الموضوع: عربيتي كانت هتموتني، والصنايعي ماعرفش يحلها!

السلام عليكم ورحمة الله
رغم ان عضويتي جديده الا انى متابع المنتدى من سنين.. وشكرا لكل واحد قرأت له موضوع واستفدت منه.
مش عارف ليه قررت اعمل عضوية اليومين دول بالذات .. المهم،

انا معايا حاليا اسبرانزا A516 وبحبها جدا لأنها تستاهل الحب.
وبينا فترة عشره طويله ومريحاني.. لكن من يومين كانت هتموتني مع سبق الإصرار والترصد!

العربية بقالها شهر ونص فيها عيب ( تنتيشة جامده لما يكون RPM اقل من 2 ) وبتزيد لو مشغل التكييف. واول ما RPM يوصل 2 العربية سحبها يبقى عالى جدا والتقطيع يختفى تماما.
مركز الصيانه اللى بتعامل معاه جيد جدا (مركز الشروق فى طنطا) ومحمد خضر صاحب المركز كشف بالكمبيوتر لقى حساس الكرنك بايظ.. وفعلا طلعه السلك مكشوف وبيعلق. غيره وغير موتور طلمبة البنزين. لكن التقطيع زي ماهو.. فقال لى العيب فى مكينة الاستوب.

طلب منى اروح لكهربائى التوكيل وروحتله فعلا فى ورشته وقالى فى الغالب مكنة الاستوب سليمه هى بوجيهات او حساس دبرياج .

غيرلي البوجيهات ببوجيهات ياباني وضبط حساس الدبرياج.. البوجيهات غيرت اداء العربية تماما لدرجة ان التنتيشة ساعتها قلت بنسبة 80% والتكييف ماعدش بيفرق قوي. لكن انا جربت السيارة فى شارع مأهول بالسكان ومكسر فمقرصتش على العربية كويس. ولما كنت بقرص كان بيبقى فى تنتيشه خفيفه بتروح بسرعه وهو قالى ده مش عيب فى العربية هى كده تمام ( انا ماقتنعتش بس قولت هجرب على الطريق)

مشيت من عنده ومشيت كويس او تقدر تقول فرق اداء البوجيهات نساني عيب التنتيشه خصوصا انى ماقرصتش على الغيار التاني خالص.

من يومين وانا رايح الشغل باخد U turn على طريق سريع وخطر شويه.. العربية عملتها معايا!!!
تنتيش جامد جدا وصوت الموتور اتكتم.. انا كنت على التاني وبدوس بنزين عشان الف بسرعه.. والعربية مش عاوزه تتحرك وتقريبا بتقف!! طبعا اللى جايين مسرعين جدا وكان بيني وبين الموت اجزاء من الثانية.
لكن ربنا ألهمني ودوست دبرياج بسرعه ( فصوت الموتور على جد ) اول ماسبت دبرياج تانى العربية طارت من مكانها وفلت من موت مؤكد اللى جاي عدى من ورا ضهر العربية بالعافية!
كل اللى كانوا بيعدو اليو تيرن ورايا لما شافوا العربية بتقطع كلهم اتخضوا ووقفوا مكانهم ماعدوش! وكله توقع انى هتخبط!
الحمد لله ربنا ستر.. لكن من ساعتها وانا مرعوب من العربية خصوصا انى كلمت الكهربائي والميكانيكي وواضح انهم مش متأكيد العيب فين اصلا!! ويظهر كده هنقضيها تجارب!
انا خايف يكون كمبيوتر مثلا!!

العربية باختصار بتنتش جامد جدا تحت RPM 2 على كل الغيارات خصوصا التاني ومع الدوسه الجامده شوية.. وكمان لو مانتشتش فهى خشنه جدا فى الطلعه او بين الغيارات. يعني اول ماتدوس بنزين تحس انها بتقفذ او كانك مركب موتور 4000 سي سي على عربية 127!.. ولما اخف رجلى من على دواسة البنزين برضو تحس كأنك دوست فرامل مثلا!
علما ان الديسك والاسطوانه جداد، سير الكتينه جديد، البوجيهات جديدة ياباني، حساس كرنك موتور طلمبة بنزين جداد كوري. الكمبيوتر مش قاري اي اعطال! علبة الفيوز سليمه والبطارية جديدة من شهر الموتور ممتاز ومعموله نص عمره من 3 شهور.... طيب ايه؟؟؟؟

انا كان عندي مشكله شبيهه باللي عندك جربت كل حاجه(البوجيهات- سلوك البوجيهات-بلف السايكون- سير الكاتينه -تنظيف علبة البيئة -حساس دواسة الدبرياج -حساس دواسة الفرامل اللي بيقولوا عليه ماكينة الاستوب - فلتر البنزين ب ) ولا اي حاجة من دول كانت السبب واكلم ميكانيكي يقول هاتهالي وانا عندي الحل و اللي يقولي طلمبة البنزين ولكن سبحان الهادي خلعت فيشه حساس الشكمان او حساس الاكسوجين لقيت العربية بقت 100 100 ومشيت بيها اسبوع من غير حساس شكمان حوالي 350 كم العربية ولا كلمة بس استهلاك بنزين عالي جدا المهم حاولت تنظيفه ولكن دون جدوي غيرته ب 200 جنيه ومن يومها العربية تمام وزي الفل .
دي تجربتي مع سيارتي ايه 113
لو عايز تشوف الموضوع ده عندك مجرد شيل فيشه حساس الشكمان وجرب العربية وابقي طمني .