تفكير بصوت عال فى إختيار سيارة جديدة

**Fouad Ezz** · 16-10-2014 07:49 AM

السلام عليكم ورحمة الله وبركاته
دلوقتى أنا بقالى أكثر من سنة بفكر أشتري عربية جديدة
أنا معايا 516 سبرانزا من 2008 ومقتنع بيها جدا ... وأعتقد إن هي سبب حيرتى فى شراء عربية جديدة علشان فيها كماليات مش لاقيها فى بعض الجديد إللى بين 150 ألف إلى 200 ألف (والقياس مع الفارق طبعا) أنا مش باقول هى أفضل من العربيات إللى بفكر فيها دلوقتى .. بس هى كصفقة رابحة فى 2008 مش لاقى حاجة تكون زيها (صفقة رابحة فى 2014)
كل ما أرجع بالزمن لورا و أشوف المخاطرة والمغامرة فى إختيار ال 516 وتوفيق ربنا فى الأختيار أتعجب من عدم قدرتى على إتخاذ قرار الأن ....
معلش هاطول عليكم شوية بس الحيرة كبيرة

أولا ix 35
البداية كانت رؤيتى لـ ix 35 فى منتطف 2013 (أيام ماكانت بتنزل بالفرش الجملي) وبهرتنى جدا ... قعدت أدرس موقفها واقرأ التقارير بتاعتها على النت و أشوف فيدوهاتها ... و أخر فيصل كان التست درايف ... حجزت تجربة سواقة
فى غبور العبور ... وكان هذا هو إنطباعى
أول مرة أسوق أتوماتيك بس قولت هاتعود علية بعدين
قعدة العربية كانت غريبة بالنسبة للسيدان إللى أنا متعود عليه
وكمان حسيت إن طارة الدريكسيون صغيرة جدا
والعربية كانت بتدب جامد على أى مطب أو عيون القطط فى الطريق
السنتر لوك لم يغلق بعد التحرك بالعربية
غطاء السقف البانوراما عبارة عن ستارة قماش مهوية من الجنبين
واحد زي (راكب صينى) ورايح يجرب عربية (كوري – هيونداي تمنها 225 ألف) لم أشعر بأى إنبهار بل بالعكس لما رجعت وركبت الإسبرانزا وأنا مروح حسيت براحة وانسيابية أكبر بكتير من الـ ix 35
فقررت أن أفكر فى خيار أخر .......

ثانيا: كارينز الشكل الجديد
الفئة إللى عجبتنى هى الهاي لاين .. وكنت قعدت فيها أثناء معرض أتوماك الأخير وضايقنى جدا أنى مش شايف أى حاجة من كبوت العربية
كثير من الأخوة المحترمين هنا فى المنتدى بيقولوا إن ده مش مهم ,,, بس الكلام ده فى أروبا ودول الخليج إللى مش فيها توكتوك أو ميكروباص أو سواقين تاكسى شايفين إن سواق الملاكى نازل الشارع يتفسح ... ولما تضيف على ذلك إن التوكيل حاطط حساس ركن خلفى وكبر من الأمامي هاتبقى النتجة تشوه العربية من قدام .... ودى إللى باشوفة فى العربيات الكارينز الجديدة إللى باشوفها فى الشارع
المهم ... قولت خلينى زي الناس وبلاش حسوكة .. وأروح أتفرج عليها .. أخذت جميع أفراد الأسرة .. المدام والأطفال وروحنا نعمل تجربة عملية بالجلوس فى السيارة ... المدام إنبهرت والأولاد زقططوا ,, وعايزين من دى يابابا .... بس برضو بضرب بيعنى لسقف العربية لقيتة واقع!!!
نفس شعور العربيات القديمة لما يبقى التنجيد بتاع السقف بايظ
غطاء فتحة السقف إللى بيفتح كهرباء عبارة عن ستارة قماش غير محكمة ومهلله وواقعة من الجنبين
أنا بتللكك ... أيوة بتلكك ... المبلغ مش قليل وأنا حاطط فى دماغي أن لازم العربية مايبقاش فيها غلطة ... طب أجيب من غير فتحة سقف .. ممكن .. بس الفئة دى فيها حاجات تانية كتير زي البلوتوث مش موجودة فى الفئة إللى قبلها ....
ممكن واحد يقولى دلوقتى .. يعنى إنت راكب أسبرانزا صينى وعمال تطلع القطط الفطسانة فى عربيات تانية برقبتها ...
أقول .. أنا مش بقارن بينهم .. أنا بقول عايز أشتري عربية تكون صفقة رابحة على قد الفلوس إللى بندفع فيها ومش معقول تلاقى فى عربية واقفة فى المعرض لسة عيوب تافهة وبسيطة زى دى ....
طيب الإسبورتاج ضيقة ومش تنفع تكون عربية عائلية
والـ 3008 ممتازة ورائعة بس أنا بحب أكون زي الناس وأجيب إللى ماشى فى السوق عشان لو حبيت أبيع

أخر ما توصل إلية الفكر والحيرة
هو أنى أجيب سيراتو ... ولما العيال يكبروا وأبقى محتاج عربية عائلية (إجبارا) يمكن يكون فى حاجة حلوة نزلت ...

مارأيكم دام فضلكم
وأسف على الإطالة

**أبو عبدالله** · 16-10-2014 09:51 AM

انا رأيي ان افضل صفقة رابحة الآن في الرينج ده 150 الف الى 200 الف
هيا السوباروا الأمبريزا الأسبيشيال اديشن
عربية تحفة بجد وفيها كل الكماليات وعربية ياباني ميه في الميه

**yasser100** · 16-10-2014 10:24 AM

للاسف ال ix35 اسعار مغالى فيها جدا , عندى واحد صديقى كان بيشترى ال ix35 و انا باشترى الفلوينس فى وقت واحد و الهيونداى كانت ب 225 الف و عربيتى ب 180 الف و اخدنى فى الهيونداى اجربها معاه , مش ممكن باى شكل تكون ب 225 الف و رزع فى المطبات و الحفر و الصالون عادى جدا , اه العربيه ناعمه للامانه و استجابة الفتيس قويه بس لا يمكن يندفع فيها المبلغ ده , عايز اقول لك السيلفر كله اللى فى التابلوه و الدريكسيون رش يعنى مع المسح و التنضيف هايطلع و اى خدش هايظهر مش نواكل زى العربيات المحترمه.

و العدادات قديمه لا هيه ديجيتال و لا حاجه و التكييف بكر عادى مش تاتش و لا ديجيتال لما ركب معايا الفلوينس حس بفرق فخامة الصالون و قعدة الكرسى و الفيو و عزل العربيه , بس هو من النوع اللى بيغير كتير و طبعا انت عارف سوقنا الجميل .

كل اللى اقدر اقوله لك ما تدفعش فلوس فى حاجه انت شايف انها ما تستهلش حتى لو كل الناس شايفه غير كده لانك هاتفضل متضايق و تعبان .

العيب مش عندك , ملاحظاتك سليمه و فعلا عربيات ما تستحقش و بص لاقرب حاجه لك فى الخليج او اوروبا و شوف من اللى بيركبها و بيندفع فيها كام .

الكورى ده هايص فى مصر و جنوب شرق اسيا و دول الاتحاد السوفيتى القديم و ما عنديش اعتراض عليه بس يندفع فيه اللى يستحقه .

**hany63** · 16-10-2014 10:33 AM

حط البيجو ٥٠٨ برضه ضمن خياراتك عربيه مفيهاش غلطه و ممتعه جدا في سواقتها اكتر مما تتصور
و ركوبه و فخامه بلا حدود

**memoo305** · 16-10-2014 02:44 PM

لو فكرت بالشكل ده بيقى متركبش كوري أبد أو عربية متجمعة في مصر
الأوربي هتحس فيه بنقلة وانه يستاهل الفلوس (رينو - بيجو-سكود -فورد)
والياباني التويوتا

**tarekmaher** · 16-10-2014 02:58 PM

لو حضرتك راجل عملي اظن ان الشارك عربية كويسة جدا بالنسبة للسعر
لو عايز عربية تبيعها علي طول كورولا قولا واحدا
لو حاجة تحس فيها انها فخمة سكودا او بيجو او اوبل استرا او فورد ( يعني اوروبي )
وممكن تشوف السيفك اظن انها عربية ممتازة وركوبة كويسة واعطال قليلة زي التويوتا بس مظلومة في مصر جدا
هذا الكلام مجرد رأي وبالتوفيق في الشراء

**hamo81** · 16-10-2014 03:05 PM

أنا لو هادفع مبلغ زي ده فوق ال200 ألف مش هافكر في الكوري نهائي
إما ياباني محترم أو أوروبي
أول حاجة هفكر فيها الأوكتافيا لأن سوقها ممتاز في البيع والشراء
أو الفلورانس أعلى فئة
أو كورولا الجديدة تقفيل تركي وسوقها ماشي بس سعرها مبالغ فيه شوية
انا رأيي إن الكوري بخيل جدا في كمالياته وميستحقش المبلغ الكبير ده

**Hmatchy** · 16-10-2014 03:13 PM

للاسف الرينج ده من السعر فيه عربيات كتير مظلومه زى الستروين السى فايف و الامبريزا و الفوكاس
بس انا لو منك ازود شويه واركب فولفو اس 60 وانسى كل الكلام ده عامله 270 او 280 مش عاررف تحديدا كام دلوقتى

**Fouad Ezz** · 17-10-2014 01:11 AM

والله إنتوا ناس فى قمة الإحترام والتعاون ....

شكرا ليكم جميعا ... تعليقاتكوا مشجعة ومخلصة و من القلب ...
أنا كنت خالاص .. حاسس إن فى حاجة غلط فى تفكيرى خاصة لما باشوف إنتشار الـ ix 35 فى الشوارع

أنا دلوقتى بفكر أجيب كيا كارينز مستعملة ... كبيرة وعائلية وإعتمادية وسوق إعادة البيع بتاعها رائج جدا
وقدامي واحدة 2013 خليجى عاملة 19 ألف ... بس مغيرة بربريز أمامي ورووف راك .. هل ده ممكن يكون ناتج عن انقلاب العربية ... وهل يفضل الخليجى ولا لأ ... هى اردنى وجميع الكماليات وفيها لعب فى الكهربا .. (إنذار وكاميرا خلفية ووحدات رفع) ... مصدر القلق أن صاحب العربية طالب 145 .. فى حين إللى زيها 2013 و19 الف كيلو ... بيطلبوا 150 أو أكثر ....

هل أطمع فى إبداء أرائكم ....
شكرا جزيلا

-

الموضوع: تفكير بصوت عال فى إختيار سيارة جديدة

LinkBack

أدوات الموضوع

عرض

تفكير بصوت عال فى إختيار سيارة جديدة - انشر الموضوع فى :

-

-

-

-

-

المواضيع المتشابهه

كيفية إختيار سيارة

رجاء المساعدة فى إختيار سيارة جديدة فئة 120 ألف جنية

تفكير بصوت عالى فى "ساوند سيستيم "

ساعدوني في إختيار سيارة

مجرد رائي تفكير بصوت عالي فاسعار الوقود

الكلمات الدلالية لهذا الموضوع

المفضلات

المفضلات

ضوابط المشاركة