مطلوب تنظيف دائرة بنزين اوبل كورسا بالاسكندرية

**mahmoud_abdo** · 19-10-2014 11:37 PM

السلام عليكم
اخوكم جديد معاكم في المنتدي و جديد في العربيات عموما

عملت حاجه مش عارف كويسة ولا وحشه و هي اني اول عربيه اجيبها تبقي اوبل كورسا
بس فعلا انا اتعلمت سواقة عليها و شايفها عربيه محترمه جدا بس بحسها محتاجه حد فاهم جدا

الحمد لله لاقيت عربيه حالتها كويسة و ماكنتها نضيفه و فابريكه دواخل و جبتها
مشت معايا كويس في الاول و بعدين غلطت غلطة عمري اني في يوم التانك كان قرب يخلص مني بنزين و كسلت افول و انا راجع و قلت بكره الصبح اظبطها علي الرايق
لكن للاسف جيت تاني يوم بدورها مش بتدور و كان البنزين وصلل للمؤشر الاحمر
و ادورها كتير مش بتدور لحد ما جبت ميكانيكي مؤقتا جنب البيت دورها بعد ما فك القربه و كاركلها جامد جدا و في الاول قالي مشكلة بوجيهات و غيرتهم
و بعدها دارت و طول ما هي سخنه ماشيه زي الفل
جت تاني يوم الصبح برضوا اول ما ادورها تعمل نفس المشكلة و اكتر من حد قالي انها محتاجه تنظيف دايره بنزين لان كده لما سبت البنزين لحد الاخر سحب من الشوائب و سد اجزاء في دائرة البنزين و وصفولي حد في الحضره
دورناها بالعافيه و مشيت بيها و هي شبه مخنوقه لحد الحضره قالي لا انا شغال كاربيراتير بس و دي نص انجكشن ف مليش فيها

ف محدش يعرف ميكانيكي كويس بينظف دايره بنزين انجكشن و ياريت لو كان قريب من المنشية و محرم بك و العطارين في الاسكندرية

عشان انا كده مش بعرف اطلع بيها خالص الصبح لكن لما بتسخن بتبدا تمشي كويس و تبطلها و تدورها تاني بس برضو مخنوقة كانها بني ادم مقطوع عنه الاكسجين

**caeser** · 20-10-2014 12:37 AM

ياااااااااااة

**mahmoud_abdo** · 20-10-2014 12:56 AM

ياااااااه ايه :d

**windofchange** · 20-10-2014 01:23 AM

في من ليكوي مولي وجنك وشركات تانية منظفات بتتحط علي البنزين استخدمها الاول قبل ماتروح للميكانيكي بس عايزة بعد ماتحطها تروح بالعربية مشاوير وتحرق شويه عالغيار بقي وكده هتلاقي المنظفات ديه في الماركت بتاع البنزينة ومحلات الاكسسوار وانا افضلك منظف اسمه max44 لو لقيته اشتريه انا جربته واظن انه كان كويس والصفحة ديه بتوصل منتجات ليكوي مولي للبيت https://www.facebook.com/pages/XPRES...84653515011489

**mahmoud_abdo** · 20-10-2014 02:13 AM

بس الفكره ان العربيه مش بتدور اصلا الصبح لازم اكاركلها كتير جدا و خايف اخرب حاجه تانيه فيها كده بصراحه :d :d

**Hesham.H** · 20-10-2014 02:49 AM

غير فلتر البنزين ونضف مصفاه طرمبه البنزين والشوائب اللى تحتها هتلاقيها اتحسنت معاك وتروح لواحد ينضفلك الرشاش بالألترا سونيك
وكده نضفت دوره البنزين

**mahmoud_abdo** · 20-10-2014 03:09 AM

الف شكر يا باشمهندس هشام

**mahmoud_abdo** · 20-10-2014 03:34 AM

بس محدش يعرف حد عنده رشاش الترا سونيك في الاسكندرية ؟

**Hesham.H** · 20-10-2014 04:43 AM

المشاركة الأصلية كتبت بواسطة mahmoud_abdo

بس محدش يعرف حد عنده رشاش الترا سونيك في الاسكندرية ؟

اللى اعرفه ونظفت وعايرت عنده الرشاشات كان فى مدينه السادات ... استنى م عمرو السيسى او اى حد من زمايلنا فى اسكندريه

**amr elsisi** · 20-10-2014 09:43 AM

حلك انك تفك الطرمبة من مكانها
وتفضي البنزين الي موجود او امشي بية علي قد ماتقدر فضية
ونرجع نفك الطرمبة من مكانها وننظف التانك كويس
ونشوف خزنة الطرمبة ونظفها
دي اول حاجة
تاني حاجة عاوزك بعد لما تدور العربية تفك العمة وتشوف منظر البنزين وهوا نازل من الرشاش عامل اية