هي صيانة 120 تعتبر من نفس عائلة 40 و 80 و اللى لازم يكون فيها فحص شامل للعربية و اما بالنسبة للتغييرات فحضرتك كتبت معظم الحاجات بس ماكتبتش فلتر البنزين
بالإضافة للتغييرات دى بيبقى جميل جدا لو اللى يعملك الصيانة ينضفلك البوابة بالاسبراى و كمان حساس الايدل بيفرقوا كتييير جدا
انا بفضل بالنسبة لمية الرادياتير انك تعملها عند بنزينة يكون عندها ماكينة تنظيف الرادياتير او حد تكون عنده و كمان تخليه يفك القربة و يغسلها من الشوائب و يفضل يغسلها بالرمل و ماء النار المخفف كده تشيل اى وساخة في القربة
بالنسبة للتكييف برضه يفضل تروح لحد متخصص لان نادرا لما تلاقى مركز صيانة و عنده وحدة تكييف متطورة لقياس ضغط الفريون أما بخصوص الصوت فيفضل عمل الصيانة الميكانيكية أولا و تقوله على الصوت ده و ان شاء الله يروح بالصيانة الميكانيكية
كمان ابقى اطمن على شحن البطارية و كفاءة الدينامو عند كهربائى كويس عشان انهيار البطارية المفاجئ بيبقى بايخ قوى و بيأثر على سرعة استجابة دوران المارش و العربية باردة. كمان خلى الكهربائى يغسلك القواطيش بمية نار و يشحمها عشان كفاءة التوصيل و يشيك على المية لو سايلة.
بالنسبة للرشاشات ممكن تغرم مرة يكون التانك اقل من نصه و تضحى و تمون بنزين 95 ده بيفوق العربية جامد و بينظف الرشاشات و مش خطر على العربية و بيمتعك شوية بزيادة سرعة العربية بس تأثيره بيفضل بنظافة الرشاشات فترة كويسة
نصيحتى انك تروح لمتخصصين في كل بند و ماتروحش مركز بتاع كله من ناحيتين لانك هتعرف تتابع عربيتك و تاخد خدمة من متخصص و هتوفر انك بتدفع مباشرة للصنايعى اللى هيبقى عايزك تبقى زبونه و يكرمك اول مرة و يعملك شغل كويس
انا كنت عملت صيانة 80 الف في احد المراكز المعتمدة و على ما اذكر دفعت الفين و شوية شامل قطع الغيار بس ماكنتش مبسوط لانى مثلا لقيت مية الرادياتير لونها بقى اصفر بعد كام شهر و الرواسب في قربة المية ماتغيرتش و كمان بعد كام شهر لقيت زيت الفيتيس الاتوماتيك بقى اسود فقررت ماروحش مراكز تانى و اعمل الحاجة واحدة واحدة عند ناس متخصصة حتى لو اخدت منى كذا يوم
طبعا مش محتاج اوصيك على العفشة لان ده بند لوحده و ممكن بتاع زوايا محترم يكشفلك عليها او عفشجى امين يشوفلك المساعدين و جلب المقصات.
المفضلات