الموضوع: كامه الموتور

بص ياباشا الكامه أو عمود الكامه والانجليزي Camshaft ده عمود بيبقى متركب عليه الصبابات بتاعت الموتور وأقصى عدد من الصبابات ممكن يتركب على كامه واحده 12 صباب وده موجود في موتور ميتسوبيشي لانسر البطه موديل 93 بس في الغالب بيشيل 8 صباب زي موتور الفيرنا ال1500 وعمود الكامات بيتحرك بالتزامن مع عمود الكرنك وده موجود في القسم الأسفل من الموتور عن طريق سير الكاتينه أو بالانجليزي Timing belt أو سير التوقيت وده لازم يكون مضبوط على الشعره وبيبقي في علامات عند ترس الكامات وطنبوره الكرنك علشان يظبطوا توقيت فتح وقفل الصبابات مع حركه عمود الكرنك وبالتالي البساتم علشان تتم عمليه الاحتراق مضبوط ومتعملش حاجه اسمها خلفه تقسيمه وده حوار تاني وعموما الموتور الاتنين كامه بيبقى خرجه احسن من الواحد كامه وبيدي هورس باور اكتر من الواحد كامه وكمثال هناخد الانوس في موتورين نزلو ليها واحد 1500 واحد كامه 8 صباب وده في كل الانوس في مصر وده خرجه 86 حصان وليها موتور تاني بره مصر 1500 اتنين كامه 16 صباب وده تقريبا 106 حصان وطبعا انت شفت الفرق في الخرج بين موتورين نفس الشركه بس واحد كامه والتاني اتنين كامه ده شرح سريع كده أما لو عايز شرح مفصل فده عاوز وقت وموضوع لوحده وممكن تدخل على القسم التعليمي في المنتدى وتدور على موضوعات وهتلاقي أن شاء الله اللي يفيدك بالصور واعذرني لاني برد عليك من الموبايل فالموضوع صعب شويه اني ادعملك الموضوع بصور وفيديوهات وأي استفسار انا تحت أمرك

المشاركة الأصلية كتبت بواسطة SAMEH_FOUAD

هو كلامك مظبوط , ياباشا

بس تصحيح بسيط , محركات الهوندا 1500 سى سى كامة واحدة 16 صمام

ومش شرط بردة يكون خرجة ضعيف , فية محركات فى الهوندا 1500 سى سى كامة واحدة قوتها 128 حصان , ومحركات 1600 كامتين 129 حصان , يعنى نفس القوة تقريبا

تمام وانا معاك بس دي حالات شاذه وكمان هتلاقى الموتور ال1.5 كامه واحده بتاع الهوندا اللي حضرتك ذكرته high Rev لفاته عاليه زي ال sir كده دي مواتير حالات شاذه من هوندا لاكن هوا كان بيتكلم عن العام وأغلب المواتير الكامه والاتنين كامه في فرق مابينهم وشكرا لمعلومه موتور الهوندا ال1500 الواحد كامه اللي فيه 16 صمام لاني بصراحه معرفش اوى فى مواتير الهوندا