الموضوع: تجربتي Note 4 ومقارنه مستخدم بينه وبين جهازى السابق Note3

النوت 4 النسخه المتاحه ف مصر هي نسخه الاكسينوس اوكتا كور 4 انويه بتردد 1.9 و4 انويه بتردد 1.3 ودى النسخه الاحدث من سلسله الاكسينوس واللي السنه اللي فاتت ف النوت3 مكنتش بنصح بيها نظرا لتفوق نسخه كوالكوم عنها اما السنه دى الوضع مختلف .
سامسونج علي كلام التقنيين والريفيوهات اللى اتعملت علي المعالج الجديد ده معظم النتائج كانت تفوق واضح لمعالج سام عن النسخه اللي جايه بمعالج كوالكوم وهي سنابدراجون 805 بتردد 2.7 جيجا هرتز وكواد كور بروسيسور .
المهم هو ليه انت اخترت النسخه دي من المعالح ومخترتش نسخه كوالكوم ...؟ رغم ثقتي الكامله في معالجات كوالكوم وشكي المستمر ف الارقام اللى سام بتطلعها على امكانيات معالجاتها الا انى كان لازم اختار نسخه الاكسينوس لان المعالج بيدعم بنيه ال 64 بت واللي حيكون مفيد الي حد كبير خصوصا مع نزول نسخه الاندرويد 5 الجديده . وده مش معناه ان اندرويد L لن يدعم ال 32 بت ولكن 64 بت اكيد بتوفر تطور واريحيه ان جهازك لن يشيخ في القريب العاجل .
المهم سيبنا من كل ده ونخش ع المفيد . طبعا وجهه نظرى وتجربتي دي شخصيه جدا ومش شرط تكون صح ولكنها ف النهايه تجربه حبيت اشاركها مع كل اللى مهتم بالنوت 4 او 3 .

الشكل : النوت 4 فعلا لاول مره تحس ان سامسونج عملت جهاز تخاف عليه وانت ماسكه ف ايدك من الشياكه واحساس الفخامه ف المسكه بتاعته . الاطار المعدن والحواف المشطوفه مغيره سياسه سامسونج ف البخل علي التصميم تماما بالعكس الديزاين نفسه متعوب عليه جدا والجهاز في منتهي الفخامه . مقارنه بالنوت3 ف موضوع التصميم ده والشكل الخارجي لا وجه للمقارنه علي الاطلاق .
حتي الغلاف الخلفى خامته تحسنت بشكل كبير وملمسه كمان باه افضل كتير من النوت 3 .

الشاشه : الجهازين حجم شاشتهم 5.7 بوصه والاتنين من نوع سوبر اموليد ولكن الفروق الرقميه ان شاشه النوت 3 بوضوح 1080 بيكسل وبتركيز 300 وكسور بيكسل لكل انش . اما النوت 4 فشاشته بريزوليوشن 2k او بيسموه الترا اتش دى او كواد اتش دى وده ريزوليوشن اربع اضعاف ال 720 p وبتركيز 515 تقريبا بيكسل لكل انش . رغم ان الفروق ف الارقام كبيره بين الاتنين الا اني متاكد ان نتيجه الشاشتين قريبه جدا من بعض نظرا لجمال شاشه النوت 3 وانها مش محتاجه تطور عن كده من وجهه نظرى وبالتالي من ناحيه الشاشه اكيد التفوق للنوت4 ولكن مش التطور الرهيب بالعكس هنا اشيد وارفع القبعه للعملاق النوت 3 نظرا للتقارب الشديد في جوده وجمال الشاشتين .

القلم: هنا باه نقدر نقول سامسونج عملت جهاز جديد تماما بجد يليق بسلسله النوت المميزه .الموضوع مش حيبقي مقتصر علي شكل الجهاز وخامته والكلام ده بأه لازم يبقي في تغيير ملموس ومحسوس من قبل المشترى في صميم شخصيه السلعه او فئه النوت تحديدا وده اللى سامسونج عملته فعلا في تطوير الاستايلس او القلم . مهما وصفت لازم ملاك النوت 3 او 2 او 1 حتي يجربوا حساسيه القلم الجديده علشان يدركوا قد ايه القلم ده باه ممتاز في كل الاستخدامات لدرجه انك حتحب تستخدمه تقريبا طول الوقت لانه بيعمل كل حاجه تقريبا .الكتابه بالقلم بقت دقيقه جدا وحساسه لخطك جدا جدا بصراحه من اكتر ما ابهرني في الجهاز حساسيه القلم وخصائص استخدامه ك ماوس ذكي . يعني الارقام انهم زودوا حساسيته الضعف مشديتنيش اوى لكن لما جربت عرفت النوت لازم يبقي قلمه عامل ازاى .

البطاريه : للامانه محستش بفرق بين النوت3 والنوت4 ف استهلاك البطاريه اعتقد ان الاتنين زى بعض بالظبط وكنت اتمني انهم يفكروا ف بطاريه تعيش اطول من كده لكن واضح ان الموضوع تسويقي بحت .

السوفتوير : على الرغم من سلاسه النوت3 المعهوده وتطور سامسونج ف تلافى عيوب التاتش ويز من فتره للتانيه ووضوح ده جدا ف النوت 3 برده التطور يمتد للنوت4 والجهاز سلس الى ابعد ما يكون ف التعامل والتنقل ما بين الصفحات ورغم ان النوت4 مليان خصائص مش موجوده ف النوت 3 الا ان الجهاز سلس لدرجه مريحه جدا . الفرق الكبير بين معالج النوت 3 وال 4 حيبان لما خصائص النوت 4 توصل للنوت 3 في التحديث الرسمي القادم للنوت ساعتها المقارنه حتوضح الفرق ان كان كبير ام لا.

الصوت والسماعات: بصراحه صوت السماعه اثناء المكالمات اصبح افضل مئات المرات عن سماعه النوت 3 وعلي الرغم ان سماعه التنبيهات خلف الجهاز الا ان صوتها اعلي وانقي بفرق كبير عن سماعه النوت 3 بصراحه التفوق هنا واضح للنوت 4 .

حساسيه الشاشه : حساسيه النوت 3 كانت ممتازه جدا والنوت4 حساسيته افضل بس مش الفرق الجوهرى .يمكن اللى معاه النوت 2 يحس بالفرق الكبير ده لكن اللى معاه النوت 3 معتقدش حيحس بفرق التفوق اللى انا مقتنع وحاسس انه موجود لكن بنسبه قد لا تكون واضحه للجميع .

الكاميرا : اخيراااا كاميرا عليها القيمه .مكنتش مقتنع بكاميرا النوت 3 بصراحه مش عارف ليه وكان عندي احساس طول الوقت ان ان صور ال htc one m7 اللى معايا صوره احلي كتيييييير رغم انه ده 4 الترا بيكسل والنوت كان 13 . المهم النوت 4 تفوق بيتهيالي علي كل الاجهزه السنه دى في موضوع الكاميرا ده لانه جمع ما بين كاميرتين قويتين جدا وصورهم جميله علي ابسط الاعدادات (الاوتو) يعني . الكاميرا الاماميه مميزه لاول مره سامسونج تعمل كاميرا اماميه مميزه والخلفيه ممتازه لابعد حد وتفوق واضح وصريح ف الكاميرا للنوت 4 .

الخط .....: اللهى تنشل ف معاميعك ياللي عملت الخط العربي لسامسونج قادر يا كريم :( بجد اى محتوى عربي علي الجهاز او اجهزه سامسونج تحديدا كفيل انه يبوظلك التجربه كلها . مفيش ازبل من خط سامسونج العربي .

الخلاصه . دى تجربتي البسيطه والجهاز برده لسه مبقالوش تلات ايام علي بعض بس مبسيبوش من ايدى تقريبا علشان كده حكمي علي البطاريه لسه مش كامل وان كنت متاكد انه حيكون زى النوت 3 وده يعتبر تفوق للنوت 4 بسبب ان شاشه النوت4 تستهلك طاقه اكثر بكثير (نظريا ) من شاشه النوت 3 لفرق الريزوليوشن للضعف تقريبا ما بينهم وبالتالى اللى حيقرا المقارنه البسيطه دى بيتهيالى حيقدر يحدد اكتر اذا كان يجيب النوت 4 ولا النوت 3 حيكون اكتر من منلسب لاحتياجه نظرا لانخفاض سعره وتميزه الفتره القادمه في مساله السعر دى .
اتمني اني اكون وصلت وجهه نظرى واسف على اى اخطاء املائيه بكتب من الموبيل للاسف لانى مسافر وبعيد عن الابتوب .

المشاركة الأصلية كتبت بواسطة mido_soliman

ايوه يا فندم بالضمان

تمام
شكراً جزيلاً