أول مشاركة ليا واوعدكم مش هسأل كورولا ولا فلوانس

**ROLAND** · 29-11-2014 02:34 AM

السلام عليكم جميعا ,, دى اول مشاركة ليا فى المنتدى المحترم ده واتمنى الاقى عندكم الرأى والنصيحة
انا مش هاطول عليكم وهادخل فالموضوع على طول علشان اسألتى كتيييير ,, اناعايز اشترى عربية زيرو بالمواصفات التالية :
1- شكل شيك وفخم خارجيا وداخليا
2- اعتمادية عالية وقلة أعطال وخصوصا انى مش بفهم اى حاجة فى الميكانيكا
3- توكيل محترم فى التعامل والصيانات وتوافر قطع الغيار
4- سحب واستجابة للتسارع ممتازة او جيدة جدا رغم انى مش شاب بس مش بحب العربية البطة وبالمناسبة لازم تكون اتوماتيك
5- الأوبشن اللى تهمنى هى اوبشن الأمان فى المقام الأول زى ال ABAS -EBD - BA وبالتأكيد ال Air Bag لا تقل عن اتنين
6- اما باقى الأوبشن الأساسية بالنسبة لى center lock ومانع السرقة وكاسيت CD &USB عجلة قيادة Multifunction وfog light ومرايات كهرباء ضبط وضم
7- طبعا باقى الأوبشن خير وبركة بس اقصد اقول انها مش فارقة معايا لو مش موجودة
8 - اسعار قطع الغيار حاسس انها ماينفعش تكون محل مقارنة علشان كل قطع الغيار فى الزيرو فى مصر غالية والفروق بينها مش كبيرة الا طبعا لو كان فيه ماركة اسعار قطع غيارها غالية بفرق كبير اكيد لأ تفرق معايا طبعا
9- سعر اعادة البيع مش مهم نهائى بالنسبة لى وارجوكم عدم اعتباره نهائيا كعامل مقارنة انا عايز اشترى عربية اركبها واتمتع بيها مش هاشترى عربية علشان افكر فى بيعها قبل ما اركبها
10- كنت حاطط ميزانية 200 ألف كحد اقصى وده كان بيخلينى بقارن بين الكورولا الفئة الثانية والفلوانس والأسترا وبعد تفكير طلعت الأسترا بره الحسابات وفضلت كالعادة الكورولا والفلوانس ومش هاسألكم كورولا ولا فلوانس علشان ده اكتر موضوع اتكتب هنا وكله قال كورولا ولكن سؤالى اللى محيرنى جداااااااااااا بعد الرغى ده كله هوه الأتى :
بعد ماسمعت ان الكورولا الفئة التانية بقت 197 ألف (ومش عارف ده صح ولا لأ )وعرفت ان فيه عربيات محترمة كتير سعرها مابين 170 ألف و 175 ألف ومنهم الفلوانس برضه والسوبارو أمبريزا واللانسر شارك والنيسان سنترا بقيت محتار جدااا ورجعت أسأل نفسى معقولة الكورولا تستاهل فرق سعر حوالى 20 او 25 ألف جنيه وايه اللى يخلينى ادفع الفرق ده لو ممكن اركب عربية بسعر اقل ومحترمة وفيها قدر من الأوبشن برضه ,, ارجوكم محتاج النصيحة ضرورى جداااااااا انهى قرار هوه الصح اشترى عربية فى حدود 175 ألف وده يبقى احسن استثمار للفلوس ؟ وطبعا يبقى جزاكم الله كل خير لو نصحتونى انهى عربية فيهم احسن بالنسبة لى بالأعتبارات اللى تهمنى واللى انا كتبتها فى الأول (فلوانس -سنترا - امبريزا - شارك)
ولا الصح ان الكورولا تستاهل فرق السعرده و اجيبها؟؟؟؟

**Ayman_saad** · 29-11-2014 02:47 AM

شوف حضرتك ، أنت قولت أهم حاجة وهي إنك مش مستني ( أعادة البيع ) أحييك بشده علي التفكير المحترم ده ،
نرجع بقي لموضوع الأختيار ، طبعا فيه عربيّات كتير في مستوي السعر ده ،
طيب معلش تفكيري هيشطح شوية وأقولك : حضرتك بصيت علي ستروين c5 ؟
هتبقي راكب عربية كماليات وأمان وجودة أوروبية وشكل عصري ،
لكن كورولا أو فلوانس كده هتبقي ماشي مع التيار وخلاص لكن لو فكرت لبعيد شوية ممكن تقتنع بالفكرة .
ربنا يوفقك

**ROLAND** · 29-11-2014 03:03 AM

اولا اشكر حضرتك على ردك وبالعكس انت لو قريت كلامى انا ماقلتش خالص كورولا ولا فلوانس انا بفكر فى احسن استثمار للمبلغ فى عربية تجمع المواصفات اللى انا بدور عليها وكأنى بسأل مثلا لو مش كورولا يبقى ايه وهاكون صريح معاك انى ماحاولتش اجمع اى معلومات عن الستروين ,, بس افهم من كلام حضرتك ان رأيك ان بدون ميزة اعادة البيع يبقى الكورولا ما تستاهلش فرق السعر ده ؟؟

**MoMo_77** · 29-11-2014 04:29 AM

شوف يا باشا هي الفروقات مش كبيرة قوي في رينج السعر دة
و الموضوع بيرجع لأولويات المشتري
و ممكن تزود حاجة بسيطة و تشوف الاوكتافيا a7 الفئة التانية
لكن الكورولا تتفوق علي العربيات اللي حضرتك ذكرتها في قوة الموتور و السحب

**محمود عمر** · 29-11-2014 07:50 AM

سحب الفلوانس أصبح أكثر من رائع بعد ما غيرت الموتور والفتيس والعربية بمجمع ما بين اوبشن الكوري واعتمادية الياباني لأن الموتور والفتيس والتكييف ياباني وكمان بتجمع فخامة الأروبي ده غير أنها عالية ومش بتدايق في المطبات مهما كانت عالية...عربية عائلية لانها واسعة جدا وأكبر شنطة وأحسن توكيل في مصر وكل ده مقابل سعر ممتاز.... وكويس انك صرفت نظر عن الاسترا

**محمود عمر** · 29-11-2014 08:01 AM

حتى أسعار قطع غيار الفلوانس ممتازة يعني مثال بسيط سعر فانوس التويتات 5000 وشوية وسعر فانوس الفلوانس 2000 وشوية والفلوانس من جوة اشيك كتير من التويوتا أما من برة دي ازواق بس انا شايف الفلوانس افخم كتير عشان كده انا شايف ان فرق السعر في صالح الرينو بس لو حتجيب رينو فلوانس خليك في آخر فئتين لانهم افخم كتير من جوة

**ahmzd** · 29-11-2014 08:08 AM

المشاركة الأصلية كتبت بواسطة محمود عمر

سحب الفلوانس أصبح أكثر من رائع بعد ما غيرت الموتور والفتيس والعربية بمجمع ما بين اوبشن الكوري واعتمادية الياباني لأن الموتور والفتيس والتكييف ياباني وكمان بتجمع فخامة الأروبي ده غير أنها عالية ومش بتدايق في المطبات مهما كانت عالية...عربية عائلية لانها واسعة جدا وأكبر شنطة وأحسن توكيل في مصر وكل ده مقابل سعر ممتاز.... وكويس انك صرفت نظر عن الاسترا

فعلا الفلوانس بقت اختيار ممتاز في فئتها السعرية، بل أحسن اختيار بلا مبالغة، وطبعا هتبقى ماشي مع السوق ودي ميزة تانية، أما لو عايز تتنقل نقلة تانية خالص فالسيتروين c5 دي نعم الاختيار.. والله أعلم.

**ROLAND** · 29-11-2014 04:53 PM

المشاركة الأصلية كتبت بواسطة momo_77

شوف يا باشا هي الفروقات مش كبيرة قوي في رينج السعر دة
و الموضوع بيرجع لأولويات المشتري
و ممكن تزود حاجة بسيطة و تشوف الاوكتافيا a7 الفئة التانية
لكن الكورولا تتفوق علي العربيات اللي حضرتك ذكرتها في قوة الموتور و السحب

يعنى فى رأيك انت شايف ان الكورولا تستاهل فرق 25 ألف جنيه بينها وبين الموديلات اللى انا قلتها

**ROLAND** · 29-11-2014 04:59 PM

المشاركة الأصلية كتبت بواسطة ahmzd

فعلا الفلوانس بقت اختيار ممتاز في فئتها السعرية، بل أحسن اختيار بلا مبالغة، وطبعا هتبقى ماشي مع السوق ودي ميزة تانية، أما لو عايز تتنقل نقلة تانية خالص فالسيتروين c5 دي نعم الاختيار.. والله أعلم.

بالتأكيد لو مش كورولا يبقى فلوانس (مع اغراء سحب الأمبريزا والشارك) علشان كده انا محتار ليه فرق 25 ألف بين الكورولا والفلوانس e3 مثلا ؟؟ بس قريت حاجة فى منتديات الفلوانس من اصحاب العربية دى ان التوكيل بيحط زيت موتور غير مناسب للعربية وبيخللى صوت الموتور عالى لمجرد ان رينو شريك فى توتال ولازم تستخدم زيوت توتال اجبارى ؟؟

**ROLAND** · 29-11-2014 05:03 PM

المشاركة الأصلية كتبت بواسطة محمود عمر

سحب الفلوانس أصبح أكثر من رائع بعد ما غيرت الموتور والفتيس والعربية بمجمع ما بين اوبشن الكوري واعتمادية الياباني لأن الموتور والفتيس والتكييف ياباني وكمان بتجمع فخامة الأروبي ده غير أنها عالية ومش بتدايق في المطبات مهما كانت عالية...عربية عائلية لانها واسعة جدا وأكبر شنطة وأحسن توكيل في مصر وكل ده مقابل سعر ممتاز.... وكويس انك صرفت نظر عن الاسترا

على منديات الفلوانس فيه واحد عمل test drive وبيقول ان العربية بطيئة جدا فى التجميع وبالتالى فى التسارع رغم انى اعتقد ان الفلوانس والكورولا نفس الفتيس ال CVT ( على فكرة انا مش متأكد وياريت حد يصلح لى لو انا غلطان)