الموضوع: البوجيهات ...........

البوجيهات مهمتها إصدار شرارة في توقيت معين علشان البنزين يشتعل ومن ثم يحدث انفجار ينتج عنه تحريك البستم.


علشان نفهم أكتر... محتاجين نعرف إزاي دورة الاحتراق بتتم جوه الموتور

معظم مواتير العربيات اللي بنسوقها مواتيرها ماشية بما يسمى دورة الاحتراق رباعية الأشواط

يعني علشان البنزين يدخل ويتحرق والعادم يخرج لازم البستم يمشي 4 أشواط


هو يعني إيه شوط أصلا؟؟

الشوط معناه المسافة اللي بيتحركها البستم جوه السلندر .. سواء صعودا .. أو نزولا..


بص معايا على الرسمة دي:




في الشوط الأول.. صمام السحب بيفتح علشان يسمح بدخول خليط البنزين والهوا .. وحركة البستم لتحت بتبقى عاملة زي الشفاط اللي بيشفط الخليط ده جوه البستم (زي فكرة السرنجة لما بتسحب بيها الدوا من الإزازة)

في الشوط التاني.. البستم بيتحرك لفوق.. ويضغط الخليط ده لحد ما يوصل إلى حوالي 1/10 من حجمه الأصلي (وده اللي بيسموه نسبة الانضغاط).

في الشوط التالت.. وتحديدا في بدايته.. البوجيهات بتصدر شرارة.. والبنزين يشتعل ويعمل انفجار.. وقوة الانفجار دي بتخلي البستم يتحرك ويبعد تاني.
لاحظ إن في اللحظة دي الخليط مضغوط جدا.. ولما بيشتعل في الحالة دي الانفجار بيكون قوي جدا..

في الشوط الرابع.. صمام العادم بيفتح علشان يسمح بخروج ناتج الاحتراق (العادم).. والبستم بيرجع لفوق علشان يضغط الغاز ده بره السلندر.



طيب إيه اللي يخلي البستم يتحرك حتى أثناء إن مفيش اشتعال.. زي ما هو موجود في الشوط الأول والتاني والرابع؟؟؟


عمود الكرنك اللي راكب عليه السلندر في أوزان ثقيلة (بيسموها حدّافة) بتكتسب طاقة من حركة البستم وتخلي الحركة مستمرة لمدة معينة.

ده غير إن السلندرات التانية شغالة وبتساعد هي كمان.. والموضوع بيبقى متزبط مع بعضه في توقيتات محسوبة.. بيسموا الكلام ده "تزامن synchronization"

زي الصورة دي:




طبعا.. لو توقيت الشرارة اختلف.. ده معناه إن الطاقة اللي بتطلع من الموتور بتقل...

ليه؟؟

لو الشرارة متأخرة.. البستم هيكون يدأ يبعد.. وبالتالي تأثير الانفجار هيكون أقل...

تخيل إنك بتزق واحد راكب مرجيحة مثلا.. تأثير زقتك عليه لما بيوصل لنقطة السكون أكتر من تأثير نفس الزقة وهو بيتحرك بعيد عنك.


طيب لو الشرارة بدري..

دي الحالة دي أسوأ.. لإن البستم بيبقى طالع لفوق.. وقبل ما يوصل لآخر المشوار يلاقي الانفجار حصل.. كده في مقاومة كبيرة .. وممكن تسبب إن بستم يتكسر في أحد المرات.

عامل بردو زي اللي بتزقه على المرجيحة وتزقه وهو لسه مكمل حركته ناحيتك... هو سرعته هتقل.. وانت إيديك توجعك.


وده اللي بيسموه التسقيف.



آخر معلومة...

مواتير الديزل (السولار) بتشتغل من غير بوجيهات !!!




...