هوندا سيفيك 2008 مستعمل والنترا 2015 زيرو

**kh_yn** · 27-09-2014 11:05 AM

انا يا شباب محتار زيكم
انا مش عايز المقارنه تاخد شق واحد انا هتكلم على كذا نقطه ارجو انها تكون فى الاعتبار

المقارنه بين هوندا سيفيك 2009 فابريكه ولكن بها خرابيش فى الاكصدام ماشيه 86000 كيلو مطلوب 130000 جنيه
لونها بنى محمر كدا مش عاجبنى دا اولا
ثانيا انا شوفت كذا هوندا فابريكه وبها عيوب بالدهان يعنى تحس ان الدهان كدا زى ما يكون بيتمسح من الشمس والمشكله دى شوفتها فى كذا سقف عربيه
ثالثا ان العربيه واطيه ورشت عتب عشان هى واطيه على الارض والمطبات فى مصر حدث ولا حرج
رابعا طبعا مفيش فتحه سقف ومفيش كماليات
خامسا طبعا مفيش ضمان
سادسا انا شايف انها غاليه بالنسبه لانها 2009
سابعا سعر اعاده البيع مثلا بعد ما تكسر ال 200 الف هيبقى عامل ازاى مش عارف ؟
ثامنا مفهاش فتحه سقف
تاسعا هوندا بدأت تتغابى فى التصميم الخارجى للعربيه من اول موديل 2012 وانت طالع
عاشرا قطع غيارها غاليه

طبعا انا عارف ان الهوندا يابانى وكل حاجه بس انا بقارن زيرو بمستعمل حاليا والدهان بردو انا قلقان منه لانى شوفت الحكايه دى يمكن فى 6 عربيات فى معارض

وبين انى اجيب النترا 2015 زيرو فتحه سقف الفئه التانيه 153000
اولا عربيه زيرو
ثانيا شكلها جديد ونازله بألوان رائعه
ثالثا قطع غيارها فى السوبر ماركت
رابعا فى الضمان يعنى لو حصل عيب فى الدهان او عيب فى الصناعه هيغيروهالى
خامسا فيها فتحه سقف
سادسا محدش اشتكى منها كمكنه او فتيس لحد الوقتى
سابعا يمكن دهانها بيأشر احيانا من الخبط والحك بس مشوفتش حاجه بتتأثر بالشمس يعنى ولونها بيروح خصوصا السقف يعنى وحتى لو حصل فانا كدا كدا فى الضمان
ثامنا عربيه بياعه يعنى منتشره فى السوق واظن انها ماسكه سعر
ثامنا الكماليات ومحدش لمسها قبلى
تاسعا قطع غيارها رخيصه وفى الضمان
عاشرا هى اعلى من الهوندا على الارض واطول واهئ
انا عارف انها لما بتقع شويه بس فى الغالب يعنى هتبقى اعلى من الهوندا على المطبات الهباب دى

يعيبها على حد ما شوفت اراء بعض الناس عيبها انها كورى يعنى مبتستحملش اوى زى الهوندا
يعنى يقال ان الهوندا ماكنه وفتيس معاك لحد 250 الف كيلو مش هتقولك انت مين
الالنترا يقال انها لحد 150 الف وممكن تبدأ تتكلم بعدها

الهوندا صالونها خامته افضل والالنترا معموله من خامات اقل جوده

انا دا الى قدرت استنتجه من وجهه نظرى

انا بس محتاج من الشباب انهم ياخدو كل الاعتبارات دى قبل ما حد يقول كورى ويابانى وكدا

مع العلم استعمال العربيه هيبقى عائلى يعنى انا وزوجتى بس الى لسه هتزوجها قريبا :d
استعمالها فى الغالب داخل البلد يعنى لو هسافر مثلا هيبقى مره ولا مرتين فى الشهر

لو فى حاجه انا مش شايفها ياريت حد يقولى ؟ وياريت لو تقولولى اجيب ايه فيهم فى اسرع وقت الله يبارك لكم

**ahmad--ezzat** · 27-09-2014 11:09 AM

طبعا النترا… .بدون تفكييير

**kh_yn** · 27-09-2014 11:22 AM

المشاركة الأصلية كتبت بواسطة ahmad--ezzat

طبعا النترا… .بدون تفكييير

جزاك الله بشمهندس احمد على الرد ولو انى خايف من سعر اعاده البيع بس انا متحمس اكتر لرأيك

**ENG.MaRk** · 27-09-2014 12:22 PM

بص يا باشا مفيش حد يسيب الزيرو و يروح للمستعمل ...ديه أول نقطة ...ثانيا بقي الالنترا عربية جميلة جدا و حلوة جدا و موتور و فتيس جامدين جدا و أنا في رأيي لو تقلوها شوية و بقت أثبت علي الطريق هتبقي من أفضل العربيات في فئتها ... بصراحة العقل و المنطق يقول النترا عشان هي موديل السنة مش من 6 سنين حتي و لو فابريقة ...كماليات كتيرة و جميلة و علو عن الأرض أكتر من السيفيك و عفشة أنعم و عربية أوسع و دلوقتي علي فكرة مابقاش في حاجة اسمها كوري أو ياباني و اللي يتكلم في الموضوع ده تاني يبقي لا مؤخذة حافظ مش فاهم !!!
بصراحة ال153000 دول يجيبولك كروز 2015 هاي لاين زيرو و هي بقي أسترا بالظبط بس كوري بدلا من بولندي !!!
مادام مش هتسافر بيها كتير يبقي أكيد ال150000 كم دول هتبقي غيرت أو زهقت من العربية و علي فكرة مفيش مقياس لموضوع الاعتمادية ده طول ما حضرتك بتعمل الصيانات الدورية في مواعيدها هتبقي تمام و علي فكرة أنا ركبت تاكسي النترا قبل كدة (2010) و كان عامل 322 ألف كم و كان ماشي زي الفل ... ماتقلقش و توكل علي الله و اشتريها بس فكر في الكروز برضه

**kh_yn** · 27-09-2014 12:32 PM

المشاركة الأصلية كتبت بواسطة eng.mark

بص يا باشا مفيش حد يسيب الزيرو و يروح للمستعمل ...ديه أول نقطة ...ثانيا بقي الالنترا عربية جميلة جدا و حلوة جدا و موتور و فتيس جامدين جدا و أنا في رأيي لو تقلوها شوية و بقت أثبت علي الطريق هتبقي من أفضل العربيات في فئتها ... بصراحة العقل و المنطق يقول النترا عشان هي موديل السنة مش من 6 سنين حتي و لو فابريقة ...كماليات كتيرة و جميلة و علو عن الأرض أكتر من السيفيك و عفشة أنعم و عربية أوسع و دلوقتي علي فكرة مابقاش في حاجة اسمها كوري أو ياباني و اللي يتكلم في الموضوع ده تاني يبقي لا مؤخذة حافظ مش فاهم !!!
بصراحة ال153000 دول يجيبولك كروز 2015 هاي لاين زيرو و هي بقي أسترا بالظبط بس كوري بدلا من بولندي !!!
مادام مش هتسافر بيها كتير يبقي أكيد ال150000 كم دول هتبقي غيرت أو زهقت من العربية و علي فكرة مفيش مقياس لموضوع الاعتمادية ده طول ما حضرتك بتعمل الصيانات الدورية في مواعيدها هتبقي تمام و علي فكرة أنا ركبت تاكسي النترا قبل كدة (2010) و كان عامل 322 ألف كم و كان ماشي زي الفل ... ماتقلقش و توكل علي الله و اشتريها بس فكر في الكروز برضه

انا فكرت فى الكروز من زمان بس بيقال ان الكروز بعد ال 100 الف بتجيب فتيس فعشان كدا خوفت منها مع ان بيعجبنى شكلها وصالونها اظن انها كانت اخده احسن صالون فى 2010
ثانى حاجه نسبه مبيعات الالنترا اعلى واظن انها سعر اعاده البيع بتاعها افضل شويه
جزاك الله خير ياباشا :)

**Hunting_Eagle** · 27-09-2014 01:31 PM

اكيد الزيرو افضل

موديل السنة الجاية
اول واحد يركبها
هتبقى عارف كل مسمار فيها موجود فين
وفيها كل الكماليات اللي انت عايزها

و بعدين الفرق من الالنترا للسيفيك .. مش هو الفرق اللي يخليك تركب عربية موديل 5 سنين فاتت

اشتري الانترا احسن طبعا .. و لو قلقان من العربية انها ما تعمرش معاك .. اركبها 5 سنين و بعد كده بيعها ..

**S O P H O S** · 27-09-2014 02:13 PM

الهوندا جميلة بصراحة
بس الزيرو اضمن حتي لو اقل ويخليك تفكر كويس

**kh_yn** · 27-09-2014 04:12 PM

طب لو هشترى زيرو اشتريها من المصريه للسيارات انا سمعت انهم ممكن يقسطو لو القسط هيبقى سنه بس يبقى بدون فوايد ولا اجيبها من التوكيل احسن كاش وخلاص ؟

وهل فى عروض مثلا ممكن تقدمها المصريه للسيارات عن التوكيل ؟