مشكله غريبه شويه فى الاكسنت 2015

**ahmedgamal2285** · 23-09-2014 05:31 PM

مساء الخير على كل الاعضاء الكرام
الحمد لله بتوفيق من ربنا ومساعده الناس فى نايل موتورز اشتريت هيونداى اكسنت 2015 تانى فئه
والحمد لله استلمت العربيه يوم الخميس اللى فات من معرض الطارق اللى فى مول العرب
العربيه كانت عامله حوالى 15 كيلو..ورحنا المرور ورخصت والحمد لله كله تمام
ورجعت من المرور ودخلت مركز بريدجستون اللى فى المهندسين وعملت الكاوتشات كلها نيتروجين وكله تمام
يعدها بيومين كنت راكن فى الجراج بتاع الشركه فى المهندسين وخلصت شغل ونزلت اجيب العربيه لقيت فى تحتها زى كيس بلاستيك كبير قولت مش مشكله يمكن كان على الارض وانا ماخدتش بالى
المهم مشيت وشويه لقيت واحد بيقولى فى كيس تحت العربيه..ركنت ولقيت الكيس متعلق من تحت رحت شدتيه ومشيت...بس مش ساعتها وانا باشم ريحه شياط فى العربيه
هى الريحه مش جامده ومش متواصله يعنى على فترات بس باحس بيها ومش عارف اعمل ايه.العربيه لسه عامله 200 كيلو وبافكر اروح التوكيل والا ده شىء عادى والا ممكن موضوع الكيس ده مايكونش السبب وتكون المشكله فى حاجه تانيه...
ارجوكوا يا جماعه اى حد عنده معلومه يقولها عشان انا ماعنديش خبرة فى موضوع العربيات خالص...

**shiko85** · 23-09-2014 05:46 PM

كيس عادى ؟؟
ممكن يكون جزء من الكيس جيه على الموتور او اى جزء معدنى اسفل العربيه و من السخونه ساح و كل ما العربيه تسخن هتشم ريحه الشياط دى

**Medo007** · 23-09-2014 05:57 PM

ممكن تغسل العربية من تحت في اي بنزينة , عندي شك يكون الكيس لزق فالشكمان من تحت وهو ده اللى عمل ريحة الشياط والله اعلم

**ahmedgamal2285** · 23-09-2014 05:58 PM

المشاركة الأصلية كتبت بواسطة shiko85

كيس عادى ؟؟
ممكن يكون جزء من الكيس جيه على الموتور او اى جزء معدنى اسفل العربيه و من السخونه ساح و كل ما العربيه تسخن هتشم ريحه الشياط دى

انا متشكر جداا لردك..هو كان كيس بلاستيك عادى بس كبير
طيب دلوقتى انت شايف ان دى حاجه عاديه وهاتروح مع الوقت والا فى حاجه المفروض اعملها؟

**shiko85** · 23-09-2014 06:20 PM

المشاركة الأصلية كتبت بواسطة ahmedgamal2285

انا متشكر جداا لردك..هو كان كيس بلاستيك عادى بس كبير
طيب دلوقتى انت شايف ان دى حاجه عاديه وهاتروح مع الوقت والا فى حاجه المفروض اعملها؟

العفو, الشكر لله و حده
المشكله ان مع السخونه الكيس هيسيح و بعد لما العربيه تبرد يرجع تانى ينشف و هكذا
و انت و حظك بقى
عموما الأفضل تروح بنزينه و تخلى العامل يشيل الكيس ده و تطمن ان مش اى حاجه تانيه هى اللى بتعمل ريحه الشياط دى لان ممكن لما كنت بتشد الكيس يكون كان ماسك فحاجه تانيه (خراطيم مثلا) ولما شديت الكيس قربت من الموتور