الرخصه اتسحبت والمرور ضيعها

**Hikayat** · 17-10-2014 02:35 PM

رخصتي مسحوبه من 50 يوم تقريبا ورحت يوم الاربع اللي فات علشان ارجعها المهم رحت المرور بتاعي وبعد ما جبت الاورنيك وفحصت ( مسحوبه فاميه ) وخلصت الاجراءات دي رحت اشوف الرقم اللي جت بيه المرور علشان خاطر ادفع الغرامه في النيابه المهم المرور قاللي دي مجاتلناش .. رحت مرور البلد اللي اتحسبت فيها الرخصه قالولي احنا بعتناها المرور بتاعك ... رجعت للمرور بتاعي الراجل طلع كل الرخص وفعلا ملقهاش وقالي مجتش قدامك اهو
فالراجل قالي روح اعمل محضر ان رخصتك ضاعت وانا هطلعلك الرخصه دلوقتي وساعتها مش هتدفع المخالفه كمان ..
وفعلا عملت المحضر وهاخد الرخصه الاسبوع الجاي ان شاء الله
دلوقتي بقي انا كده اجرائاتي صح ولا غلط ؟ وبعد كده لو الرخصه وصلت المرور او لقوها او حاجه .. ايه العمل ؟ وساعتها هيبقي ايه التصرف معايا ؟ والغرامه اللي كانت المفروض تتدفع دي كده خلاص ولا ايه ؟

**semsem7222** · 17-10-2014 02:56 PM

ياباشا انت تجيب رقم صادر من المرور اللى فى البلد اللى اتسحبت منة الرخصة وتودية المرور التابع ليك لانك لو عملت محضر فقد والرخصة مسحوبة فيها مشكلة وهيطلعلك رخصة لمدة شهر 3 مرات مش المدة كاملة فى حالة المحضر

**Hikayat** · 17-10-2014 03:08 PM

المشاركة الأصلية كتبت بواسطة semsem7222

ياباشا انت تجيب رقم صادر من المرور اللى فى البلد اللى اتسحبت منة الرخصة وتودية المرور التابع ليك لانك لو عملت محضر فقد والرخصة مسحوبة فيها مشكلة وهيطلعلك رخصة لمدة شهر 3 مرات مش المدة كاملة فى حالة المحضر

خدت رقم الصادر من المرور ورحت المرور التاني قالولي مفيش حاجه جت والكلام ده بقاله 50 يوم
مرور البلد اللي اتسحبت بيحلفولي انها طلعت وادوني رقم الصادر .. والمرور بتاعي الراجل دخلني وخلاني قلبت في الرخص بنفسي وفعلا مجتش
والراجل بتاع المرور بتاعي قالي انت كده خلاص مش هتلاقيها فاعمل محضر وبتاع وهوه اللي قالي اعمل اللي انا عملته ده
وانا كده كده بجدد سنتين كمان الرخصه كانت هتخلص في 1 / 2015 وانا بجدد سنتين في نفس الوقت علشان تخلص في 1 / 2017

**ahmedelrayan** · 17-10-2014 05:40 PM

المشاركة الأصلية كتبت بواسطة hikayat

رخصتي مسحوبه من 50 يوم تقريبا ورحت يوم الاربع اللي فات علشان ارجعها المهم رحت المرور بتاعي وبعد ما جبت الاورنيك وفحصت ( مسحوبه فاميه ) وخلصت الاجراءات دي رحت اشوف الرقم اللي جت بيه المرور علشان خاطر ادفع الغرامه في النيابه المهم المرور قاللي دي مجاتلناش .. رحت مرور البلد اللي اتحسبت فيها الرخصه قالولي احنا بعتناها المرور بتاعك ... رجعت للمرور بتاعي الراجل طلع كل الرخص وفعلا ملقهاش وقالي مجتش قدامك اهو
فالراجل قالي روح اعمل محضر ان رخصتك ضاعت وانا هطلعلك الرخصه دلوقتي وساعتها مش هتدفع المخالفه كمان ..
وفعلا عملت المحضر وهاخد الرخصه الاسبوع الجاي ان شاء الله
دلوقتي بقي انا كده اجرائاتي صح ولا غلط ؟ وبعد كده لو الرخصه وصلت المرور او لقوها او حاجه .. ايه العمل ؟ وساعتها هيبقي ايه التصرف معايا ؟ والغرامه اللي كانت المفروض تتدفع دي كده خلاص ولا ايه ؟

يا باشا انا شايف اللى انت عملته صح مية فى المية لاننا عايشين فى تسيب واستهتار انت مش ذنبك ان الرخصة موصلتش ويوم ما توصل ويجى حد يقولك انت عليك مخالفة قولهم ما انا جيت عشان ادفعها لاقيت الرخصة ضاعت من عندك فعملت بدل فاقد

**sha2e** · 18-10-2014 12:07 AM

اعتقد ان الموضوع متوقف على المحضر الى انت عاملته
لو المحضر قولت فيه الى حصل وان الرخصة ضاعت فى المرور كده انت معلكش اي مشكلة
لكن لو قولت فى المحضر انها ضاعت منك انت وبعد فترة لقوها عندهم ممكن يبقى فيه مشكله عليك
لاني كنت فكرت فى الفكره دي زمان لكن عرفت لو رخصتك او رخصة العربية اتسحبت وطلعت واحده بدل فاقد بيبقى فيه مشكلة بس مش فاكر عقوبتها ايه بالتحديد

**Hikayat** · 18-10-2014 03:35 PM

المشاركة الأصلية كتبت بواسطة ahmedelrayan

يا باشا انا شايف اللى انت عملته صح مية فى المية لاننا عايشين فى تسيب واستهتار انت مش ذنبك ان الرخصة موصلتش ويوم ما توصل ويجى حد يقولك انت عليك مخالفة قولهم ما انا جيت عشان ادفعها لاقيت الرخصة ضاعت من عندك فعملت بدل فاقد

ايوه يعني هيصدقوا ولا ايه الكلام ؟

المشاركة الأصلية كتبت بواسطة sha2e

اعتقد ان الموضوع متوقف على المحضر الى انت عاملته
لو المحضر قولت فيه الى حصل وان الرخصة ضاعت فى المرور كده انت معلكش اي مشكلة
لكن لو قولت فى المحضر انها ضاعت منك انت وبعد فترة لقوها عندهم ممكن يبقى فيه مشكله عليك
لاني كنت فكرت فى الفكره دي زمان لكن عرفت لو رخصتك او رخصة العربية اتسحبت وطلعت واحده بدل فاقد بيبقى فيه مشكلة بس مش فاكر عقوبتها ايه بالتحديد

ياباشا المحاضر دي مبيكتبش فيها حاجه دي ورقه مطبوعه بصيغه معروفه بكتب فيها رقم العربيه وخلاص

**eng_amg** · 18-10-2014 03:51 PM

نصيحة .. بعد متستلم الرخصة الجديدة روح المرور بتاعك بعد فترة اسأل عن القديمة. وليكن قبل التجديد بشهر علي الاقل. لو لقيتها ادفع الغرامة واستلمها وسلم الي معاك.
انا بقول كدا لانها في حالة القديمة وصلت للمرور بعد فترة لاي سبب. حاحفظ في الملف. وساعتها عند التجديد حتوقع عليك عقوبة قد تصل الي الحبس.
كان صديق لي عمل بدل فاقد لما اتسحبت منه الرخصة وكان حيتحبس فيها لولا ستر ربنا.