الموضوع: محتاج مشورتكم ضروري أركب زجاج أمامي صيني ولا جريش للفانتازيا

ألف شكر ياجماعة على ردردكوا وإن شاء الله حركب جريش بس حروح فرع العاشر لإني مش مستريح لفرع شارع دمشق حاسسهم بيتلصقوا
وحجرب وأنا طالع من عنده إن سنسور المطر شغال كويس وحتأكد برضه من قاعده المرايه إللي حضراتكوا ذكرتوها

بس إيه تعليقكوا ياجماعة إنه في التركيب مابيشلش طبقة السيكون القديمة كلها بيقشرها بس ، مش ده غلط ،للأسف محلات الإزاز إللي شفتها كلها بتركب بنفس الطريقة

وإللي قلقني من جريش الحتة إللي حقتبسها دي وكان الموضوع من ٢٠١٢ صراحة كلامه كان محبط جدا
مع إني مجرب عندي جريش في الشاهين كنت مركبه ب ٩٠ جنيه بصراحه ممتاز جدا ومحستش منه بأي مشكله
وسقت النيو صني كتيير إللي مزودة بإزاز جريش برضه محستش إنه إزاز وحش حسيته عادي جدا

بقالي فرة كبيرة قاعد عاوز أغير البرفريز الامامي
بس كنت محتار أغيروا ولا ماأغيرهوش بالذات اني عندي كام خربوش كدة في الحته الي قدام السواق بسبب منهم لله السياس الي بيمسح القزاز بحته وسخه ومسنفرلي القزاز وباينة السنفرة والخرابيش
بس الحقيقة كنت مستخسر القزاز بتاع عربيتي باالذات انو الاصلي بتاع الفبريكة
الحقيقة يوم قلت لمراتي اني عاوز اغيروا قالت لي ليييييييه وحرام ماهو شغال اهو وزي الفل
قلتلها لاياستي انا كل ما اشوف القزاز قدامي وهو متجرح كدة بحس ان العربية كلها قديمة ومشخرمة المهم قالت لي لأ متغيرهوش ومش ناقصنا مصاريف
قلتلها حاضر وهاودتها .... ولمن سئلت الشباب هنا في المنتدى وكعادة بعض الشباب
لازم يسمعوك قصيدة شعر في اي حاجة والسلام ... وفعلاً سمعت قصيدة شعر في دكتور جريش
ماعدى اتنين نصحوني اني ما اركبهووش وقالوا رأيهم بأمانه ياريتني سمعت كلامهم
ده حتى زمايلي في الشغل ماقلوليش قصيدة شعر في دكتور جريش لا لا دول سمعوني موااال و غنولي اغنية لاحمد عدوية في دكتور جريش ... ومنهم الي وراني عربيتوا النيسان صني مكتوب عليها دكتور جريش وبيقول ده بتاع الفبريكة .... وحتى الهونداي الفيرنا تلاقي مكتوب على القزاز بتعها دكتور جريش ... غبور

لاحظت تفاوت في أسعار الزجاج بتاع اليارس
في التوكيل ب ٢٢٢٥
عند العالمية ب ١٢٥٠
عند عرفة جابر ب ٨٥٠
عند امان او دكتور جريش ب ٣٥٠ جنية
وعند dok ب ٤٥٠ جنية

بس بعد قصيدة الشعر الي سمعتها قلت اروح اركبوو وبالفعل تم التركيب في شارع دمشق عند الفرع بتاع دكتور قريش




الفرق بين الزجاج الاصلي وبين دكتور قريش[/center]


١- بعد تركيب الزجاج الاصلي لاحظت فرق واضح وجلي في اللون رغم ان دكتور جريش مخضر بس ياراجل فرق السما عن العما ... التاني الاصلي أخضر آخضر التاني الرئية فيه تحس انك قدامك الشارع على طووول زو كأنك حاطط كرسي في الشارع ... بخلاف الاصلي الي بيديك عمــــــق كدة واحساس بنعومة الطريق وفخامة العربية .

٢- قزاز دكتور قريش من النوع الي بيشبر بسرعه ... مش عارف ازاي اشرحهالكم الحكاية دي ... بس عارفين
لمن تبقى قافل الشباك وقافل العربيه وقاعد فيها شوية وتلاقي القزاز شبر كده ... اهو نفس الحكاية محتاج كل يوم مسحه من بره ومسحه من جوا بخلاف الزجاج الاصلي بتمسحوا مره كل اسبوع من جوا .

٣- وانتا ماشي الصبح بدري ورايح الشغل او ماشي بعربيتك ساعت العصرية والشمس جيه او طالعه في وشك .... بصيت لقيت وشي بيحرقني حسيت بلسعت الشمس ... ولاول مره بقيت استخدم الشمسات الامامية ... بس برضو الحته الي تحت الشنب كدة لحد رقبتك لسعه من الشمس حتى لو مشغل التكييف .

٤- حتى سخونة التابلوة قدامك تحس ان التابلوة ابتدى يسخن بخلاف لمن كان قزاز العربية الاصلي فيها كان في الصيف بس تحس بيه .

طرف القزاز من الزوايا الزويا اليمين و الشمال فوق تحس انها مشطوفه شطف بخلاف الزجاج الاصلي الي تلاقيه بمومبااااااي كدة ومؤلوظ و تحس ان الزجاج الاصلي مش جي لوح كدة كأنوا خشبة لأ تحسوا كآنوا جي بشكل كروي أو نص دايرة الشكل البومباي بتاع القزاز هتفتقدوا في دكتور جريش وأحساسك بالعمق والرفاهية الي بتوفرها ركوبت تويوتا عن باقي السيارات .
ده غير يا أخي بجد فرق فرق بين الاصلي بتاع الفبريكة وبين قزازه الحاجة سقعه الي اسمها دكتور جريش بس كل شيء على قد تمنها يعني شوف الاصلي ب ٢٢٢٥ جنية ودكتور جريش ب ٣٥٠ جنية

في الأخيرررر وبعد تركيب لم يدوم أكتر من أسبوع واحد بس أظاهر العربية الي كانت ماشية قدامي على المحور ... كان محشور في كوتشها زلطة او نوات بلح ومع السرعه طارة الزلاطاية على البرفريز الجديد طبعاً انا سمعت صووت تااااااااااااك في القزاز الامامي بس كملت عادي ومشيت النهردة ببص عليها لقيت القزاز أتخرم ههههههههههههههههه كان رصاصة اضربت في قزاز مانع للرصاص عارفين الحفرة الي بتعملها في القزاز اهي الحفرة دي عندي .... وياعالم بكرة هشوفها تسرح ولا هيحصلها أيه ...

وطبعاً مسلمتش من شماتت أم العيال وهيا بتقولي : شووووووووووفت قلتلك خلي القزاز الاصلي بتعها وانتا مابتسمعش الكلام وتقلي تجاريح وخرابيش وبرضوا نفذت الي في راسك ورحت من ورايا وشلت القزاز القديم وركبت واحد ميسواش تلاته تعريفه .... نفسي مرررره وحدة تسمع كلامي ....والي بيسمع كلامي بيكسب .... ادي القزاز الجديد اهو اتخرم وبكرة يتشرخ ويسرح كدة كدة لحد ما تشوفش منو خالص ... وانا اقولها ياستي اهمدي ده كلو تمنوا ٣٥٠ جنية هجيب غيروا .... وهيا مفيش فايدة وتقولي ما انتا هتجيب واحد تاني وبرضوا هيتكسر مالو بس القزاز الاصلي الي كان فيها ...

ياريتني ما كنت شيلت الاصلي الي كان فيها
لذلك حبيت انقل تجربتي مع قزاز دكتور جريش واقول ده متركبهوش غير في حالة وحدة فقط
لوقزاز عربيتك اتكسر ومتطر تركب حاجة تمشي الحال لانك مفلس ركب دكتور جريش في تويوتا
بس أول ماربنا يكرمك ركب الاصلىىىىىىىىىىىي وبلاش استخسار

وتحياتي ....