الموضوع: موبينيل تنافس بقوة لتكون أسوأ شركة محمول

النهاردة كنت في موبينيل فرع الزقازيق .. عاوز أطلع شريحة جديدة.

أخدت رقم الساعة 08:45 .. رقمي كان 545 و كانوا شغالين في 480 و الفرع زحمة كالعادة لدرجة ان الناس قاعدة على الرصيف بره.

المهم الساعة 09:30 كده الدنيا هديت شوية و الساعة 09:45 لقيت بتوع الأمن بيقولوا احنا هنقفل الساعة عشرة و اللي معاه رقم خلاص هيروح عليه و هيمشي .. قلت له ازاي انت المفروض تقفل الباب و تخلص الناس اللي جوه .. قال لي لأ أصل الجهاز بيقفل الساعة 10 لوحده و الموظف مبيعرفش يشتغل (كذب طبعا)

كلمت خدمة العملاء .. رد عليا واحد اسمه نادر .. قلت له على الموضوع .. قال لي طيب هشوف المعلومات و أرجع لك .. المهم رجع قال لي المسؤل اللي عندك لازم يخلص كل العملاء اللي موجودين في الفرع .. قلت له المشرف بتاعهم اسمه محمد عباس و مش راضي .. قال لي طيب خليني أكلمه .. قلت له كلم حد من عندكم كم الشركة .. قال لي مبكلمش حد.

طبعا كان الصوت واضح في التليفون من العملاء اللي بيتخانقوا انهم مش عاوزين يشتغلوا و بيكذبوا على العملاء و يقولوا لهم ان الأجهزة بتقفل أتوماتيك الساعة 10 .. فالراجل بتاع خدمة العملاء قال لي لو تحب يا أفندم أعمل لك شكوى قلت له ياريت .. و سجل لي شكوى فعلا و قال لي هنتابع مع حضرتك (وان كنت أشك انهم هيعملوا حاجه)

المهم قفلت معاه و قلت لمحمد عباس انت المفروض تخلص اخر عميل موجود في الفرع و قلت لزميله التاني انتوا بتكذبوا على العملاء و تقولوا لهم ان السيستم بيقفل علينا وده مش صحيح .. لقيتة اتوتر و قعد يكتب على الكمبيوتر و مبصليش.

الغريب ان جوه موبينيل في اجتماعتهم بيقعدوا يتكلموا عن ال customer retention و ال customer loyalty .. و يقولوا هما العملاء بيسيبونا ليه و الأسباب واضحه قدامهم بس شكلهم كده مش شايفين.

كنت مرة اتصلت بصيانه توشيبا وحددت معاهم معاد حييجولى فيه وفضلت مستنيهم وخدت يوميها اجازه وفالأخر مجوش
فبكلم الموظف فبيقولى انت تعرف ليه يا فندم احنا اتاخرنا ومعرفناش نيجى فالميعاد
تعرف ليه يافندم
تعرف ليه يافندم
عشان كنا قاعدين مع المدير المسؤل وبيتكلم معاهم عن كيفيه ارضاء العملاء :-|