الموضوع: عشان مبقاش ندل تقرير 1000 كيلو لسيراتو

المشاركة الأصلية كتبت بواسطة ايهاب مأمون

اول حاجه العربيه 2015 هاى ﻻين خليجى

اشتريت العربيه من سمير ريان واول ما مشيت بطلت منى بنزين تحت فى الشارع فرجعتلهم وزعقت فجابولى جركن بنزين 4 لتر حطيتو ومشيت العربيه وبعدين فولتها
عالم معفنة

وانا ماشى كانت كل حاجه تمام بس كنت حاسس بصوت الكاوتش عالى اوى فعملتو نتروجين الصوت قل شويه بس لسه موجود
عيب صوت الكاوتش ده معروف

رخصت العربيه واول يوم رايح فيه الشغل على اول الشارع اللى فيه الشغل لقيت العجله اليمين ورا نامت على الجنط فغيرت اﻻستبن ورحت اعملها لقيت فيها قطع فى الجنب وقالى مش نافعه تانى فعملتها اى حاجه والسﻻم وخلتها استبن يعنى نوع الكوتش سئ جدا العربيه مكنتش عملت 300 كيلو وفرده كاوتش باظت منى وربنا يستر على الباقى بقيت ماشى بحسس على الكوتش خايف لفرده تنام تانى
انت اللي غلطان انك مشيت عليها لحد ما نامت على الجنط و قطع الكاوتش و ده مالهوش علاقة بجودة الكاوتش

تانى يوم قاعد فى العربيه والعربيه واقفه ومركونه تمام عيل صغير ماشى بعجله وقع على جنب العربيه خربشلى الجنب
قدر الله و ما شاء فعل ، طلع حاجة لله

مشت الف كيلو ورحت عملت صيانه وغيرت الزيت امبارح حسيت ان استهﻻك العربيه للبنزين قل شويه والسحب زاد اﻻستهﻻك كان 8 ونص بقى 8 بس
طبيعي تحسن الأداء بعد 1000 كيلو و لسه كمان بعد 5000 كيلو

دا اللى حصل معايا فى الفتره دى وتقيمى بقى للعربيه

العربيه تحفه شكل وسحب ومنظر خارجى وصالون وكماليات بجد مش ندمان انى اشتريتها بالعكسة كل يوم بحمد ربنا انى اخترتها
ربنا يباركلك فيها و الف مبروك

بس حاسس ان العفشه مش كويسه بدب منى وبتخلينى ﻻزم احسس عليها
انت الجنط بتاعك مقاسه كام ؟؟ عموما انا جنط 15 و العفشة معقولة جدا

صوت المتور عالى الى حد وخصوصا لما بزود بحس انى راكب ميكروباص من صوت الموتور
العزل معايا جيد في الحقيقة مش للدرجة اللي بتقولها كده

الفرامل عاديه محستش معاها بأى فرق

الثبات لسه مجربتوش عشان انا مزوتش عن ال 120

ده تقيمى ليها مع العلم انى كنت راكب ﻻنسر قبلها وقبلها فرنا ولو حد عايز يستفسر عن اى حاجه يتفضل

الجنط 17 لازم يخلي العفشه تدب منك
ومبروووووووك ع العربيه وربنا يبارلك فيها ويحميها من كل سوء

استاذ ايهاب ربنا يباركلك فيها يارب ويصرف عنك الشرور،، محتاج منك بعد اذنك نصيحه لانى معايا لانسر وبفكر اجيب السيراتو ، فياريت تقولى هل فى فرق ملحوظ فى المشى والثبات بينها وبين اللانسر ،مع العلم انى عارف ان فيه فرق شاسع فى الكماليات والتكنولوجيا بس انا يهمنى بردو الثبات والاعتماديه لانى بسافر كتير واشكرك

انا فعلا صوت الماتور عندى غريب لما بشد بحس أنها ماشيه من غير فلتر هواء

المشاركة الأصلية كتبت بواسطة Ibrahim Nabil

استاذ ايهاب ربنا يباركلك فيها يارب ويصرف عنك الشرور،، محتاج منك بعد اذنك نصيحه لانى معايا لانسر وبفكر اجيب السيراتو ، فياريت تقولى هل فى فرق ملحوظ فى المشى والثبات بينها وبين اللانسر ،مع العلم انى عارف ان فيه فرق شاسع فى الكماليات والتكنولوجيا بس انا يهمنى بردو الثبات والاعتماديه لانى بسافر كتير واشكرك

بابا كان عنده لانسر بومه2008 1300cc و انا عندي النترا 2010 و فيه فرق بينهم سواء تكنولجيا او ثبات و اعتماديه جدا و السحب كمان و العزل و كله
تخيل بقي حضرتك لو ركبت السيراتو 2015 ولا الالنترا الفيس ليفت يعني اكيد هتتوهم