الفا روميو جوليتا vs بي ام 316 سبورت

**zegna** · 05-10-2014 04:52 AM

طبعا انتو عارفين ان الفا روميو نزلت مصر خلاص منزلة عربية هاتشباك اسمها جوليتا ب اربع فئات بس انا بقارن باعلي فئة اللي هيا ب 325 الف فيها جنط 18 وفرش جلد و سقف بانورما وطبعا موتور 170 حصان وايطالي مية في المية

الناحية التانية البي ام 316 سبورت عاملة 356 الف صحيح مفهاش الاوبشن اللي في الجوليتا بس هتبقي اختيار امن شوية لاسباب كتير منها اعادة البيع ومعروفة ومتجربة ومراكز الصيانة وانتشارها

انتو شايفين اية انهي الاختيار الاحسن لو مكاني تجيبو اية ولو في حجات انتو شايفنها تانية ياريت تقولولي عليها

**Hunting_Eagle** · 05-10-2014 03:53 PM

مع أن الجوليتا عربية لا غبار عليها

بس أنا رأيي لو اخترت الجوليتا هتبقى بتضع البيض كله في سلة واحدة زي ما بيقولوا

يعني اختيار الجوليتا هيبقى فقط لأجل الأداء الرياضي

انما ال 316 هتحققلك اكتر من ميزة .. أداء رياضي محترم .. راحة البال لأنها متجربة و معروفة و وكيلها محترم .. اعادة بيع .. شياكة .. ده غير انها عملية أكتر كونها عربية سيدان و أوسع و ليها شنطة أكبر

أنا شايف ان الرينج من 250 لحد 350 .. مفيش غير عربيتين يستحقوا الشراء .. ال 508 و ال 316

ده فيديو عن الجوليتا ال 1.4 في السعودية

[youtube]http://www.youtube.com/watch?v=AHx4c_QGrtk[/youtube]

بالتوفيق

**Batman372** · 05-10-2014 06:28 PM

نفسى اقولك الالفا روميو :) تحفه !!!

لكنك بكده بترمى ٣٢٥ الف على الارض ... لان اعاده البيع ضايعه و حتخسرك كتييييير !!!
و طبعا الله و اعلم بالتوكيل و قطع الغيار ..... الخ

خليك فى ال 316 اضمن ...

تحياتى ...

**zegna** · 06-10-2014 03:07 AM

المشاركة الأصلية كتبت بواسطة batman372

نفسى اقولك الالفا روميو :) تحفه !!!

لكنك بكده بترمى ٣٢٥ الف على الارض ... لان اعاده البيع ضايعه و حتخسرك كتييييير !!!
و طبعا الله و اعلم بالتوكيل و قطع الغيار ..... الخ

خليك فى ال 316 اضمن ...

تحياتى ...

للدرجة دي الالفا روميو ملهاش مستقبل في مصر ولا هيبقي لها حتي؟هما دلوقتي فاتحين مركز خدمة واحد هل هيبقي كفاية وهيغطي والقطع الغيار الموجودة للعربية كلها وطبعا مش هلاقلها مسمار برة التوكيل

**blazer** · 06-10-2014 03:15 AM

زى ما الاخوه قالو ليك هترمى فلوسك فى الارض ولو جيت تبيع بعد سنتين هتسمع 150 الف يمكن فى العربيه بسبب جهل السوق

**svneleven** · 06-10-2014 04:21 AM

المشكلة أن التمن تقريبا واحد. و ال بي ام لا يستهان بأدائها و لا شكلها و لا اسمها و لا سمعتها. و عامة هتلاقي اداء ال بي ام (136 حصان) مقارب لل الفا (170 حصان).

**Batman372** · 06-10-2014 05:29 AM

المشاركة الأصلية كتبت بواسطة zegna

للدرجة دي الالفا روميو ملهاش مستقبل في مصر ولا هيبقي لها حتي؟هما دلوقتي فاتحين مركز خدمة واحد هل هيبقي كفاية وهيغطي والقطع الغيار الموجودة للعربية كلها وطبعا مش هلاقلها مسمار برة التوكيل

المستقبل فى علم الغيب ...
لكن ليس من السهل تسويق اى سياره سوقها ضعيف جدا ...
خصوصا لو بسعرها واقل ممكن تجيب حاجات كتير سوقها موجود و اكثر استقرار ..
تحياتى ...

**mhmd_farouq** · 06-10-2014 11:38 AM

الالفا روميو تحفه بس ما الاعضاء المحترمين قالو انت كده بترمي فلوسك في الارض، البي ام اضمن بكتييير، الالفا يوم ماتفكر تبيعها سوقها مش ماشي وهيبتدي معاك بنصف الثمن فا حراام، فكر جديا في ال٣١٦ او الفولفو اس٦٠ او كمل شويه وخش في البنز بقلب ميت، وبالتوفيق

**ENG.MaRk** · 06-10-2014 03:49 PM

مش عارف أقولك ايه بصراحة !!!
الاختيار بين العربيتين دول مش صعب ببساطة الإجابة (جوليانا) ...طبعا برة مصر
عشان أكون صريح معاك ...لو عايز تقارن الجوليانا بحاجة يبقي مش أقل من ال320i ... صعب شوية تقارنها بال316 ...بصراحة المبلغ اللي هيتدفع مش قليل و بصراحة شايف إنها ماتستاهلش سعرها بغض النظر عن مميزاتها !!!
نفترض اشتريتها و اتخبطت منك !!!
-بسيطة جدا مش هتلاقي حد يصلحهالك و هتبقي رميت 325000 في الأرض
-يمكن ال316 ماتكونش زي الجوليانا و لكنها تفي بالغرض
-لو عايز حاجة تبقي بي ام و أحسن من الالفا روميو يبقي ال118i و ديه هتلاقيها تقريبا ب336000 و هاتشباك برضه و 170 حصان و سوقها و توكيلها أحسن في مصر من الالفا