الموضوع: تجربتي مع تغيير مقص شمال وعمل زرجينه لا كانت على البال ولا على الخاطر

العربية سوزوكي التو 2008 ..شاريها من سنه وشهر بالضبط
من يوم ما إشتريتها وهي فيها حدفه شمال مش عايزه تروح ..والغريب إني كنت لما بربط عفشه الحدفه تروح ..وأهو ..كنت ماشي على كده وخلاص ..الناس تروح تضبط زوايا عشان العربيه بتحدف ..أنا بقى كنت بروح أربط عفشه عشان العربيه بتحدف ..وشهر والتاني ..وترجع تحدف تاني ..لغاااااية ما وصلت لدرجه إن هي خلفت في الطاره كمان ..يعني الطاره مبقتش في النص لما تبقى العربيه ماشيه في خط مستقيم ..لحد هنا ..وقلت لأ ..كفايه بقى ..أنا عايز أعرف فيه إيه بالضبط ..طبعا سبعين أو تمانين في المايه من العفشجيه اللي في البلد ..أصلا أصلا ..مش عفشجيه ..دول كانوا أصلا سمكريه ودخلوا موضوع العفشجيه ده عفيجه ..أو دخلوه بالدراع ..وده طبعا إكتشفتوا لما لفيت على حدادين عفشه كتيييييير طول السنه اللي كانت العربيه فيها الحدفه دي ..وكله على كلمه واحده ..العربيه مفيهاش حاجه العربيه مفيهاش حاجه ..
ليا واحد حبيبي مهندس شغال في شركة خدمات سيارات ..شركه بتبيع كاوتش وبطاريات وبتضبط زوايا وما إلى ذلك ..وبيقدموا خدماتهم من خلال محطات البنزين ..بإنهم يأجروا الأماكن المخصصه للخدمات دي من محطات البنزين ويقدموا الخدمات بتاعتهم ..كلمت صاحبي ده وقلتله أنا عايز أجيلك عشان عايز أكشف على العفشه كشف علمي ودقيق ..قالي عينيا ..رحتله محطة البنزين اللي فاتحين من خلالها مركز الخدمه بتاعهم ورفعوا العربيه على الكوريك وإتكشف على العربيه كشف أول مره أشوف حد بيعملوا ..العربيه إترفعت على الكوريك من خلال رفعها من العتب ..وبعدين واحد ينزل تحت العربيه ..ويحرك أجزاء العفشه تحريك بسيط وينصت بالسمع ومعاه كشاف ليزر بيبص على كل حزء بيتحرك ..بيشوف لو فيه بوش أو فيه حاجه بتتحرك أكتر من اللازم ..وبعد الكشف اللي إستغرق تقريبا عشر دقائق ..قالي ..باشمهندس ..عندك مقص شمال ..طبعا اللي شغالين هناك كلهم شباب وشكلهم نضيف بما فيهم رئيس الورديه بتاعهم اللي بيكون مهندس ..والفنيين اللي شغالين فاهمين كل حاجه وظيفتها إيه في العفشه وده كان من خلال دردشتي معاهم في الكلام ..المهم قلتله طيب مش ممكن تضبط على كده ..قالي لأ طبعا ..أنا ممكن أضبطلك زوايا على كده وألهف الخمسين جنيه ..ويومين وترجع تخلف معاك زوايا تاني ..فلازم تعمل الشغل اللي فيها الأول ..عشان نضبط صح ..المهم رحت جبت مقص ..بخمسه وتمانين جنيه ..المفروض إنه هندي أصلي ..وجبت طقم كاوتش عفشه بستين جنيه ..طبعا أنا مكنتش عاوز الكاوتش ده كله ..لإن الطقم 8 قطع ..أنا كل اللي كنت عاوزه أربع قطع ..لكن التاجر اللي إشتريت منه قالي ده طقم على بعضه ..مش بيتباع غير كده ..ورحت على حداد العفشه غير المقص ..وكله تمام ..رجعت عشان أضبط زوايا ..تم رفع العربيه على الكوريك ..وتم فحصها تاني .. وبعد وضع مجسات الكمبيوتر على الجنط ..طلع في التقرير بتاع الكمبيوتر ..إن العجله الشمال ..اللي تم تغيير المقص فيها ..مأخره 1.98 سم ..طبعا الفني بتاع ضبط الزوايا قالي إرجع للعفشجي عشان يقدم العجله المأخره ..قلتله مينفعش تعملها هنا ..ده إنت هنا معاك الكمبيوتر والضبط كله ..قالي لأ ..دي شغلة عفشجي ..قلتله طيب وهو هيعرف منين إن هي ضبطت كده زي ما إنت عايزها ..قالي مكتوب أهو في تقرير الكمبيوتر اللي معاك إن العجله الشمال محتاجه تقديم 2 سم ..المهم رجعت للعفجشي ..وقلتله ..قالي خلي بالك تأخير العجله ده مش من الشغل اللي أنا عمله ..تأخير العجله ده بسبب إن العربيه دي كانت واخده خبطه قديمه كانت مرحله العجل ..المهم جاب زرجينه ..وقام حاططها ما بين العتبه وما بين نص المقص ..وبالضبط كده من عند نهاية الميزان ما داخل في المقص ..وقعد يلف ..ويلف ..ويلف ..لغاية ما سمعت صوت طقه عفيه حصلت في الصاج بتاع العربيه ..قام مريح الميزان بتاع العربيه من قدام لإن طبعا طلوع العجله قدام ضغط على الميزان ..فإضطر إنه يهوي شويه القفيز بتاع كاوتشة الميزان من قدام ويريح الميزان وقام سايبها بتاع عشر دقائق كده ..سايب الزرجينه على وضعها بتاع عشر دقائق ..وبعدين قام فاككها ..وطبعا لهف خمسين جنيه في الشغلانه دي ..وقالي إن الزرجينه دي بيتاخد فيها أصلا سبعين جنيه ..بس هو هياخد خمسين عشان ده شغل داخل في شغل ..وطبعا قبل ما يقفل قاس ما بين الأكس وما بين العتبه ووراني إن الناحيه اليمين شبه الشمال في الأبعاد ..قمت راجع لبتاع الزوايا ..قام رافع على الكوريك وضبط وربط وقاس وكله بقى تمام التمام ..
المهم وأنا عند بتاع الزوايا بقوله ده العفشجي بيقولي إن سبب ترحيل العجله لورا إن العربيه دي كانت واخده خبطه ..وإن ترحيل العجله ده مش منه ..مش من العفشجي ..فبتاع الزوايا قالي ..هو المفروض أي عفشجي بعد ما بيركب المقص يتأكد إن العجل مش مرحل ..وإن هو قصاد بعض تمام ..وإن رجوعك ليه ..رجوعي للعفشجي ..يعتبر تقصير من العفشجي في شغله ..وإن ترحيل العجل لورا وارد جدا بسبب مطب أو خبطه أو مع المشي العنيف في المطبات

طبعا العربيه طلعت بعد القصه دي حاجه تانيه خالص ..العربيه بسم الله ما شاء الله ..ما بقاش فيها أي حدف ..بإستثناء حاجه بسيطه قوي ومتهيألي إن هي بسبب الطريق بيبقى مايل شويه ..لكن على السرعات العاليه وفي المشي العادي مفيهاش أي حدفه الله أكبر..كان فيه غربله في الطاره بعد التمانين ..دي برضه الحمدلله راحت ..متهيألي ..وأنا بقول إن ده إيحاء نفسي..متهيألي إن السحب بقى أفضل على السرعات ما بين التاني والتالت وما بين التالت والرابع ..

المقص عمل 85 جنيه
طقم الكاوتش 60 جنيه ما إستخدمتش منهم غير أربع كاوتشات ..إتنين لكل مقص ..وفيه جلبتين بالإضافه لكاوتشتين الميزان الأماميتين دول شلتهم معايا لما أحتاجهم
مصنعيه العفشجي 100 جنيه في المرتين ..خد 60 جنيه عشان يغير المقص بالإضافه لتغيير كاوتش المقص اليمين عشان كان رايح في داهيه
ضبط زوايا 50 جنيه

والحمدلله على كل حال

المشاركة الأصلية كتبت بواسطة m_m_sh_a

في بنزينة موبيل اللي في سموحه جنب مركز خدمة عملاء موبينيل ..الشركه اللي مأجره أماكن الخدمات من البنزينه إسمها ناسيتا

أنا مش عارف دي كده تعتبر دعايه ولا عادي ..

طيب العفشجى فين واسمه ايه

Sent from my samsung GT-I9152 using Forum Runner