قرفت من سحب النوبيرا مع الموتور الاستيراد فما هو السبب

**toshipa** · 15-10-2014 11:41 AM

قرفت من سحب النوبيرا مع الموتور الاستيراد فما هو السبب
الحكاية انى الموتور عندى كان الزيت بينقص شويه لغاية العلامة اللى تحت بعد ثلاتة الاف كيلو وكنت بغير الزيت بالرغم انه ماكنش فيه دخنه خالص
والسحب بتاع العربية والتسارع كان رائع جدا جدا جدا
ولكن العربية قعدت فترة المياه بتنقص وكنت ماشى وبزود المياه كل يوم عادى مفيش مشاكل وفى يوم رحت الشغل وبعدين احد زملائى فى العمل ابلغنى ان فى مياه كتيرة بتنزل من العربية ومغرقة الدنيا فرحت بصيت عليها لقيت فعلا المياه فضيت كلها والقربة فاضية
انتظرت وقلت بعد الشغل اروح للميكانيكى ورحت للميكانيكى بص وقالى الطبب والشجرة هما السبب ولازم نفك الوش عشان نوصل ليهم
المهم فك وبعدين قلى البساتم فيها هزة و سال هو الزيت بينقص قلت له بلاقيه ناقص وانا بغير الزيت
فقال بالمرة نعمل الشنبر ومش هيتكلف وافقته وتركته وقلت على البركة وقلت له انا ماشى وحل وبكرة اعدى عليك
ورحت له تانى يوم
قال لى الشنبر مش هينفع
قلت ليه
قال الشميز مبوش وعايز خراطة
قلت له وطبعا الكرك هيحتاج
قال هيحتاج
قات له انا افكر اجيب نص تحتانى واخلص
قال ماشى
راح معايا عند بتوع الاستيراد وشاف النص والراجل قال ب 1600 فاضى طبعا
وروحنا لواحد تانى والراجل بتاع الاستيراد قالى خد ( شورت بلوك النص التحتانى +الوش) افضل اقتنعت بكلامه وقلت اخلص نفسى بكام ياعم قال من الاخر 2600 قلت للميكانيكى انت عليك تختار الموتور
بس اوعى يكون 1500 سى سى احسن انا سامع ان مفيش استيراد 1600 سى سى (وده من خلال موقعكم بقسم الدايو)

قال ازاى اللى انت واخده ده 1600 اقنعت نفسى بالرغم انى مش مصدقه وقلت مش مهم ماهو راكب فى النوبيرا 1 وماسمعتش شكوى منه

الميكانيكى ركب الموتور لقيت العربية ميتة فى السحب جدا
رجعت ليه بعد كذا يوم وقال هضبط كل حاجة ؟ ومشيت بالعربية كذلك ومش عجبانى لان مش هو ده اللى متعود عليه
ورجعت ليه تانى ركب وقال كل النوبيرا كده
عرفت انه ماعندوش حل بعد ماغيرت كل الكهرباء بوجيهات وسلوك وكل اللى احتاجه

ورحت لميكانيكى اخر بعد شهر لانى ماشى قرفان من السحب
فقال لازم تغير الكتينة والبلى ماشى ياعم وضعف السحب قال هروح التوكيل عشان الكنترول يظبط مع الموتور الجديد
وبعد كل المصاريف دى العربية سحبها زى الزفت ( التسارع بطئ )
فقلت اجرب واشوف السحب لقيتها بتجيب معايا الان التانى اخره60 الاول كان بيدخل على 90 كم بالموتور القديم وكمان الان بالموتور الجديد بياخد فترة طويلة فى الاستجابة

وقلت اجرب فى السرعة العالية ( مع ان مابحبش اجرى) ولكن للمقارنة مع الموتور القديم
وجدته بيجيب نفس السرعة ولكن الفترة طويلة ( التسارع) يحرج وممل بخلاف الاول
بالنسبة للار بى ام مع السرعة جربته ايضا
وجدته الغيار التاث 60 كم على 3000
الغيار الرابع 80 كم على 3000
الغيار الخامس 100 كم على 3000
العربية مو 2001 ومعايا بقالها تسع سنوات وكانت زى الفل فى السفر

وارجوا من حضراتكم ومن لديه خبرة يرشدنى ماهو الحل وخصوصا الاخ / محمد ممدوح
لان بالرغم انها كانت غالية عندى بدات اكرها ولو مافيش حل هبيعها

وانا اسف جدا جدا جدا على الاطالة

**hamo81** · 15-10-2014 12:01 PM

أنا رأي تروح التوكيل يكشفك على العربية وهايقولك المشكلة من فين وليه وبعد كده ممكن تقرر تعمل إيه

**عم جحا** · 15-10-2014 05:04 PM

رأى الشخصى لو حصل فى عربيتى المشاكل دى من الاول كنت غيرت الموتور بالكامل باخر استيراد بحالة نظيفة وريحت دماغى

**alassaby5** · 15-10-2014 08:15 PM

اولا المفروض ان السرعه 100 على الخامس يكون الأر بى ام اقل من 3000 بشئ بسيط ولو على 3000 يكون حوالى 110 السرعه ده معناها ان اسطوانه الدبرياج فيها مشكله وده وارد لانك فكيت الماتور وممكن الميكانيكى مبصش عليها وممكن لو سليمه يكون الرشاشات عاوذه تتنضف وممكن تكون التقسيمه خلفه سنه تعمل تكتيف للسياره بما انك فكيت الماتور يجب تتاكد من هذه الاشياء الكلام ده لو انت متاكد ان الماتور 1600 مش 1500 لان وزن النوبيرا 2 يفرق عن النوبيرا 1 ده حسب الكاتلوج وال1500 نوبيرا 1 وال1600 نوبيرا 2 وفى الحاله دى الموضوع منتهى وشكرا وفى سوال انت غيرت الماتور على عداد كام كيلو ويا ريت تبلغنا بعد الحل ليعرف الجميع ماذا كانت المشكله

**toshipa** · 16-10-2014 12:04 AM

اولا شكرا على الرد من كل الاخوة الاعزاء

المشاركة الأصلية كتبت بواسطة عم جحا

رأى الشخصى لو حصل فى عربيتى المشاكل دى من الاول كنت غيرت الموتور بالكامل باخر استيراد بحالة نظيفة وريحت دماغى

ماهو ده اللى انا عملته وغيرت الموتور

العربية ماشيه 150 الف كيلو فقط

والسبب اللى كنت رايح عشانه هو تسريب المياه من الطبب والشجرة بسبب استعمال المياه العادية مما سبب صدا اما نقصان الزيت لم يكن بالدرجة الكبيرة كنت بلاقيه ناقص غند التغيير فقط والميكانيكى الثانى اخبرنى بان الزيت بيحصل فيه بخر ولازم ينقص شويه طبعا ده رايه ولكن بعد فوات الآوان

بالنسة للديسكوالاسطوانة قبل التغيير كان السحب والتسارع ممتاز جدا جدا واستجابة العربية كانت زى الفل لو دايس سنة بنزين بتنط من القوة اما الان نامت منى

هو التقسيمة لو خالفة سنة ممكن تعمل كده ماهو نفس الميكانيكى هو اللى غير لى قبل كده الكتينة والبلى اكثر من اربع مرات فى السنوات السابقة وكنت بامشى من عنده مبسوط
وبعد الموتور الاستيراد طبعا زعلت وتركته ورحت لميكانيكى اخر قالو عنه انه كان شغال فى التوكيل
بالنسبة للموتور سعة السى سى لم اعرف السعة الحقيقية حتى الان هل هو 1500 سى ام 1600 مع انى كنت قرات فى قسم الدايو ان عدد الاحصنة فى 1500 سى هو 110 حصان ولموتور 1600 سى 106 حصان

شكلى هاسيب الدايو واشوف اى ماركة اخرى عشان ابعد عن ميكانيكية الدايو خالص

**blazer** · 16-10-2014 08:27 PM

اتاكد تانى من ضبط الكاتينة وان خراطيم الفاكيوم راكبه مضبوط

**moko_2004** · 17-10-2014 03:27 AM

بصراحة انت بهدلت نفسك بهدلة جامدة
انت اوفرلك تجيب مكنة ليجنزا 1800 و تطير بالعربية طيران ولا كنت هتسأل عن سيراتو ولا اوكتافيا ولا تويوتا كنت هتبقى اسرع بكتير من كل دة

بهدلت انت نفسك

**modyegypt** · 17-10-2014 10:02 PM

المشاركة الأصلية كتبت بواسطة moko_2004

بصراحة انت بهدلت نفسك بهدلة جامدة
انت اوفرلك تجيب مكنة ليجنزا 1800 و تطير بالعربية طيران ولا كنت هتسأل عن سيراتو ولا اوكتافيا ولا تويوتا كنت هتبقى اسرع بكتير من كل دة

بهدلت انت نفسك :h_angry[1]:

طيب مش كان هيعوز يغير كام حاجة مع الماتور ..؟؟؟

**moko_2004** · 18-10-2014 04:49 PM

المشاركة الأصلية كتبت بواسطة modyegypt

طيب مش كان هيعوز يغير كام حاجة مع الماتور ..؟؟؟

لا مكنش هيحتاج يغير حاجة
اللهم الا هيطول شوية اسلاك علشان حساس الحرارة في الليجنزا تحت الموبينة مش تحت الدينامو و حديدة الكرسي اليمين هيخرطها في المخرطة كلة كلة 15 جنية