الموضوع: تسريب ميه على السريع

السلام عليكم و رحمة الله و بركاته

اصدقائي و اخواني في قسم السيات
حابب النهارده اوريكو اختبار بسيط جدا و سهل و مش مكلف
ندخل في الموضوع

بقالي شهر كدا كل 5 ايام انزل اعبي قربة المية حوالي 2 لتر ميه ، و هكذا كل خمسة ايام اعبي
و لديق الوقت كسلت اعمل اختبار بسيط جدا و سهل اوي يبين لي بسرعة فين التهريب
فيه ناس بتستسهل و تروح تعمل كبس دورة .. اساسا كبس الدورة (غلط) و هتكلم عليه باستفاضه في وقت لاحق

المهم انا من عادتي كل 6 شهور بروح اغسل حوض الموتور بالكامل بالبخار ، فا قلت اجل موضوع الغسيل ده لبعد العيد و لغاية ما اعمل الاختبار ده علشان الغسيل بيشيل اثار الاختبار ( دي نقطه مهمه اوي)
يعني لما اجي اعمل الاختبار ده بلاش نغسل الماكينة نخليها كدا بترابها ( الكلام ده للناس اللي بتغسل زيي)

هتجيب جركن ميه خضرا /زرقا/حمرا .. اللي يقع في ايدك و سعره مناسب

تعبي ميه و تمشيلك كدا بتاع 500 كيلو مثلا .. طبعا فيه ناس تقول 500 كيلوا ايه ياعم
ايوا .. آه .... تعمل 500 كيلوا على 10 ايام على اسبوعين مش مهم و في نفس الوقت عينك ع المية كل ما تنقص تزود

بعد كدا هتيجي كدا في النور اللي من صنع رب العالمين ، الصبح يعني الحلو ده و تبتدي زي المحترم من عند الرادياتير من جوة تبص في لون محمر كدا منشع من مكان معين ، لو مافيش نمسك اللي بعده الدخل و الخرج ع لى الرادياتير منشع احمر
و هاكذا نتتبع خط سير المية على جسم المحرك و الخراطيم و .. و الخ

لغاية ما نعرف التهريب منين حتى لو ده هيخليك تنزل تحت العربية تبص تشوف بردوا

انا عملت الاختبار ده و حبيت اوريكو النتيجه بنفسي مع اني لسه ما صلحتوش لحد دلوقتي لديق الوقت ، مع العلم تصليحة مش هياخد 3 دقايق بس ، لكن الغاية انكو تشوفوا نتائج الاختبار ده بدون ما نروح و لا نيجي و لا كبس و لا هري .

دي صورة من خرطوم الخروج ع المكنة من عربيتي

[sor2]http://nileup.com/up/uploads/nilemotors_14138916671.jpg[/sor2]

و دي صورة اوضح شوية

حبيت اعمل الفحص ده موضوع كدا صغير و سريع للفائدة


نفسي بس علامة نايل موتورز تتشال من الصور اللي بنرفعها بصراحه منتهى السخافة يا شباب
تحياتي

المشاركة الأصلية كتبت بواسطة hossamalsadik

تسلم ايدك يا ابو الصلح
أنتا غاوى تغسل الحوض زى بس ايه موضوع البخار ده ديه ماكينه خاصه بيك ولا بتعمله بره

تسلم ا/ حسام على مرورك
موضوع غسيل الدوري ده بعمله في محطه غسيل عندمهم مكنه بخار بيكون كل ٦ شهور ، نفسي اجيب المكنه لكن الموضوع مش مستاهل لان اصغر حجم لمكنه الغسيل مش قليل و كمان مكلفه و احتياجه يكاد يكون معدوم
الحاجه المهمه في موضوع الغسيل ده انه له ضوابط
مينفعش اغسل المكنه (حتى بالبخار) في حين ان في المكنه عطل من اي نوع
٢- لو عندك تسريب و بتعمل الفحص بتاعه لازم تكون المكنه معفره بقدر الامكان علشان اللون يمسك مكان التهريب ، سعات لما المكنه تكون بترشح زيت ببقا مضطر اغسل المكنه كلها كويس علشان اقدر احدد مكان التهريب ( يعني شوف هنا لازم اغسل انما في تهريب دوره الميه لازم ما اغسلش ) وصلت كدا ؟؟
٣- انا بغسل المكنه بخار علشان اتفادى الاعطال الكهربيه ع الحساسات و ما شابه و في نفس الوقت واجب غسل المكنه علشان الغبار ده بيسبب تلف الويرات و الخراطيم (بينشفها) تقوم لما تيجي تصلح مافيش حاجه تقطم او تتكسر او ما شابه
الغبار مع الحراره مع رش زيوت بيعمل بلاوي ... انا بيجيلي عربيات اصينها قبل ما بشتغل بخلي صاحبه يغسل و يجيلي لو بعيدا عن موضوع التسريب في دوره الميه على وجه الخصوص لاني زي ما قلت بحتاج العفره في الشغل
٤- ما تغسلش المكنه ب ( بنزين - كيروسين - فوم اللي بيتباع في محلات - اي مزيب عضوي ) خطر جدا على الاسلاك و الوصلات الكهربيه و كمان بيحول العفرة لطينه مزيته.
نهايته .. غسيل الماكينه مهم جدا بس بالطريقه الصحيحه .. بخار او اضعف الايمان بالهوا

تحياتي