سائق مستهتر عايز الحرق

**مانويل مايكل** · 24-09-2014 05:17 PM

شوفت منظر مخلينى نفسيا زى الزفت.
راجع أنهاردة من شغلى مع زميلى فى عربية دايو . ولما دخلنا سوهاج جينا فى حتة زحمة شوية ويعتبر موقف الناس بتركب منة. كنت فى الكنبة الخلفية وجمبى أثنين زمايلى وقدام كمان طبعا كان فى زميل رابع لينا .
المهم اللى جنبى كانوا على اليمين ومحتاجين ينزلوا فهدينا وكان الرصيف على بعد حوالى متر ونصف من العربية . بيفتحوا الباب ويادوب نازلين . ليقنا عربية بيجو 7 راكب ورانا زى الصاروخ وأنحرفت لليمين بأقصى سرعة وطلعت على الرصيف العالى وخبطت فى عمود بالجنب وكمان شالت راجلين من على الأرض لدرجة انهم لفو مع العربية وأتحدفو على الأرض وخبطت فى حوض زرع اللى بيتعمل فى نصف الرصيف. لله الحمد وقفت .
طبعا الرجالة الأثنين مقاموش يادوب كانوا بيتحركو (وكانوا على الرصيف ) ناس طلبت الأسعاف وناس طلبت النجدة . وربنا يستر عليهم ويعيشوا لأن كانت خبطة موت .
المهم البارد اللى سايق ينزل يقول الفرامل سيبت وبيصرخ من الخضة والعربية كابوتها كان بيدخن.
هى الفرامل سيبت تعفيك من المسئولية . يا شعب عايز الحرق مبتعملش لية صيانة ولا تكشف على العربية .
هو همك تلم فلوس بالمخروبة وخلاص. أرواح مركبها وأرواح على الأرض . ذنبها أية .
عليم الله لولا حوض الزرع لو كانت العربية كملت كانت حتهرس على الأقل 10 أو 15 منتظرين عربيات يروحوا
ملحوظة اللى جمبى لو كانوا نزلوا قبل الحادثة دى بعشرة ثوانى كانوا زمانهم تحت العربية .

**فادى محمد** · 24-09-2014 05:51 PM

حمد الله علي سلامتك وسلامه زمايلك..
ناس مستهتره بارواح الناس .
استحملني ..
عنوان الموضوع يعني .ماينفعش تجمع الشعب
اللي انت وانا وناس كتير محترمه منه..
ممكن تقول ( سواق عاوز الحرق ) انما شعب ,ماينفعش
اشكرك علي سعه صدرك . تحياتي

**مانويل مايكل** · 24-09-2014 06:13 PM

المشاركة الأصلية كتبت بواسطة فادى محمد

حمد الله علي سلامتك وسلامه زمايلك..
ناس مستهتره بارواح الناس .
استحملني ..
عنوان الموضوع يعني .ماينفعش تجمع الشعب
اللي انت وانا وناس كتير محترمه منه..
ممكن تقول ( سواق عاوز الحرق ) انما شعب ,ماينفعش
اشكرك علي سعه صدرك . تحياتي

متفق جدا مع حضرتك . وانا أسف للجميع. لكن منظر الراجلين اللى اتمتدوا على الأرض وكانوا واقفين على الرصيف . حاجة بشعة . مخلى نفسيتى بجد سيئة كان ممكن أكون أنا أو طفل او أم أو أو .........
متأسف.

**MaZaGAngeE** · 24-09-2014 06:14 PM

الشعب كله كان سايق البيجو ولا سواق مستهتر ?
العنوان مش مظبوط خالص اطلب من الاشراف التعديل

**J A G U A R** · 24-09-2014 06:16 PM

ده الواحد بيشوف خرابات ماشيه على السكك مش عربيات
حمد لله على السلامه

ويا ريت الادراه تعدل العنوان

**مانويل مايكل** · 24-09-2014 06:26 PM

المشاركة الأصلية كتبت بواسطة mazagangee

الشعب كله كان سايق البيجو ولا سواق مستهتر ?
العنوان مش مظبوط خالص اطلب من الاشراف التعديل

متأسف مرة تانية. بجد معرفش أعدل عنوان الموضوع.
لكن بينا وبين بعض نسبة كام الى كام عندة مسئولية بتقابلهم فى حياتك . أنا معايا عربية لكن بجد بقيت محتار مش عارف أركبها وسط غيلان الميكروباصات والأستهتار . ولا أمشى حتى على رجلى طبعا لو معاك ستات مش حتخلص . ولا تركب تاكسيات والسواق كمان يبص على اللى معاك . وطبعا المواصلات العامة منحكيش عنها.
طبعا بفضل عربيتى وأقول ربنا يستر. يعنى كانت العربية مكملتش ألف كيلو وميكروباص بيعدى منى . (عربية ترامكو). تخيل بيعدى والصبى بتاعة فاتح الباب فطيرلى المرايا.
متأسف لكل المحترمين اللى لو الواحد لقى أو عرف حد منهم يمسك فية بأيدة وسنانة(عملة نادرة)

**ramymechanics** · 25-09-2014 07:11 AM

على فكرة انا متفق مع عنوان الموضوع لأن اللى بنشوفه من سلوكيات 85% على الأقل من الناس يستاهلوا الحرق عشانها فممكن نعدل العنوان ل شعب 85% منه عاوز الحرق

بتروح مصلحة بتلاقى 85% من الموظفين مرتشين
بتروح لتجار بتلاقى 85% منهم نصابين
بتلاقى الطلبة فى الشارع 85% منهم بيسبوا الدين و بيعاكسوا ويتحرشوا ببنات
85% من الشباب بقى نسخة من عبده موتة

فمتزعلوش واى كدة افضل اننا نواجه الحقيقة من اننا ندفن راسنا فى الرمل

**aymanshebl** · 25-09-2014 09:49 AM

هى مش 85% هى بطريقة ما او اخرى 99%

-

الموضوع: سائق مستهتر عايز الحرق

LinkBack

أدوات الموضوع

عرض

-

-

-

المواضيع المتشابهه

موت 4 بسبب توك توك مستهتر

حسبى الله ونعم الوكيل فى كل إنسان مستهتر (عاوز أفضفض معاكم تسموحوا لى)

الحرق على r.p.m

العربيه أتخبطت عند كوبري المنصورة من شباب مستهتر

الكلمات الدلالية لهذا الموضوع

المفضلات

المفضلات

ضوابط المشاركة