الموضوع: تقرير عن رحلتى لراس شيطان وطابا بالصور مميزات وعيوب

السلام عليكم ورحمة الله


دة تقرير عن رحلتي في اجازة العيد الكبير لشمال سيناء.


اختيار المكان نفسة جة من فكرة اننا انا والاصدقاء عايزين نطلع ننعزل عن التكنولوجي والعالم الصخب بالضوضاء والدوشة والعربيات والناس


وفعلا اخدنا القرار اننا نطلع راس شيطان وطابا بالعربيات وفعلا اتحركنا من الاسكندرية الساعة 4 العصر كدة

مش عارف لية التوقيت دة بس هى جت كدة


احنا اخدنا العربيات و حطينا بنزين و خلصنا الصحراوى كنا بعربيتى و عربية صاحبي الفلوينس2013

فولنا بنزين وطلعنا كنا بنجري جامد تقريبا مثبتين 170 ورا بعض لحد ما حطينا بنزين عند كالتكس اللى قبل بوابات السويس

230 كيلو صحراوى + 60كيلو دائرى وتوهان جوة مصر + 140 كيلو طريق السويس

تقريبا كان فاضل ربع التانك بس قولنا نحط احتياطي برضوا :)


دخلنا على بوابات السويس واول كمين صغير كدة رخص وبطايق والكلام دة بعدين البوابات بعدينا لفينا اليوتيرن عشان ندخل نفق الشهيد أحمد حمدى

صحبي بتاع الفلوينس كان قدامي وعدة من الكمين ومستنانيش وانا طلعت بعدة بس للاسف فضلت ماشي ورا تريلا لحد ما النفق خلص ولحد البنزينة اللى على ناصية طريق نخل و شرم


اخدنا طريق نخل جرى وانا قدامة عشان الاضاءة عندى اقوى شويتين خدناة بنفس سرعتنا 170 ومشينا بتاع 50 كيلو وهوووب وقفنا في كمين جيش كانت الساعة تقريبا 10 بالليل

كانت 10 عشان زحمة القاهرة الله يكون في عونكم ( شئ بشع بشع ) وعشان وقفنا كلنا في burger king اللى عند داندى مول اخر الصحراوى وادلعنا شوية.

دخلنا على الكمين قلنا الطريق مقفول ! بقولة حضرتك ومش حضرتك قاللى ياباشا الطريق بالليل مش امان ولو كملت من عندى حتوصل لنص الطريق وتقف في كمين تانى لحد الفجر و مايجموا كام عربية مع بعض عشان يمشوا ورا بعض

طبعا انا كنت عايز اقولة مين اللى يمشي معنا اصلا مش حيشوفنا

اخدنا vote وقلنا نرجع تانى وناخد الطريق الدولى بتاع شرم

رجعنا يا سيدي ال 50 كيلو ومسكنا طريق شرم حوالى 357كيلو انا فتحت عن صاحبي شوية (هو عربيتة مكسرتش ال170) الطريق طويل جدا وتحس انك فعلا محتاج عربية مواتير اكبر عشان تفتح اكتر وبقيت بفكر ان ان شاء الله بعد كام سنة لو مكتوبلي اغير العربية اشوف الانسيجنيا التربو عشان انا حبيت GM


جينا قرب شرم ب 10 كيلو ومشينا سوا وهو شاورلي ان عربيتة نورت بنزين وانا كمان كان قدامى على كمبيوتر العربية 20 كيلو وتنور ... هى بتنور لما المتبقي يكون 50 كيلو

دخلنا شرم وفولنا احنا الاتنين وقلنا نريح في نعمة ناكل حاجة ونشرب حاجة

كانت الساعة حوالى 12نص او واحدة مش فاكر اوى ... اتفاجأت بالزحمة والسياح الكتير وابتدت تلعب في دماغنا نبات في شرم ونقضي الاجازة فيها بدل ما نطلع على الطريق تانى

وكنا على وشك ... بس لقينا ان هدف الرحلة وهو الانعزال حيبقي متمش.

اخدنا العربيات بعد توقف ساعتين وللاسف الشبورة نزلت ! وطلعنا تانى على طريق شرم-دهب

وعند اول كمين لقينا الطريق مقفول وقالولنا في اصلاحات امشوا من هنا هو موازى للتانى و بيصب في نفس المكان

فضلنا ماشيين بتاع 100كيلو لحد الكمين اللى بعدة ونلاقي خير اللهم اجعلة خير السلاح بيترفع علينا والكمين انتفض واصوات تعمير الالي وقلنا بس حيضربونا !!


يافندم في اية ! اتارينا داخلين عالكمين عكسي وهما اتفاجئوا وقالوا دول جايين يضربوا الكمين ! الحمد لله قدر ولطف .. سلمنا عالناس في الكمين وعاملين اية وماتيجوا معانا والله هما اللى قالولنا الطريق مقفول وامشوا من هنا

و دى كانت اول صورة بعد الكمين




كملنا بعد الصورتين وبعد ما دورنا على حتة ندخل فيها الحمام :) ومشينا بسرعة و لحد ما وصلنا دهب عدينا دهب وكملنا على طريق نويبع-طابا

و ما ادراك طريق نويبع و الملفات ... ما احنا متعودين بقي عالجرى فوجئت ان بالطريقة دى حناخد الملفات بالعرض جربت كام مرة كدة لقيت الموضوع مرعب جدا واضطرينا نهدى لحد 140 كدة والملفات بناخدها عالهادى ونرجع تانى نزود و كدة

مناظر طبيعية خرافية وكمية اراضي رهيبة غير ماهولة بالسكان واحنا حاشرين نفسنا في حتة قد عقلة الاصبع


صورة كدة للطريق ومنظرة واحنا ماشيين



طريق قاسي جدا وملفات صعبة و للاسف تانى يوم عربية رانجلر اتقلبت علية على الملفات ... طلعت برة الطريق under-steering يعنى جة يلف لقي الملف صعب جدا وقعد يكسر لحد مالعربية عامت لبرة الطريق ودخلت في الدبش واتقلبت ... اتعجنت.

الحمد لله


... فضلنا بقي على دة الحال لحد ما لقينا بصيص امل اننا قربنا نوصل ودخلنا على نويبع وشفت المنظر دة الرائع جدا



انا قلبي انشرح ونزلنا اتصورنا شويتين ويدوبك 5 كيلو بعديها كنا وصلنا لمنطقة رأس شيطان - طابا

المنطقة عبارة عن كامب كتيير ورا بعض وانت بتقعد فية

دة كامب اسمة المعجنة وقفت صورتة و بتنا فية ليلة الفرد ب 75جنية بالفطار



احنا كنا المفروض رايحين على كامب اسمة عياش ودة بعد المعجنة ب 300 متر مثلا

الكامب المفروض بيبقي سرير و فيشة كهربا ولمبة و الحيطان والسقف ذى الكوخ

دخلنا عياش بعد رحلة كسرت ال 12 ساعة ما بين جرى ودلع و تصوير

ولو حسبنا الحسبة حنلاقي اننا اخدنا

230 ك صحراوى + 50ك جوة القاهرة + 130 كيلو طريق السويس + 10 كيلو لحد طريق نخل + 100ك مشيناهم ورجهناهم + 350ك لشرم + 230ك من شرم لراس شيطان

بتاع 1100 ك فولنا فيهم 3 مرات مرة فى اسكندرية ومرة في السويس ومرة في شرم

وصلنا الكامب وكان لسة في العربية اكتر من النص والحمد الله

و دة كان المنظر الكامب اول ما دخلنا وقعدنا نستريح شوية ومحدش قال انتو مين وعايزين اية ... كل واحد اخد تكعيبة وريح فيها والهوا يسطل لوحدة والهدوء الربانى و المنظر خلانا نسرح بتاع نص ساعة



كانت الساعة حوالى 6 الصبح و العمال بينضفوا مطرح الناس بتوع سهرة اليوم اللى قبلة

قمنا بقي

دخلنا للراجل الحاج سالم ( وهو ولا حاج ولا نيلة) قلتلة احنا 4 وكنا كلمناك وبتاع ... قال ماشي

بعد ساعة قال ماشي

بعد كمان ساعة قال اتنو مين ؟ اة طب ماشي

لحد ما قلنا احنا نقعد قدامة لأن دماغ الحشيش دى بتخلية ينسانا اول ما نديلة ضهرنا.

فعلا عدى 20 دقيقة افتكرنا وجبلنا عشة. اة والله عشة ... يا ريس عايزين حاجة اول صف قال مفيش اللى عندى ورا

دة صورة الحتة اللى راكنين فيها وباين فيها عربيتى الكروز و عربية صاحبي الفلوينس

والكامبات اللى ورا دى هى اللى نزلنا في واحد فيهم





الوحش بقي ان الحشيش هناك دة المشروب الرسمى ذى السجاير كدة .. وعادى جدا عم ربيع اللى وصلنا للكامب يقولك لو احتجت حشيش لبناني افغانى مصري مخلوط اجبلك

يعنى peace يا مان

قلتلة فكك مننا ولو احتجنا حاجة حنقولك وبتاع

المهم رحنا غيرنا ونزلنا المياة وطلبنا فطار وبصراحة فطار فاخر جدا

فول و بيض بالبسطرمة وجبنة بالطماطم وبابا غنوج و شاي مرمرية

بس للاسف عياش دة بقي الليلة ب 180 جنية للفرد عشان فية وجبة عشا نص فرخة مشوية بس بأمانة نص فرخة محترمة مع طبق رز او مكرونة متعرفش تخلصة

هما كرماء اوى اوى في الحتة دى

القعدة بالليل ساحرة وهمية مش قادر اوصفها



قاعدة تنسيك الدنيا وما فيها تنسيك الهموم والصخب والدوشة تخليك مش قادر تحرك نفسك من الاستمتاع يعنى امتزاج بالطبيعة بجد


ولكن


عشان الحلو مايكملش


الكامب اللى قعدنا فية طلع من غير كهربا و من غير سرير

عم ربيع الجربان رمالنا حصيرة و تكعيبتين و طبعا الدنيا ضالمة كحل

احنا بقي قلنا بس حتقوم علينا تعابين الجبل باليل ولا العقارب وحنتظبط :)




اخدنا نومتنا وقمنا الصبح فطرنا بعد ما اخدنا دش في حمام الكامب (بيبقي ذى حمام النوادى كدة كبيير بس مفتوح من فوق منك للطبيعة :) )

وقلنا نشوف كامب تانى بعدة وفعلا لقينا اللى لازق فية على طول خرافي اكتر من الخرافية الطبيعية بتاعت عياش

اسمة Castle Beach

وطبعا اول حاجة رشقنا نبص عليها الكامب عامل اذاى من جوة



طبعا دة كدة مقارنة بالتانى فندق 5 نجوم :)

الجميل بقي ان كل كامب بيتميز بحاجة

عياش دة الاكل بتاعة حلو وبالليل في قعدات سمر وغنا والناس تتلم حوالين النار والكلام دة


castle beach الكامب او العشة نفسها انضف بمراحل بس الاكل علي قدة علي الرغم انة اوبن بوفية

المعجنة بقي الاوض بعيد عن ال centre بتاع الكامب اللى فية الاكل والقاعدة والغنا لكن فية snorkling وشعب مرجانية والاكل جامد برضوا والسعر طبعا


قدام الكامبات دى في بقي مراكز للسفارى وطلوع المحميات و القلعة القديمة يعنى فسح كتير

طبعا لفينا لف السنين و مروحين عملين حوالي 3 الاف كيلو عالعداد واتصاحبنا علي ضباط الكماين والجيش وكنا فل اوى :))


بصراحة كام يوم ملهمش حل ودول كام صورة لروعة طابا وسيناء عموما












اخر يوم الجمعة صحينا بدري ونزلنا البحر واستحمينا وقلنا نلحق الصبح ناخد طريق نخل قبل ما يتقفل بالليل

وفعلا طلعنا وصلنا لطابا وشفت المنظر دة ذهلت كنت حنزل فية بالعربية





نزلنا اتصورنا وقعدنا والجبال اللى ورا دى جبال السعودية على فكرة

ركبنا ووصلنا لاول محطة بنزين فولنا وطلعنا على طريق نخل


طريق نخل بقي عند الكمين بتاعة تبص يمين تشوف اسرائيل وتشوف حدودنا تبص شمال تلاقي الطريق :)

دخلنا عالكمين اتنفضنا طبعا تماما وخدوا نمر الرخص والعربية ونمر البطايق وطلعنا

مشينا شوية وفجأة دخلنا بين جبلين بجد ! جوة جبلين



انا اى حاجة تتصور متوصاش لدرجة ان صاحبي ذهق وسابنا بس على مين اول ما الطريق فتح على 200 وعديتة وسبتة يرعش ورا :) وبما ان المفاجأت لا تنتهي الدنيا مطرت سيول فجأة على طريق نخل !


للعلم

الدنيا مطرت عندى وعند صاحبي لأ مع ان الفرق كان 2 كيلو ما بينا مثلا

!

والحارة بتاعتى كانت الرملة الناعمة كلتها كلها ومع المطرة والسرعة وعربية نقل عالشمال لولا فضل ربنا وسترة اولا و وسائل الأمان اللى في الكروز ثانيا اللى خلت العربية مسطرة كان زمانا رحنا ذى الرانجلر اللى في الاول

المهم ان الطريق دة انجز معانا انجاز السنين !

350كيلو وكنا عند نفق الشهيد ! ومنة للسويس ومنة للدائرى ومنة لاسكندرية

المرة دى في الرجوع فولت مرتين بس ... مرة في السويس ومرة في طابا


وصلنا اسكندرية الحمد لله الساعة 9 وكانوا 4 ايام ميتعوضوش وملهمش حل



اتمني تكونوا استمتعتم واستفدتم والف شكر لكم

يمنع استخدام اى من الصور الا بعد اخذ اذن خاص منى وشكرا لكم.