي حصل مع صديقي ..إنه كان في منطقه مقطوعه ..فأضطر حفاظا على سلامته وسلامه أبناءه إنه يتلف المحرك كله ..يعني الجزء اللي أنا حاطه عشان يحافظ على عمر المحرك .زي ما هو منتشر هنا في مصر إن ثرموستات الكوع بتطيل عمر المحرك ..الجزء اللي أنا حاطه عشان يطيل عمر المحرك ..هو نفسه الجزء اللي أنا أتلفت المحرك كله عشانه ..يمكن ثرموستات الكوع كانت بدأت تتلف ..لكن يمكن برضه إن عشان العرض بتاع بداية التلف يبان كانت العربيه محتاجه إنها تتحط تحت ظرف معين ..زي زحمه شديده ..أو سرعه عاليه ..عشان يبان إن ثرموستات الكوع بدأت تخستع ..لكن حصل إن الراجل مخدش باله إن في مشكله مش ملحوظه في ثرموستات الكوع ..وإده الأمان ..ومشي بيها ..وجت عملت الدنيئه في موقف لا يحسد عليه .كانت النتيجه ..إنه هو اللي أتلف المحرك بإيده عشان يخرج من موقف زي كده ..متهيألي أنا لو في أي بلد أجنبي محترم ..أو في السعوديه مثلا ..مكنتش أخاف إن يحصل معايا موقف زي بتاع قفشة ثرموستات الكوع ..لإن لو حصل حاجه زي كده ..عادي جدا ..أي عربية إنقاذ هتيجي تاخد العربيه وعلى التوكيل عدل ..وده اللي حصل مع أخويا لما كان في السعوديه ..كان بيعدي تقاطع في وقت متأخر جدا بليل ..عربيه جات قامت هفاه ضيعتله الوش ..قام متصل بسيارة إنقاذ ..جت السيارة ..شالت السيارة على التوكيل ..دخلها الباركنج بتاع التوكيل وسجلها في الأمن ..وبيقولي راح الصبح لقي التوكيل عامل مقايسه ومنتظرين رأيه ..يبدأو شغل ولا لأ ..وطبعا سيارة ألإنقاذ جات ومعاها سيارة ليموزين عشان تقل أفراد أسرته لغاية البيت ..الليموزين وسيارة الإنقاذ تبع نفس الشركة ..

أنا معنديش مشكله فنيه مع ثرموستات الكوع ..أنا عندي مشكلة مع ظروف بلدنا ..