انا اجننت من العفشة وصوتها ومحدش عارف يشخص

**A.Saad** · 02-11-2014 06:44 PM

العربية نيو اكسنت
84000 كم

فيه صوت بان بعد ما دورت الكاوتش rotation
امشى على البطيء اسمع صوت تك تك تك تك
كأن الصوت من حاجة بتخبط فى الكاوتش
وفيه على السرعة العالية رعشة فى الدركسيون ومكان الدواسات
رصصت
الرعشة قلت اوى
بس صوت الخبط ده لسه موجود
رحت عند بتاع زوايا وعفشجى
واحد قاللى الكاوتشة اللى بين مسمار الميزان والميزان مزنوقة وعايزة تتغير
وعايز حشو علية دركسيون
التانى قاللى لا غير الميزان كله والمسمار بتاعه
وحشو العلبة مش بيتغير لانها باور

مش فاهم حاجة وتعبت
هل من مساعد
الصوت ده يكون ايه ؟؟
فيه حشو ولا لا لعلبة الدركسيون ؟؟؟
وهل احتاجه ولا لا ؟؟؟

**attaa11** · 09-11-2014 01:18 PM

هات كوريك تمساحه صغير .. وارفع العربيه ولف الفرده وشوف هتسمع صوت ولا لاء .. هتلاقي الطنبوره بتحك في حاجه .. وان شاء الله الموضوع بسيط .. لو لفيت الفردتين اللي قدام وملقتش صوت ... كرر العمليه مع الفردتين ورا ... ولو مافيش صوت كمان .. يبئا حاجه في العفشه .. بس انا عندي الصوت ده بسبب الجنوط .. في حك بسيط ف الطنابير وساعات اسمعه وساعات لاء

**Ayman-Ahmed** · 10-11-2014 08:45 AM

انا حصل عندى نفس الموضوع وبعد لف ومشاوير لاكتر من عفشجى.طلع الموضوع فى الاخر ان العجل مهوى.ولاقيت مسامير كتير تقريبا على الشعرة.فانصحك الاول تروح لبتاع كاوتش وتقوله يفك الفردة خالص وبعدين يركبها ويقرط وشوف.

**hassan777** · 13-11-2014 03:15 AM

اولا : كاوتش الميزان بتاع عربيتك ده ميخبطش الا لما يكون منتهى خالص ..
ثانيا : علبه الدريكسون بيتعملها اصلاح .. بس مش مجزى .. لو عندك مشكله فى عليه الدريكسون و انت اتاكدت من كده يبقى لازم تنغير ..
روح لاكتر من مركز ضبط زوايا و قوله انا عايز اكشف على العفشه فقط .. و كل مركز محترم هايكتبلك تقرير بحاله العفشه .. او الاجزاء الللى عايزه تتغير ..
و لو امكن ان انت تنزل معاه المجرى انزل و خلى اى حد يحرك الدريكسيون يمين و شمال من فوق .. و انت حط ايدك على منتصف علبه الدريكسيون .. لو العلبه هى اللى بتخبط هتحس بالخبطه فى ايدك ..
و ان شاء اللى تكون حاجه بسيطه ..
انا فنى ضبط زوايا و عفشه مش باقول اى كلام و خلاص :d

**A.Saad** · 15-11-2014 10:23 AM

الف شكر ليكم جميعا
انا فكيت الكاوتش
والميكانيكى قال انه سوستة التيل
بس شكل التشخيص مش صح

**A.Saad** · 18-11-2014 10:58 AM

رحت للعفشجى
العفشة محتاجة
مساعدين امامى : هما محجرين بس لسه مش سيل، اغيرهم ولا لا ؟؟
4 كاوتش الميزان
عامودين الميزان
2 بيض مقص
بارات داخلى وخارجى

هل اغير البيض والكاوتش فقط ولا اغير المقص كله
وهل المقص كله بييجى معاه كل البيض والكاوتش ؟؟