غسيل السياره

**ashrafwolf** · 31-10-2014 05:09 PM

عايزين ان شاء الله يا رجاله نعمل حملة مقاطعه لغسيل السيارات بالمياه الصالحه للشرب

الواحد مستحرم كمية المياه المهدره في غسيل السيارات و خصوصوا ان في بلدنا الحبيب -بلد النيل- فيه قري كثيره لا يصلها مياه صالحه للشرب

و ان شاء الله عايزين حل عملي بدل الغسيل

**hesham fawzy h** · 31-10-2014 05:13 PM

حرام فعلا المية الى بتضيع دى

الحل يا باشا مكنة البخار بتغسل العربية من جوة و برة بحوالى ليتر مية

**Abo_Mazen** · 31-10-2014 05:29 PM

إيه ده ..هي مصر فيها مياه صالحه للشرب ..تصدق أنا أول مره أعرف إن مصر كلها كده على بعضها فيها مياه صالحه للشرب ..المياه اللي عندنا في مصر غير صالحه لأي حاجه ..يا نهار..روح شوف أحواض مياه الشرب اللي موجوده ورا مستشفى جمال عبد الناصر عندنا في إسكندرية ..أقف بليل كده في بلكونه من بلكونات المستشفى هتلاقي أحواض المياه اللي بتروحلك منها المياه للبيت قدامك عدل..جنب مقابر اليهود مباشرة ..هتلاقي خفافيش بتنزل المياه ..وهتلاقي فيران بتجري ..هو موضوع الفيران ده بصراحه إتحكالي ..لكن الخفافيش أنا شفتها بعيني ..هي دي مياه صالحه للشرب ..هقولك إيه عن ريحتها ولا طعمها ..آه ..ما يدوب ..بنستخدم مياه إستعمال خفافيش ..المياه اللي في بلدنا غير صالحه للإستخدام الآدمي أصلا ..لاتصلح لغسيل ولا تصلح لأي شيء ..هي آخرها فعلا ..يتسقى بيها الزرع وتغسل بيها العربيات ..لكن بما إن مفيش غيرها فعشان كده إحنا بنشرب منها ..ورزقنا على الله

أنا مش بتريق ..أنا بتكلم بجد ..المياه الوحيده الصالحه للشرب في بلدنا هي المياه المعدنيه ..حتى دي عليها كلام

**ashrafwolf** · 31-10-2014 07:55 PM

شوف انت مش عاجبك مياه الاسكندريه طب و النبي لو نزلت اي محافظه تانيه كده يبقي اشرب من الحنفيه و قولي ايه رأيك
الخوف ان ربنا قادر ياخد النعمه من اللي مابيحافظش عليها