محتااااااااااار - ارجو المساعدة وبسرعة !!

**Eng_Keen_162** · 11-11-2014 07:00 PM

السلام عليكم ورحمة الله تعالى وبركاته
انا مبسوط انى بكتب اول مشاركة ليا فى المنتدى العملاق ده
وبحمد ربنا سبحانه وتعالى انى اتعرفت على المنتدى بمحض الصدفة وبقالى اكتر من شهرين بتابع يوميا كل حاجة فيه ( بس مكنتش لسه سجلت !! )
انا اسف لانى هرغى كتير شوية بس فعلا انا محتاج مساعدتكم وخبراتكم اوووووووووووووى

انا على قدى فى السواقة والعربيات - يعنى اول مرة اسوف كانت فى 2011
بس الحمد لله قدرت اتعلم بسرعة وربنا يسرهالى انى جيبت عربية جديدة ( شيفروليه نيو سبارك 2011 )
بفضل الله سبحانه وتعالى حاسس انى سوقت كويس فى فترة سريعة - طبعا مش شطارة منى بس ربنا بيسهلها لعبيده
والحمد لله العربية اللى معايا مش مزعلانى بالعكس انا بموت فيها مووووووت وحاسس انها - لا مؤاخذة كدا بالبلدى - مراتى التانية
لدرجة انى الحمد لله بسافر بيها كتير وعشان تتخيلوا بس انى دلوقتى وصلت بيها ل 75,000 Km والحمد لله ربنا ميسرها ومخليها مطيعة ليا واخر حلاوة لدرجة انى رحت بيها شرم الشيخ ورجعت وزى الفل بفضل الله ( نسيت اقولكم انى من بورسعيد )

بس طبعا الحلو مش لازم يكمل كالعادة
هى صغنونة حبتين وانا كنت عارف كدا طبعا وانا بشتريها بس قولت اهى هتقضينى انا ومراتى وابنى
بس الحمد لله ربنا رزقنى الحمد لله بابنى التانى - ربنا يباركلى فيهم الاتنين - فطبعا العربية بدأت تديق !!

المهم عشان انا عارف انى طولت اوى - بس حبيت اوضح ليكم الصورة كاملة

عشان كل اللى فات ده بقى - بدأت اخد قرار انى لازم ابتدى ادور على عربية اكبر عشان تبقى نقله كويسة وربنا يارب يوفقنى باذن الله

المهم قعدت اتفرج يمين وشمال
طبعا فى حاجات الواحد ما يبصش عليها احسن - زى المرسيدس والبى ام وكل الالمانى واللزى منه -
قولت اروح اشوف اليابانى - اجارك الله من اسعارهم - فاكيد جيبت ورا
مع العلم طبعا انى مش هركب غير زيرو حتى لو عجلة واحدة محسوبكم خبرته فالميكانيكا زيررررررررو !!

المهم بعد ما شوفت الكلام ده كله - بدات ايأس وقولت الحمد لله وتبارك الله فيم رزق واهو الحمد لله الواحد احسن من غيره كتير - على الاقل معايا اللى يودينى ويجيبنى !!

وبعدين وانا ع النت بدأت اشوف المنتدى هنا وبدأت احاول اقرى كتير فيه - بصراحة قمه فى المتعة والاعضاء قمه فى الاحترام

نيجى بقى للنقطة المهمة
بدأت اشوف تقارير العربيات واكتر تقريرين شدونى كانو ل :

عربيه M11 للاستاذ hemaa_82 f بجد مشكووووور الف سكر ليه على مجهوده الرائع

والتانية لل BYD للاستاذ أبو ياسمين قمة فى الروعة وقمة فى الخبرة الهايلة

وانا بقى بدأت احتار وبدات راسى تميل لل BYD اوووووووووووووى
لدرجة لما بلاقى عربية ماشية والله بفضل ماشى وراها حتى لو غير اتجاهى بس عشان اتفرج عليها
بس للاسف محسوبكم خجول شوية ما اقدرش اسأل اللى جواها
كمان اتصلت سألت التوكيل قالولى مش موجودة دلوقتى ولازم اروح احجز وممكن كمان يدينى العربية من غير مقدم !!
المهم انا خلاص هجيب نهاية الموضوع
انا نفسى حد يشور عليا اعمل ايه واجيب ايه !!
وانا هحاول اقولكم ظروفى والظروف اللى تسمح انى اجيب بيها العربية

1- طبعا زيرو
2- مساحتها مناسبة وواسعة من جوا
3- شنطتها تبقى كبيرة وتملى العين
4- اتوماتيك - حاليا انا عربيتى مانيوال بس عايز اريح عقلى بقى -
5- الامان - يعنى ABS وكدا
6- حركات من جوا - زى دى فى دى و تابلوت وطارة اوبشن وكدا
7- القسط لغاية 2500 ج لمدى 5 سنين - وباقل مقدم ممكن - وبصراحة يا ريت يكون بدون مقدم عشان مش عايز ابيع حبيبتى السبارك !!

ياريت تفيدونى وانا بتأسف جدا انى طولت عليكم كتير بس ده فقط لثقتى فيكم وانكم هتقدروا تفيدونى

والسلام عليكم ورحمة الله تعالى وبركاته

**eslam atia** · 11-11-2014 07:45 PM

اهلا وسهلا ومرحبا بك
ويسعدني اكون اول واحد ارد عليك ومن نفس محافظتك بورسعيد (بورفؤاد)
منوووووووووور يا باشا
لو بتدور علي حاجه في نفس سعر الصيني
عندك نيسان صني الشكل القديم وطبعا ياباني
عندك ميتسوبيشي لانسر كريستالة برضة ياباني ودول فيهم وسائل الامان (ABS+Air bag(
وممكن الفيرنا وتجيبها اوتوماتيك طبعا وانت شايف بقت منتشرة زي الرز في البلد
انما الصيني مش هقدر افيدك فيه
وربنا يوفقك لما فيه الخير

**Eng_Keen_162** · 11-11-2014 08:00 PM

المشاركة الأصلية كتبت بواسطة eslam atia

اهلا وسهلا ومرحبا بك
ويسعدني اكون اول واحد ارد عليك ومن نفس محافظتك بورسعيد (بورفؤاد)
منوووووووووور يا باشا
لو بتدور علي حاجه في نفس سعر الصيني
عندك نيسان صني الشكل القديم وطبعا ياباني
عندك ميتسوبيشي لانسر كريستالة برضة ياباني ودول فيهم وسائل الامان (ABS+Air bag(
وممكن الفيرنا وتجيبها اوتوماتيك طبعا وانت شايف بقت منتشرة زي الرز في البلد
انما الصيني مش هقدر افيدك فيه
وربنا يوفقك لما فيه الخير

الف شكر ليك يا باشا على ردك الجميل
على فكرة انا كمان من بورفؤاد - يعنى مش بلد واحدة - حته واحدة كمان

بالنسبة للنسيان انا استبعدتها لكذا سبب
اولا اسمع ان صاجها ضايع - حتى لو حد سند عليه -
ثانيا شكلها ضايع
وثالثا امكانياتها مش قد كدا
الميتسوبيشى برضوا بصراحة شكلها وقعدتها من جوا ما دخلتليش من زور - انا شوفتها عن معرض اوتو سمير ريان فى القاهره وركبتها بس بصراحة مش اللى فى دماغى
الفيرنا بصراحة مليانة بس كلها تاكسيات وانا مش بحبزها ده غير انى سمعت عليها كلام مش تمام على الثبات ومحسوبك بسافر كتير وفى اى وقت ممكن تضرب فى دماغى انى اسافر !!

بالنسبة للصينى واليابانى
بصراحة انا شخصيا ما عنديش العقدة دى يعنى مش تفرق معايا
لانى ببساطة سافرت قبل كدا ورحت اليابان ولا قيت ان 90% - لو مكنش اكتر - من اجهزتهم الكهربائية من الصين !!!!! -

انا مش هقولك انى واخد قرار انى اجيب صينى - بس لو بعد اللى بدور فيه دلوقتى واتاكدت انى مش هلاقى مشاكل بعد ما اشترى - فمعنديش حوار عقدة الصينى دى

كمان مرة شكرا ليك يا باشا على ردك واهتمامك

وادعيلى الاقى حد ينورلى طريقى

**eslam atia** · 11-11-2014 08:55 PM

بورفؤاد كمان ماشاء الله
يبقي اكيد شوفتك اوركبت معايا لان أهل بورفؤاد يعرفوا بعض
علي فكرة النيسان صاجها متين وفيها وسائل آمان ، بس أزواق بقي
وحكاية ثبات الفيرنا انه بعد ال 120 ضايع ، فلو حضرتك قرأت قانون المرور الجديد هتعرف ان اللي هيعدي السرعة المحددة هيتعاقب تقريبا 90 ك\س في السفر فعموما الجري ملوش لازمة دا حتي انت علي دراية بالطرق
في بورسعيد وبورفؤاد ( التفريعة - الحرفيين - نادي الجامعة - الشعراوي ,,,, كل الطرق مكسرة )
انما لو هيا مش داخلة دماغك فدي حاجه تانية
وانا مش بعيب في الصيني ، بس احنا معندناش ميكانكية بيشتغلوا عدل ، فهتكون عربية جديدة عليهم وحقل تجارب لاي حاجه صغيرة
شوف الافيو - الاوبترا - الاتراج - نيسان سنترا ولك حرية الاختيار
وشوف برضة الجيلي امجراند بس مانيوال منزلش اوتوماتيك منها
وm11 عربية تحفة والله العظيم ماشاء الله عليها
وربنا يباركلك فيها مقدما ان شاء الله واللون النبيتي منها تحفة فنية مع الفرش البيج
دمت في حفظ الله

**J A G U A R** · 11-11-2014 09:24 PM

اعتقد بيرسونا مناسبه

**Eng_Keen_162** · 11-11-2014 10:02 PM

المشاركة الأصلية كتبت بواسطة j a g u a r

اعتقد بيرسونا مناسبه

شكرا يا باشا على ردك ونصيحتك
فعلا دى من العربيات اللى جت فى دماغى
بس للاسف معرفش عنها اى حاجة ده غير انى بشوفها قليل اوى
لو عندك معلومات عنها ياريت تزودنى بيها

**J A G U A R** · 11-11-2014 10:13 PM

المشاركة الأصلية كتبت بواسطة eng_keen_162

شكرا يا باشا على ردك ونصيحتك
فعلا دى من العربيات اللى جت فى دماغى
بس للاسف معرفش عنها اى حاجة ده غير انى بشوفها قليل اوى
لو عندك معلومات عنها ياريت تزودنى بيها

العربيه ماتور وثبات وامان وصاج وكماليات كويسه وواسعه وده كله حضرتك طالبه

قطع غيارها مش منتشره بشكل كبير وغاليه نسبيا وتقيله فى البيع وتقفيل وخامات مش كويسه

**J A G U A R** · 11-11-2014 11:38 PM

المشاركة الأصلية كتبت بواسطة eng_keen_162

شكرا ليك يا باشا على ردك ومعلوماتك الجميلة
ان دورت عليها على النت مش لاقى غير شوية صور ليها
بس مش عارف حاسس ان الكابينة ما تشدكش - يمكن لو ع الطبيعة يبقى فى كلام تانى

بس عندى سؤال
فى رأيك لو قارنت بينها وبين byd l3
تفتكر انهى احسن ؟؟؟؟؟؟

معلش انا اسف بس العربية دى واكله دماغى وبتزن عليا اووووووى

انا حاجة واحدة بس اللى مخوفانى فيها
ان من الكلام اللى منتشر على النت حاسس ان كل واحد بيستلم عربية زيرو منها بيلاقى فيها مشكلة
اه ممكن تكون بتتحل مع اول صيانة بس بالنسبة ليا صعب انى جايب حاجة زيرو والاقى فيها مشكلة !!
بصراحة خايف يحصل معايا اقفل منها
معرفش ممكن اوى يكون ده قلت خبرة منى خاصة انا جيبت عربية واحدة وزيرو
والحمد لله ما اشتكتش منها لغاية النهاردة فى مشكلة تصنيع واحدة
طبعا غير الحوارات العادية بتاعت التيل والكاوتش والحوارات دى الطبيعية مع الاستهلاك

مش عارف بقى الكلام الكتير اللى شوفته ده هل هو ممكن يكون ناس بتبالغ -بالبلدى كدا حنبلية - ولا عندهم حق ؟؟؟؟؟
ولا ممكن يكون ده الطبيعى - بالبلدى ممكن يحصل فى احسن العائلات - وانا اللى مش عندى خبرة

شور عليا !! :_alshmokh22[1]:

byd l3 تعتبر لسه متجربتش ومش معروفه كويس زى اختها f3 الناجحه ده غير ان انا شوفت خبر ان انتاجها اتوقف بس مدخلتش فى تفاصيل .. والبيرسونا عربيه متجربه ومعروفه اكتر فعلشان كده منصحكش اوى ب l3

وبالنسبه للمشاكل دى طالما بسيطه متزعلش .. وطالما بتتحل فى صيانه ال 1000 او 5000 يبقى خلاص مفيش قلق ان شاء الله بس برضه متشتريش غير لما العربيه تتجرب ويتعرف كل اللى فيها