الموضوع: أنواع زيت الفرامل و الفرق بينها

أكيد بنشوف أنواع زيت كتير في السوق و بنختار الزيت على أساس شكل العلبة اللي الناس بتشكر فيها (الألماني الأزرق....الخ)
بس قليلين بياخدوا بالهم من حاجة مهمة (DOT3) مثلاً
تعالو نعرف يعني ايه DOT أصلاً
DOT : Department of Transportation و المنظمة دي عاملة standard لزيت الفرامل
قبل ما نعرف الـ Standards دي ايه ،تعالوا نشوف هو ايه المطلوب أصلاً من زيت الفرامل علشان يؤدي وظيفته
1. انه يحافظ على سيولته في درجات الحرارة المنخفضة : مهو ده لأن الزيوت بوجه عام لما درجة حرارتها بتقل قوي بتبقى لزجة بدرجة يجعلها صعبة التحرك داخل الأنابيب زي العسل كده (فهتبقى الاستجابة بطيئة قوي).
2. درجة غليان منخفضة : ايه ده هو بيغلي كمان؟؟ أيوة بيغلي و يبقلل كمان.
3. ميقلش في كميته مع التبخر في درجات الحرارة العالية: آه و الله بيتبخر.... عشان كده اخوانا الجدعان اللي بيعملوا الـ Regulations بيختبروا مدى تبخر الزيت عند 100 درجة سيليزية و بيحسبوا المفقود من وزنه مئوياً.
4. يكون بيتخلط مع الزيوت التانية : و دي ليها حوار هنشوفه بعد شوية.
5. مقاوم للأكسدة: أبو آخر .... مش بتتغير خصائصة الكيميائية و ده المهم.
6. مش مؤذي للمطاط: و دي حاجة مهمة بالنسبة لمنظومة الفرامل بسبب ان الزيت ممكن يسحب الرطوبة بزيادة من المطاط ينشفه أو ساعات في أنواع زيوت بتسبب ان المطاط يحصله swelling ... أيوة يورم يعني.

طيب كده احنا عرفنا الخصائص اللي المفروض تكون موجودة... ايه الفرق بين DOT3 و DOT4 و غيرهم....

DOT 3

أرخص زيوت الفرامل و أكثرها امتصاصاً للرطوبة و أقلها في درجة الغليان
طيب و ايه المشكلة؟؟؟ لأ مشكلة.... الرطوبة معناها مية.... و مية مع أجزاء معدنية معناها صدأ. كمان بالاضافة لمشكة الصدأ؛ وجود كمية من المية مع الزيت اللي بيلامس أجزاء الفرامل (دون الخوض في تفاصيل) اللي بتوصل لدرجات عالية جداً هيؤدي لأن المية دي تغلي و تتبخر و يبقى في فقاعة بخار مياه في مسارات زيت الفرمل.... تدوس على الدواسة: بدل ما الزيت ينضغط برجلك يروح يضغط على الفرامل تلاقي الزيت بيضغط شوية بخار الميه اللي اتكون.
درجة غليانه دون امتصاص بخار ماء 205 درجة مئوية.
مذيب قوي للطلاء و صبغة الجلد... يعني ابعده عن حذاءك و دهان العربية.

DOT4

الشائع دلوقت وده درجة غليانه أعلى من اللي قبله و بيضاف عليه مواد تمنع تكون أحماض لما يمتص شئ من الرطوبة. برضه مذيب للطلاء و الصبغات. بيتخلط عادي خالص مع DOT3.
درجة غليانه دون امتصاص بخار ماء 230 درجة مئوية.
تكلفته مرتين قد الـ DOT3

DOT 5.1

مش هتشوفه كتير في مصر.
زيه زي الزيوت اللي فاتت بس درجة غليانه دون امتصاص بخار ماء 260 درجة مئوية و امتصاصه للرطوبة أقل بكتير و قابل للخلط مع الأنواع اللي فاتت.

DOT 5

اللي فات كله حمادة و ده حمادة تاني!!!
ده بقى silicone based ... من الآخر تكوينه الكيميائي مختلف كتير... طيب و استفدنا ايه؟؟.... الزيت ده مش بيمتص الرطوبة زي اللي فاتو ولا بيؤذي الدهان أو الصبغات.
طيب ماهو كده تمام و عز الطلب..... لأ برضه.... الزيت ده بيحتبس هوا.... هوا؟؟!!! أيوة بيحتبس الهوا بدل الرطوبة.... علشان كده مش بيستخدم في أي حاجة فيها ABS و كمان مينفعش يتخلط مع أي زيت تاني.
درجة غليانه 230 درجة مئوية.
تكلفته 4 مرات قد الـ DOT 3.
بيستخدم غالباً في النقل اللي على فرامل هيدروليكية مش هوا.

بكده نقدر نستنتج ان أفضل زيت هو الـ DOT 4 عن الباقيين لاستخداماتنا العادية.

و الله تعالى أعلى و أعلم.... يا رب نكون كلنا استفدنا
نسألكم الدعاء

المفروض ان dot 4 احسن من dot 3

بس لو الكتالوج كاتب use dot 3 only كده بالحرف يبقى ما ينفعش نستخدم dot 4 ؟؟؟ ممكن يكون فيه ضرر على اجزاء الفرامل ؟

مع العلم ان العربيه حديثة موديل ٢٠٠٩