الطريقة الصحيحة للحام الاكصدامات بانواعها

**ViLMoS** · 14-10-2014 01:55 PM

السلام عليكم ورحمة الله وبركاته
اخوكم من قسم سيات
انا كنت بتابع القسم ده من فترة للتانية ولاحظت تكرار الاسئلة من فترة للتانية حوالين الموضوع ده
وهو ازاي الحم الاكسدام بتاعي
انا اكصدامي اتشرخ وازاي الحمه
وكانت كل ردود الاعضاء ما بين ان هو يا اما يشتري جديد او يصلحو
وطبعا كلنا عارفين ان الصنايعية في مصر دماغهم الماظات فاتلاقي واحد لاحملك الاكصدام بتاعك الفيبر ببلاستيك او لاحم البلاستيك بفيبر وتلاقي بعد كده اي خبطة او ترييحة علي الاكصدام يتكسر تاني وتروح للصنايعي يقولك انا هظبطك ويروح مخيطة بسلك ويعملة ومع اول خبطة او ترييحة تلاقي الاكصدام اتدغدغ وفي الاخر تروح تشتري جديد
والنتيجة ان انت صرفت فلوس كتير علي التصليح وبرده في الاخر اشتريت واحد جديد
انا اسف علي الاطالة في المقدمة نخش في الموضوع

فيه نوعين من الاكصدامات
فيبر جلاس و بلاستيك رابر
الفيبر جلاس لما يتلحم بيستخدم خامات معينة وطريقتها كالتالي
1 - بيصنفر الدهان كله اللي حوالين الكسر لغاية ما يوصل للفيبر
2 - بيبدا يحط مكان الكسر فيبر جلاس خام ( قماش الفيبر) وبعدين بيحط عليها بولستر ( اللي هو بيتكون من بوليستر + هاردنر + مسرع وبيتخلطو مع بعض بطريقة ونسب معينة )
3 - بعد ما تنشف بيبدا بصنفرها لغاية ما تتساوي بالاكصدام
4 - بعدين بيحط معجون فيبر وبعدين يتسحق الاكدام كله ويترش

تاني نوع من الاكصدامات اللي هو البلاستيك رابر
بيتم لحامه بطريقة البلاستيك ويلدينج ( او تسييح البلاستيج بهوت جن ) طريقته ازاي بقة
1 - بيتم الصنفرة للوصول للبلاستيك
2 - بيثبت الجزء المكسور من الناحية التانية بلزق الومنيوم
3 - يتم حفر الجزء ما بين الجزء المكسور ( زي الخندق بطول الشرخ او الكسر )
4 - يتم تسييح البلاستيك اللي هو من نوع ريسايكل 2 ( زي غطيان السمنة كدة او جراكن المية) في الجزء المحفور باستخدام هوت جن (ويفضل استخدام هوت اير او الهوت جن المخصص للبلاستيك ويلدينج)
5 - يتم ازالة اللزق الالومنيوم من الجانب الاخر وتكرار العملية رقم 4
يتم الصنفرة وبعدين معجون الفبر وبعدين السحق ورش الاكصدام بالكامل

ارجو اني اكون افدت الناس كلها وحتي لو مش هتعمل الموضوع ده بايدك فلازم تعرف الطريقة الصح بعيدا عن افتكاسات الصنايعية

**A.Saad** · 14-10-2014 04:44 PM

بس ازاى اعرف نوع الاكصدام

**amr011111** · 15-10-2014 10:26 AM

مشكور على الموضوع
وياريت لو تعرف صنايعى بيعمل الصح فى لحام الاكصطدامات

**adelghanem** · 15-10-2014 01:11 PM

مشكور على المعلومات القيمه
ولكن اصحاب العربيات حتى ولو
ولو بقت عندهم فكره على اللحامات
مش حيقدروا ينفذوها او يجبروا الصنايعى
انه يعملها.فياريت لو تقدر تعود تعمل الشغل
النظيف ده ولو حتى للاعضاء فقط.فلك الشكر

**ViLMoS** · 15-10-2014 09:15 PM

المشاركة الأصلية كتبت بواسطة a.saad

بس ازاى اعرف نوع الاكصدام

من داخا الاكسدام لو ناعم ولونه اسود يبقي بلاستيك لو خشن ولونه ابيض عادة يبفي فيبر
طبعا لما الفيبر بيتكسر هتشوف الالياف لكن البلاستيك لا
الفيبر بيتكسر بصعوبة لانه المفروض انه ممتص للصدمات اكتر
البلاستيك لو اتني ممكن يفضل متني علي عكس الفيبر

المشاركة الأصلية كتبت بواسطة chrometech

الاكصدام الفيبر بيكون اكثر صلابه من البلاستيك ولما بيتكسر بتظهر الياف الفيبر جلاس زي الشعر لونها ابيض وبيكون الاكصدام ناعم من الخارج فقط والداخل عاده خشن
والاكصدام البلاستيك عاده بيكون لونه اسود وبكون ناعم من الداخل والخارج

انا كنت بلحم الاكصدامات البلاستيك و الفيبر وكنت باعمل التعديلات الفيبر بس بط-لت علشان فتي الصنايعيه والسمكريه في الموضوع
دلوقت بعمل الكلام ده لعربيتي وللحبايب بس

لان اغلب الصنايعيه بيلحموا البلاستيك بالفيبر...والفيبر بالايبوكسي....والصاج والسلك والمسامير ...وكله عند العرب صابون...
بصراحه الواحد لقي انه لا يتمتع بالكفائه امام المحترفين دول فاعتزلت المهنه

عندك حق والله الصنايعية في مصر هنا ام الفتي كله وعمره ما هيقتنع بكلامك انا عن نفسي بعمل عربيتي بس

**ViLMoS** · 15-10-2014 09:16 PM

انا ممكن اعمل الشغل ده بس المشكلة ان ولا عندي المكان ولا التوولز اني اعمل كدة

**محاسب صعيدى** · 04-02-2015 11:42 AM

ممكن معلومة عن كيفية تقوية اكصدام شاهين جديد بلاستيك اسود من الداخل قبل ما يركب على السيارة
هل يلصق علية بكولا فيبر او نملى الفرغات بفوم سائل مثلا
نفسنا فى فكرة حلوة للموضوع دا تكون حصريا للمنتدى

**ViLMoS** · 11-02-2015 09:53 AM

المشاركة الأصلية كتبت بواسطة محاسب صعيدى

ممكن معلومة عن كيفية تقوية اكصدام شاهين جديد بلاستيك اسود من الداخل قبل ما يركب على السيارة
هل يلصق علية بكولا فيبر او نملى الفرغات بفوم سائل مثلا
نفسنا فى فكرة حلوة للموضوع دا تكون حصريا للمنتدى

قبل ما نفكر ازاي نقوي الاكصدام لازم نشوف المفروض فايدة الاكصدام ايه
فايدة الاكصدام انه يمتص الصدمات بعيدا عن جسم العربية علشان ماتجيش خبطة في العضم بتاع العربية
لو اتعمل علية من الداخل فيبر مع اول خبطة او ترييحة البلاستيك هيفصل من الفيبر
ولو حطيت فوم سائل من الداخل من اللي كثافته تقيلة الخبطة هتسمع في العربية وده احنا مش عاوزينه
لو عاوز تقوي الاكصدام وفي نفس الوقت تحافظ علي العربية ممكن تملي الفراغات بفلين ابيض وفي نفس الوقت تعمل بينه وبين جسم العربية مسافة علشان ولا الاكصدام يتكسر ولا جسم العربية يحصله ضرر وعقبال ما الصدمة توصل لجسم العربية تكون معظم القوة امتصها الفلين
والله اعلم

**koki4life** · 25-06-2017 04:37 PM

أين يباع الفلين ؟

الموضوع: الطريقة الصحيحة للحام الاكصدامات بانواعها

LinkBack

أدوات الموضوع

عرض

-

-

-

-

المواضيع المتشابهه

الطريقة الصحيحة لإختيار زيت سيارتك

الطريقة الصحيحة للفيتيس فى الزحمة

ما هى الطريقة الصحيحة لتعبئة النتروجين ؟

ما هى الطريقة الصحيحة لتعبئة النتروجين ؟

الطريقة الصحيحة لتركيب عداد ال rpm

الكلمات الدلالية لهذا الموضوع

المفضلات

المفضلات

ضوابط المشاركة