تقرير عن اوكتافيا a7 علشان الافتراءات المستمرة عليها

**ahmed sa3ed** · 14-11-2014 11:30 PM

السلام عليكم
الكلام كتير على الاوكتافيا a7
وللاسف كله كلام مرسل + ومعلش فى الكلمه فتى
دلوقتى بعد ما عملت بالعربيه 6000 كيلو
ااقدر احكم عليها كويس
علشان بس الناس الى بتقول بطه والى بيقول بتخسع مع التكيف وكلام فاضى

عموما العربيه 1600

الموتور مطور عن موتور الفانتازيا
بقى 110 حصان 16 صباب على وزن 1250 بيخلى التسارع بتاعها من 0 ل 100 فى 12 ثانيه وعند التجربه اكثر من مرة الرقم ااتكسر ب 11.5 ثانيه
اين البطه الى يلاقيها يقولى

الثبات
الهاندلينج والثبات بتاع العربيه ممتاز ولا يقل عن الفانتازيا فى شيء ويمكن افضل بسبب خفه الوزن الى مديه تحكم سلس فى العربيه طيب العفشه التورشين دى اثرت فى ايه

العفشه التورشين ماثرة فى الطرق المكسرة بتخلى العربيه فيها اشبه بالتنطيطه ورا ودى مش موجودة فى الفانتازيا

العزل
عزل صوت الموتور جيد
عزل صوت الكاوتش جيد جدا
عزل الهوا متوسط
عزل الصوت متوسط
اجمالى العزل متوسط كان ممكن يكون فى احسن من كدا

طبعا مميزات العربيه
الوسع
ومساحه الشنطه الكبيرة
والخامات المستخدمه اكثر من رائعه
الارتفاع عن الارض ومبتحكش نهائى حتى لو محمل 5 فى العربيه
خاصيه الاوامر الصوتيه والشاشه التاتش عاملين شغل كويس اوى
تكيفها تلاجه وبجد كان مفاجئه لكل الى اشتراها
فراملها احلى ما فيها

العيوب
العفشه ناشفه
نقلات الفتيس يدوب محسوسه خصوصا فى النقلات الاولى بس بعد اول صيانه تقريبا بتختفى
كنت اشتكيت قبل كدا من اصوات تزيييق فى التيل وانا بركن الصوت دا دلوقتى تقريبا اختفى مبيظهرش غير لما بغسل وبقى بسيط مش زى الاول

رجاء رجاء رجاء الى معهوش العربيه ميقلش الى ميعرفوش
العربيه لا بتخسع مع تكيف
ولا ثباتها وحش
والى مش عاجبوا سعر العربيه ياريت يجبلى نفس الامكانيات بسعر ااقل ب 50 الف بدل ماهو عمال يقول حرام فيها الفلوس

تحياتى للجميع

**طارق _عبد السلام** · 14-11-2014 11:38 PM

يااااااااااااااااااااااه كل دى عيوب ومع ذلك العربيه ماشاء الله منشره جدا :)

يافندم العربيه زى الفل ماشاء الله ربنا يبارك لك ويعطيك خيرها ماركه اثبتت وجودها وكفائتها ولها عشاقها

واللى مش حاببها ميهتمش بيها ويريح نفسه وميشتريهاش

**mnashat77** · 14-11-2014 11:48 PM

العربيه لا غبار عليها ومعروف عن سكودا عنها ثباتها
وعلي فكره خامات التابلوه جميله جدا وتقفيلها رائع
العربيه مش بتعتي بس ركبتها وعجبتني
ربنا يحفظهالك

**islam_gamal50** · 15-11-2014 12:09 AM

يا استاذ احمد اتمتع بعربيتك وسيبك من كل التعليقات السلبية ... لو هتركز على كل حاجه هتتعب ... مالقوش في الورد عيب ... دي مرسيدس مش بتسلم من الانتقادات مفيش عربية كاملة واللي مش عاجباه اوكتافيا مايجبهاش

**smartmina** · 15-11-2014 12:15 AM

100 100 يا باشا الله ينور يا ابو حميد ... بس شكلك شايل من موضوع التكييف دة اوي

**elnakib5** · 15-11-2014 12:20 AM

كلامك مظبوط العربيه ممتازه وفعلا الخامات ممتازه جدا والوسع والموتور 1600 سحبه والتسارع بتاعها جيد جدا وأفضل من الفانتازيا والتكيف شغال أو واقف مفيش فرق العفشه فعلا ناشفه بس معمره وده من رائي مش عيب في العفشه عيب طرق

**ahmed sa3ed** · 15-11-2014 12:41 AM

احلى حاجه انكوا مبسوطين منها وربنا يديكم خيرها ان شاء الله

**Sherif Lotfy** · 15-11-2014 01:03 AM

بالنسبه لتمستوى العزل اللي حضرتك بتقول انه متوسط . هل هو في مستوى عزل الفانتازيا ولا اقل ؟ و لو حضرتك مركبتش فانتازيا ممكن تقارنه بأي عربيه تاني كنت راكبها . شكرا جزيلا