الموضوع: كارينز فئة أولى أوتوماتيك ٢٠١٥

1-‬ بداية من الشراء، ذهبت إلى عربيات أمام الحامدية الشاذلية، لا مبالاة من مندوبهم، برغم جدية الشراء، واختيارنا لكل شيئ ومتابعة بالتليفونات، وباستهانة شديدة، مفيش اللون اللي حضرتك طلبته وشكرًا، تم الشراء من القصراوي، ومع الأسف عدم التزام بالمواعيد، وتحميل جمايل بعمل تخفيض رهيب (١٧٩،٥٠٠) تم إعطاء وعود بإضافة أي مواصفات للسيارة حيث أن الفئة الأولى كافية جدًا بالنسبة لي فقط أردت شيئان الزجاج الفاميه والبلوتوث، مع الأسف عند صيانة الألف أخبرني مركز الصيانة أنه لا يمكن إضافة أي مواصفات للسيارة، في نفس التوقيت صديق لي قرر شراء نفس الموديل لكن من سمير ريان، ذهبت معه، ناس ملتزمة جدًا بالمواعيد السيارات موجودة بكل ألوانها، نفس السعر اللي اتحملته بجمايل اشتراها بيه، دواسات هدية فواحات كوبونات بنزين، الحقيقة لو هفكر أشتري سيارة بالتأكيد هروح لسمير ريان.

٢- تجربة الألف الأولى، عند استلام السيارة استغربت من دبة العجل في المطبات (فضلت الفئة الأولى بسبب إن الچانت١٦ وليس ١٧ وده مع السؤال والقراية لقيته أفضل مع المطبات) وكمان السيارة بتعوم مع السرعة، ده كان سببه رفع الكاوتش إلى ٤٠ (مش عارف السبب ايه) بعد ظبطه على ٣٠ الدنيا اتظبطت كتير جدًا، لسه مجربتش الصراحة سرعات فوق ال ١٥٠ لكن لحد ال ١٤٠ ثابتة
الموتور هادئ جدًا، الاستهلاك فوق الممتاز لمرسى مطروح بتنك بنزين واحد، تكييف ممتاز، سيارة واسعة، الكراسي الخلفية اللي بتقفل وتفتح كنت معتقد أنها لن تتسع لشخص كبير، لكن بالتجربة اللي كان قاعد عليه كان مرتاح جدًا، جميع الكراسي تتحرك للأمام والخلف، وظبط الظهر أيضًا (عدا الكرسيين الأخيرين) الدركسيون خفيف جدًا (الصراحة لسه مش متعود على الرفاهية دي)، يوجد ٣ مخارج كهرباء مغطي السيارة كلها، واحدة أمامية في التابلوه، التاني في الكونسول لكراسي الوسط، وأخر في الآخر قرب الكرسيين الأخيرين في الشنطة، أماكن تخزين رهيبة خلف الكرسيين (في الشنطة) بين الكراسي الأمامية والوسطى، السحب جميل جدًا خاصة بالنسبة لسيارة كبيرة بهذا الحجم والوزن، الأنوار ممتازة، فيها ميزة جميلة جدًا مع الملفات بيزيد الإضاءة في اتجاه الالتفاف. ارتفاع السيارة لا بأس به، طوال الرحلة لمرسى مطروح لم أعاني مع أي مطب برغم تحميل السيارة كلها. مع توصيل الأيفون تعرف عليه مباشرة وبدأ تشغيل الأغاني مع تحكم جيد جدًا مع تبديل الأغاني والتحكم في الصوت من الطارة.

العيوب من وجهة نظري الحرارة زي معظم الكوري اللي شفته عالية بصفة عامة المؤشر قبل النص بحاجة بسيطة، بواخة من الشركة عمل خمس فئات وجعل الفاميه بعد الفئة التانية، بالرغم إن السعر مش قليل، يعني البلوتوث والفاميه والحساسات الخلفية مكانش هيكلفهم حاجة وبتنزل دلوقتي مع العربيات الصيني، تخيلوا مفيش وحدات رفع للزجاج، ولا جهاز إنذار، الشماسات الأمامية ليس لها أي لزوم، عرضها صغير لا يتناسب مع عرض الزجاج الكبير جدًا فهو لا يحجب أي شيء.

٣- الصيانة مع أول تجربة ممتازة، الدنيا كانت زحمة شوية (كيا أبو رواش) من الساعة ١ لحد ٤، لكن ناس محترمة، لدرجة غسلوا العربية من برة وجوه، حاسبونا (أنا وصديقي اللي اشترى من سمير ريان) على سعر الزيت والفلتر فقط بدون مصنعية فقط ٣٦٠ جنيه. استغربت عدم وجود اكسسوارات في التوكيل (دي أول تجربة لي مع توكيل، بالتالي لا أعلم إذا كان هذا طبيعي أو لا) اشتريت غطاء ليها ب ٢٧٥ جنيه، ولحد دلوقتي لسه عايز أجيب شبكة سقف مش لاقي.

المشاركة الأصلية كتبت بواسطة osamabahr

فيها abs فعلا وإيرباج واحد للسائق، الفئة التانية فيها اتنين للسائق واللي جنبه

الله يبارك فيك