الموضوع: احترس من ورشه تجديد السيارات الشيخ و البطل في شارع المقريفي, موازي لشارع النادي الأهل

اتفقت على شغل سمكره و دهان مع وليد الشيخ في ورشه وليد الشيخ و هاني البطل في شارع محمد المقريفي, المنطقه السادسه , مدينه نصر بجانب النادي الأهلي.
1- قام وليد بتغير الإتفاق بعد يومين و طلب زياده في الفلوس بحجه انه ظلم نفسه في الشغلانه دي, طبعا واخد فوق متوسط الاسعار اللي سألت عليها
2- لم يقوم بسمكره المتفق عليه على الساخن, و اكتشفت انه بيدق على البارد وبعدين بيمعجن على طول عشان ماتخدش بالك, ولما اكتشفته و كنت بروح أبص على الشغل, ماكانش بيشتغل في العربيه غير في نص الليل و اروح تاني يوم الصبح الاقيه غطي مساحات كبيره من العربيه.
3- بعد اسبوعين من العذاب ده (رغم انه كان متفق على كل العمليه في اسبوع) قاللي روح إنت اشتري الدهان لكنه طلب 1/4 كيلو دهان زياده ونص كيلو ورنيش زياده؟ وطالب إني أنا ادفعهم (رغم إننا اتفقنا على كل شيء) طبعا كان صنفر العربيه و معجن فكان على الرضوخ لاستغلاله !
4- اتفق معايا على اسبوع شغل, اخد أكتر من اسبوعين ونص
5- تم تكسير كلبسات الشبكه الاماميه, و فانوس الاشارة و.. و.. وضياع كلبسات أخري .. وعند السؤال , قال وإيه يعني ده عادي , وروح اشتريلنا كلبسات من الحرفيين !!
6- المشكله الكبري إن بعد تحملي كل الفلوس الزياده اكتشفت انه سرق الدهان الزياده لأن العربيه ماكانتش محتاجة ورنيش زياده ولا دهان زياده (التكلفة 220 جنيه) اخدهم
مش بس كده, لأ , ده فهمني انه هيلمع العربيه كلها بالورنيش بعد الدهان لكنه قال لي بعد كده اللي ماتدهنش مش محتاج ورنيش (رغم إنه طلب 1/2 كيلو ورنيش زياده ودفعته من جيبي) و قال لي انه هيدي العربيه كلها ورنيش ) !!!
6- المصيبة الكبري, إن السمكره بانت بعد الدهان وظهرت عيوبها, و الدهان طلع زي الزفت و مبخ بخ و فيه فقاقيع هوا كييره وكتيرة عن الحد المعتاد, وبعدين قاللي ده بسبب الدهان اللي إنت جبته (رغم الدهان كان ماركه سكينس من وكيل سكينس في الحرفيين) .. طبعا كداب لأن سكينس أغلى وأحلى دهان. اكتشفت بعد كده انه كن لازم يصنفر بصنفره زيرو و يلمع بعدها
احذركم من التعامل معاه لأنه بيتفق على حاجات وبيكبر الشغلانه ومابيعملش اللي اتفق عليه, كمان اتفق على فك المقابض و الباكيتات قبل الدهان وبعدين قال لأ (رغم إني دفعت تمن فك وتركيب كل شيء عشان ميجيش عليها دهان) !!!
احذركم من التعامل معهم لاني اكتشفت إنه بقالوا في الشغلانه دي سنة واحده ومعندوش خبرة والصنايعية بيضحكوا عليه و يطلعوا شغل زي الزفت وهو بيكبر الشغل وبيوعد بالشغل ومبيعملش و بيسرق الزبون و الدهان .!!!
حسبي الله ونعم الوكيل ... بوظ العربيه الجديدة بالدهان و كسر كلبسات حاجات كتير و أخرني ضعف الوقت واتنطط عليَّ و اخد فلوس :) حذاري منهم, مكانهم امام أرض فاضية (بتبني) و ورشة صغيره ( شارع المقريفي موازي لشارع النادي الاهلي بمدينه نصر / شارع حسن مأمون, و ناصيه أول شارع يمين بعد سوبر ماركت مترو اللي في شارع النادي الاهلي (شارع حسن مأمون في اتجاه مصطفى النحاس(

ورشة سيئة وكانت بتاعة كاوتش اول ما فتحت وقلب بعد كدة ميكانيكا وسمركة ودوكو
للاسف معظم العاملين في مجال السيارات وبالاخص السمكرة والدهان بيعتبروها فهلوة والاساس الضحك علي الزبون ودة لية لاننا كلنا بنخاف علي شكل العربية وبيبان في عنينا الخوف غير انك وانت سايب العربية كانك سايب عيل من عيالك وهو بيلاعبك علي الوتر دة ويستغل لهفتك وخوفك مش عارف الواحد هيعمل اية شغل ميكانيكا بطلت خلاص اروح لحد وباعمل كل حاجة بنفسي والحمد لله كمان دوكو وسمكرة الامر لله نشتري عدة سمكرة وصاروخ تلميع وصنفرة ونشتغل كمان بتوع دوكو حسبي الله ونعم الوكيل في صنايعية البلد الحرامية وكل من استغل حاجة الناس
المشكلة فعلا في قلة اعداد الناس اللي بتفهم وتراعي ربنا في شغلها لدرجة الندرة وربنا يصلح الاحوال