هاستلم بكرا النترا 2015 ومحتاج نصيحتكم

**soltanfriend** · 12-10-2014 02:46 AM

السلام عليكم
ان شاء الله بكرا هاستلم النترا 2015 فتحه سقف
وانا معنديش اي فكره عن اجراءات العربيات الزيرو وايه اللي اخلي بالي منه وايه اللي اكشف عليه
هو العربيه ماشيه 14 كيلو بالظبط وهي المفروض انها منقوله من القاهره لبورسعيد بونش
وانا لسا عليا 60الف جنيه ولكن صاحب المعرض قالي استلمها ولما اجيب الباقي استلم الورق بعدها بيوم
فياريت نصايحكم ودعواتكم

**limoo ahmed** · 12-10-2014 10:12 AM

الف الف مبروك ربنا يرزقك خيرها ويصرف عنك شرها

ادخل ع الموضوع ده وفي كل حاجه تخص استﻻم العربيه الزيرو

http://www.nilemotors.net/Nile/212786-a.html

**hany63** · 12-10-2014 12:45 PM

هتتاءكد انها سليمه بالفحص الظاهري من عدة زوايا و هتستلم اصل جواب المرور و تتاءكد من البيانات اللي فيه تكون مظبوطه و صوره من الافراج الجمركي اللي فيه رفم شاسيه العربيه و اصل شهادة البيانات عشان تروح ترخص مباشرة في المرور بتاعك و تحتفظ بصورة استلام السياره من المعرض عشان لو فيه تاريخ ضمان هيتعدل فيما بعد
و تبص على الكورويك و الاستبن و العده و تشغل التكييف تتاءكد انه تمام و الف مبروك

**Mohamedjetta** · 12-10-2014 05:14 PM

الف مبروك حضرتك و ياريت تقولي طبعك عن العربية

**hany63** · 12-10-2014 06:08 PM

المشاركة الأصلية كتبت بواسطة mohamedjetta

الف مبروك حضرتك و ياريت تقولي طبعك عن العربية

هههههه اسمها انطباعك مش طبعك
طبعك غريب يا اخي

**samihanwar** · 12-10-2014 08:45 PM

ألف مبروووووك
ربنا يديك خيرها

**Mohamedjetta** · 12-10-2014 09:36 PM

المشاركة الأصلية كتبت بواسطة hany63

هههههه اسمها انطباعك مش طبعك
طبعك غريب يا اخي

ههههههههههههههههه ماشي يا استاذ هاني
منا ليا حق اتلغبط شويه خليجي علي شويه مصري لحد ما بقيت كوكتيل d:

**medosalah** · 12-10-2014 10:01 PM

نصيحتي ليك انك تتاكد بنسبه 100في 100 انها فيها ايموبيليزر

هتلاقي علامه عربيه صفرا في الطابلوه وفيها مفتاح

او تجيب ورقه فويل مطبخ وتلفها علي المفتاح ما عد السلاح وتدور العربيه مش هتدور او تاخد vin العربيه وتدخل علي الموقع الرسمي وتعرف من مواصفات العربيه بتاعتك

لو مش متاكد او عارف انها بدون ايموبيلايزر يبقي تنفد بجلدك وتجري حتي لو عملولك تخفيض 20 الف جنيه

**soltanfriend** · 13-10-2014 03:22 AM

الحمد لله استلمت العربيه
و اتأكدت ان فيها امبولايزر ميدو صلاح من علامه التابلوه
وبالنسبه لانطباعي فانا مشيت بيها 19 كيلو فقط وهي الحمد لله هاديه وعايزه تجري من اقل ضغطه
العفشه ناعمه جدا مع المطبات والحفر لكن لو ظلط او مطب ودن القطة هاتسمعه ولكن مش ها تحس بيه
العزل جيد جدا ومش ممتاز
الفتيس ارتحتله ونقلاته ناعمه ومش بيعمل كيك داون الا مع الضغطه الجامده
الحمد لله مفيش اي تزييق في الابواب او التابلوه عكس ما كنت متوقع
الفرامل جميله جدا ولكن دوست فرامل في حته فيه رمل وكنت داخل علي مطب فحسيتها شويه بتزحف ولكن مسكت جامد ووقفتني بامان
الباور خفيف وبيتقل بشكل ملحوظ مع السرعات
اكتر حاجه عجبتني كان فيه ملف قوي كنت باخده ديما بالميراج وقبلها باللانسر وكنت بميل جامد جدا بجسمي وبالعربيه حتي وانا مهدي علي 40 ولكن بالالنترا خدته علي 60و ولا الهوا ولا ميل ولا اي احساس بالملف
معجبنيش فيها الكاسيت صوت البيس جامد ولكن كمجمل صوته سئ
انوار التابلوه والكاسيت والزراير والفتيس كلها زرقا ومعجبتنيش برضه لو كانت بيضا كانت تبقي احسن
الصاج ورق بمعني الكلمه بضغط علي الكابوت علشان اتاكد انه مقفول لاقيت صباعي بيدخل جوااا
ولكن كمجمل الحمد لله والعربيه ليها هيبه جامده في السواقه وبجد بتخطف العين
فربنا يستر طريقنا ويبعد عنا شر الحسد ويحفظلي ابني ياسين اللي هو احسن من مليون عربيه
واي استفسار انا تحت امركم