نصيحة لوجه الله ,, الكورولا تستاهل التمن ده؟؟

**abudrsh** · 19-12-2014 02:10 PM

المشاركة الأصلية كتبت بواسطة moshakes

احنا اللي عملنا قيمة مبالغ فيها للتويوتا
يا جماعة دي كورولا مش كامري ولا افالون
والناس بتزعل لما نقول ان الكورولا ركوبة اقل من حاجات كتير في نفس حدود السعر (واحيانا أقل)
كل ما تكلم حد يقولك ياباني ياباني.... كل سيارة اصبحت لها شخصية مستقلة حتى لو كوري او صيني(احيانا) وقد تتفوق على نظيرتها الياباني
ثقافة الركوب المصري جعلتها اسطورة وخرافية وهي عربية عادية مش سوبر

كلامك سليم و نفس الى بشعر بيه اننا بناحر بعض على عربيه عاديه جدا و انا شفتها بالسعوديه للاسف خامتها سيئه و الحكومة جعلت اغلب المصريين اخر احلامهم الكورلا التى هي بالخليج فى الغالب مع شباب الجامعة او سائق بيوصل مدارس و اكثر مشكلة لما تكون راكب عربية متوسطة مثل الكامري او الاكورد بالخليج و يبقى حلمك ببلدك كورلا او سيفيك

**aymanmahmoud** · 19-12-2014 02:23 PM

بصراحة الكرولا ماتستاهلش ................. بس هيا السيراتو الي تستاهل 185 ألف !!!!!!!!!!!!!!!!!!!!!!!!!!!!!!!!!!
اسعار السيارات في مصر حاجة تفلق

**1000مبروك** · 19-12-2014 02:53 PM

طالما بتتكلم على فئة الكورولا
يبقى قدامك كورولا وأوكتافيا وجيتا وفلوانس وأسترا .. وكل ما هو على شاكلتهم

محدش يقول سيراتو ولا ألنترا ولا كروز
دول ميتقارنوش بالكورولا وأخواتها
دول مرحلة تحت وإن كانت أعلى من الأكسنت واليارس بدرجة

.

**aymanmahmoud** · 19-12-2014 03:49 PM

كلام سليم طبعا
الكرولا ماتتقارنش بالسيراتو
أنا أقصد ان رغم كده سعر الكرولا كتير عليها فما بالك بالسيراتو دي الي بتوصل 185 ألف ......... كتيييييييييييييييييييير جدااااااااااا جدااااااااااااااااااااااا اااااعليها
بمعني أخر: الكرولا لوحدها كده سعرها مبالغ فيه
لكن لما تقارنها بالسيراتو كسعر وكعربية تلاقيها تعتبر أرخص وعجبي

**ahmed elkomey** · 28-12-2014 09:05 PM

المشاركة الأصلية كتبت بواسطة hossamgh1312

شكرا لذوق حضرتك
بص يا سيدي طالما بتدور ع اعتماديه و قلة اعطال يبقى ياباني مع احترام الشديد لكل الأنواع الأخرى و ع راسهم الألماني اللي نفسي تركبه بس مش دلوقتي
تاني حاجه العربيه واطيه شويه بس دا مش عيب ف العربيه بس لو اسرتك صغيرة و مش،هتحمل كتير يعني اثنين ف الكنبه اللي ورا وواحد جنبك مش هتحس بأي فرق تقريبا عن أي عربيه سيدان أنا كان معايا صني 2012 قبلها و محستش فرق كبير بالنسبة التسارع جيد جدا و مع الاسبورت مود اوعى وشك بصراحه العربيه بتنط من مكانها
معلش هختلف مع حضرتك ف موضوع البلوتوث و الحساسات ع الاقل هتحس بيهم بعدين انا كمان مش،بحب فتحة السقف
من ناحية الفخامه و الشياكه دي ازواق بس يكفي ان و أنا راكبها مش ببطل اقرأ المعوزتين مع ان ف ناس من اللي بتبص راكبين عربيات غاليه زي القشقاي مثلا
من جهة القيمه السعريه شوف الكوري بقى بكام و الإمكانيات ايه

باشا بعد ازنك كنت عاوزك تفدني اكتر ف حتة العلو بتاع العربية علشان انا حسيت من كلام الناس ان لو حضرتك لوحدك ف العربية للاالازم كل المطبات تاخدها بالعرض وبرده هاتحك يا ريت تفيدني الله يكرمك

**sherif4004** · 29-12-2014 11:43 PM

المشاركة الأصلية كتبت بواسطة borio1704

أكيد مش الاعتمادية لوحدها هي اللي بتحدد السعر.. لأن تحديد السعر عملية صعبة ومعقدة داخل فيها عوامل كتير :( تكلفة - سمعة - منافسة - توقعات المستهلك - قدرة شرائية - العميل المستهدف - .... )

عموما.. اعتمادية تويوتا وهوندا تعتبر هي الأفضل بعد لكزس ومرسيدس وكاديلاك... الكلام ده حسب تقارير j.d. Power لسنة 2013.

وبقول الأفضل لإن الثلاث ماركات الأوائل هي ماركات مترفة.. يعني ليهم اهتمام خاص وبتتباع بمبالغ كبيرة جدا.

بشكل عام .. السيارات اليابانية اعتماديتها أعلى من غيرها.. بس المؤكد إن مش كلها زي بعض.
يعني ماركات زي سوزوكي ونيسان وميتسوبيشي تعتبر اعتماديتها في المتوسط.

والمؤكد كمان إن مقارنة السيارات والحكم عليها ما هواش الاعتمادية بس..

تقدر ترجع للوصلة دي لو عايز تفاصيل أكتر عن تقييم السيارات في أمريكا.. وفي رأيي التصنيفات الموجودة وترتيب السيارات منطقي جدا

automotive ratings - studies - articles | j.d. Power

ولو لفيت شوية في الموقع بتاعهم.. هتلاقي دراسات في دول تانية غير أمريكا.. واللي لاحظته إنك لازم تلاقي اسم تويوتا من ضمن السيارات الفائزة في أي دولة.. حتى في ألمانيا!!!!!

...

يعنى حضرتك شكرت في الكورولا مع العلم انك راكب سيراتو هههههههه
انا عندي سيراتو 2014 والحمد لله جميله بس مجربتش التويوتا ال 2014 ومجبتهاش علشان انا قولت عربيه كورى وتصينع كورى افضل من سياره يابانى وتقفل تركي او ماليزى

**borio1704** · 30-12-2014 12:11 AM

المشاركة الأصلية كتبت بواسطة sherif4004

يعنى حضرتك شكرت في الكورولا مع العلم انك راكب سيراتو هههههههه
انا عندي سيراتو 2014 والحمد لله جميله بس مجربتش التويوتا ال 2014 ومجبتهاش علشان انا قولت عربيه كورى وتصينع كورى افضل من سياره يابانى وتقفل تركي او ماليزى

أيام ما اشتريت السيراتو ما كانتش الكورولا 2014 نزلت في السعودية.. مع إنها نزلت في مصر قبلها ب6 شهور.

يمكن علشان كان فيه ستوك كبير من الكورولا القديمة وكانوا عايزين يخلصوه.

على العموم.. أنا شكرت في تويوتا عموما.. واسم تويوتا معروف على مستوى العالم من ناحية الجودة. . وأنا بحكم شغلي عارف يعني إيه جودة وعارف قد إيه تويوتا رائدة في المجال ده.

مشكلة تويوتا عموما في رأيي هي في نوعية الخامات الداخلية أو ربما في تصميم بعض القطع.. اللي ممكن تديك انطباع سلبي جدا في أوقات كتير

الأسبوع اللي فات.. كان فيه معرض سيارات كبير هنا في جدة.. وكانت فرصة علشان أشوف عربيات كتير على الطبيعة وأقعد فيها من جوه.

بصراحة.. الكورولا السعودي لفت نظري فيها إن الشاشة التتش الرئيسية عاملة زي ما تكون شاشة صيني درجة تالتة..

وتخيل .. نفس الكلام حسيته في الأفالون !!!! مع إني موهوم بالعربية دي.

بشكل عام.. جالي إحساس إن وكيل تويوتا في السعودية بقى ضامن مبيعاته وبالتالي بدأ ينزل كتير من مستوى الكماليات وجودتها.. على الأقل من ناحية الخامات.

على عكس السيراتو..
مع إن الراديو عندي عادي مش تتش.. بس تحس إنه مخدوم كويس.. والنيكل منطق التابلوه بالكامل.

علشان كده.. تلاقي إن السيارات اليابانية عموما متأخرة في تصنيف j.d. Power من ناحية الخامات

ادخل على صفحة j.d. Power ودور على تصنيف بيسموهapeal

التصنيف ده بيقارنوا فيه العربيات من ناحية الفخامة والخامات والتصميم والراحة.. وشوية الحاجات اللي تخليك تحس إنك قاعد في عربية متكلفة.

هتلاقي أعلى تصنيف للسيارات الألمانية.. وإنما الياباني غالبا هتلاقيه في الآخر.

...

**Hegazio** · 04-01-2015 03:43 PM

المشاركة الأصلية كتبت بواسطة أحمد عبدالسلام

الفرق اللي انت عايز توفره و متجيبش الكورولا، هتخسره لما تبيع العربية اللي هتجيبها التانية، انما لو جبت الكورولا الفرق اللي انت كنت عايز توفره هيرجعلك لما تفكر تبيعها مقارنة بالخسارة اللي هتخسرها في العربية التانية،، انا بقالي 13 سنة بركب كورولا،، امتلكت ال2002 و ال2006 و ال2009 الخليجي و ال2012 معايا حاليا و ناوي ابيعها قريب و اجيب كورولا 2015 بدون ما افكر في مجرد التفكير اني اقارنها بعربية تانية،، تويوتا محدش يقدر يقدرها الا اللي عاشرها عمر مش واحد يجي يقولك جربتها يوم ولا اسبوع،، و بعدين اكتر حاجة مستغربها منك، منين مش فارق معاك اعادة البيع و منين فارق معاك الفرق في سعر الشراء ما حضرتك اللي هتدفعه باليمين هتاخده بالشمال لما تبيع زائد ان كورولا الفئة التانية مواصفتها لا تقارن بالعربيات اللي حضرتك ذكرتها

مش حأتكلم علي العربيات نفسها
بأكلمك عن طريقة حسابك للوفر من شراء عربية اغلي بنسبة اعادة بيع اعلي..حسبتك خطأ..مش اوفر ولا حاجة
يمكنك الرجوع ﻷول مشاركاتي في الموضوع ده
تحياتي