الموضوع: جربت تحب عربيتك؟؟

أولا السلام عليكم ورحمة الله وبركاته..
ثانيا أنا مش عارفه الموضوع ده المفروض يتكتب فين بس أظن ان هنا أنسب حاجه
ثالثا أنا ممكن أرغي من غير ما آخد بالي فمن غير تهزيق لو سمحتوا
رابعا ندخل بقى في الموضوع؟؟
السبب اللي خلاني أكتب الموضوع ده هو ان انا شفت قدامي ناس كتيييير بتتعامل مع عربياتهم بطريقه غريبه جدا!!
أنا معايا دايو نوبيرا أوتوماتيك.. حاجه كده بتجيب من 0-100 في 25 ثانيه مثلا.. إن مكنش أكتر
بس بجد حب حياتي و أول عربيه أركبها وهيفضل ليها مكان في قلبي محدش أبدا هيقدر ياخده
مش بأفور والله بس انا مش فاهمه ليه الناس بتتعامل مع عربياتها مثلا انها جماد مبيحسش ولا بيفهم ساعات يحملوها فوق طاقتها وساعات يقللوا من قدراتها ومحدش فيهم جرب يفهم عربيته
في ناس أكيد فاهمه انا بتكلم في إيه وناس تانيه بتبص للي قاعد جنبها "دي عبيطه ياسطى.. قال احس بالعربيه قال"
كل واحد في الدنيا ليه معتقداته انا عن نفسي أؤمن إيمان تام ان الجماد بيحس و بيفهم وبيرد كمان بس بطريقته
بدليل ان ربنا قال ان الصخر بيسبح بإسمه صح؟؟
طب حاجه تانيه.. عمرك ما دخلت مكان استريحتله متعرفش ليه؟ او مكان عمرك ما رحته أبدا بس مقفول منه كده من غير سبب؟؟ طب مفكرتش ليه؟؟ مش يمكن عشان الحاجات اللي فيه او حتى الأرض والحيطان هيا اللي محسساك بكده؟؟
أنا من الناس اللي فعلا مجانين عربيات وسواقه بعشق كل حاجه عن العربيات بمعنى كل حاجه
كل يوم بمشي 140 كيلو بقالي 3 سنين دلوقتي ودي الحاجه الوحيده اللي مصبراني على الجامعه المستفزه اللي انا فيها دي اصلا
هيا فعلا عربيتي ممكن متكونش احسن عربيه في الدنيا "احم.. اكيد مش أحسن عربيه في الدنيا" بس عمرها ما خذلتني في موقف انا محتاجاها فيه.. عمري ما طلبت منها تشد ع الطريق عشان تنقذني من موقف إلا و ادتني فوق طاقتها.. وعمري ما دوست على الفرامل وانا الأدرينالين انفجر في كل عروقي الا وانقذتني وفرملت قبل ما تحصل كارثه
مع ان مش طبيعي منها انها تفرمل كده أو تشد كده أو ال acceleration بتاعها يبقى كده بس هو بقى كده يوم ما فعلا احتاجته
في مواقف حصلت معايا على الدائري عمري ما كنت هعدي منها و اقعد اكتب الموضوع ده إلا بفضل ربنا أكيد و عربيتي اللي فاهماني و عارفه انا امتى بحتاجلها تديني كل اللي عندها وفعلا بتنفذ
انا بس كنت عايزه اوصلكوا حاجتين..
اولا: حب عربيتك بجد و شجعها و هتديك فوق ما تتخيل.. حاول تحس بيها اسمع صوت ماتورها كإنه بيكلمك اعرف هو عايزك تريحه ولا تدوس عليه و لا محتاج منك إيه.. متهنش عربيتك أبدا كفايه انها مستحمله طرق البلد يا أخي!!
و ثانيا: لو شفت واحده بتبوس دريكسيون العربيه بعد ما تاخد غرزه الله أعلم خدتها ازاي أو بتطبطب علىها كده بمعنى " u go girl" متتريقش عليها عشان غالبا هتبقى أنا

عندك حق انا بردو بحب عربيتى جدااااااا فيكترا 99 وساعات لما ببص عليها بحس انها بتتكلم وبتفهم وبتستحملنى لما بهمل فى الصيانه