الموضوع: تقرير مضروب لعربية افتراضية جديدة

زملاء الاعزاء
الهدف من الموضوع ده اننا نضحك شوية مش اكتر
يعنى انا لا اقصد تقرير بعينه ولا ماركة معينة و لا شخص معين
و لكن لكثرة التقارير و الاراء المضروبة الغير محايدة و لا تتناسب مع سعر او امكانيات العربية بتاتا و للاسف المنتشرة فى المنتدى و اللى تحسسك ان العربية سوبر كار على مفيش

قررت انتقد هذه التقارير ولكن بطريقة كوميدية

تقرير عربية اوتوماتيك سيدان:

ابدأ بالشكل الخارجى: العربية ماشاء الله تصميمها خرافى و تم مراعاة الايرودينمكس فيها بطريقة فظيعة و شكلها تحفة و من اجمل العربيات اللى موجودة حاليا

صالونها واسع جدا لدرجة انى كل شوية اتزحلق من الكرسى اقع فى الدواسة من كتر الوسع (مع العلم ان طولى 190 سم)
عربية كبيرة و مريحة فعلا الصالون بحر من جوا مريح و و اسع
شنطتها ماشاء الله واسعة جدا سافرت بيها اخذت كل الشنط بتاعتى انا و عائلتى و عائلة اخويا و عائلة ابو زغلول صاحبى
الكلكس صوته رائع لما بستعمله بحس انى بعزف مقطوعة لبيتهوفن
الكاسيت صوته جميل ماشاء الله و عالى جدا و نقى و الصوت مجسم و تحس انك فى حفلة لمايكل جاكسون ايام مجده
من الداخل: التقفيل اكثر من رائع و تتميز بجودة الخامات و الشياكة

الموتور و دى نقطة مهمة: علشان ناس افترت على الموتور انه خشن و صوته عالى و كده لكن احب اقول ان الموتور ناعم جدا لدرجة انى اوقات انسى ان العربية دايرة و احاول ادورها تانى غير ان سحبه جبار بوصل من صفر ل100 كم فى 5ثوانى ماشاء الله موتور قوى بجد

غير انه موفر فى البنزين بيعمل 350 كم فى الصفيحة بجد حاجة و همية
الباور: زى مايكون فيه عفرين علشان وانا بركن بيبقى خفيف زى الحلاوة و على الطريق بيبقى زى الطوبة سبحان الله

سينسور الباركينج جميل و صوته عالى
الكاوتش صينى مالوش نوع (غالبا نوع جديد نزل السوق اسمه انت عمرى) لكن ماشاء الله تحفة فردة طرية و ناعمة و ملهاش صوت كأنك ماشى على حرير
جنوط 16 شكلها تحفة و مخلية العربية اخر شياكة
العفشة تقدر توصفها بأنها مهلبية محشية.... من كتر النعومة ماشاء الله و لا تحس بأى مطب من مطبات مصرنا الحبيبة

العربية عالية عن الارض 26سم و ده مش مقصر على الثبات نهائىىىىى

لدرجة انى جربتها و انا مسافر على طريق تانزانيا - السنبلاوين و كنت ماشى على 290 ماشاء الله ولا الهوا
العربية ماشية منتهى الثبات الانفعالى و تحس انك ماشى بالظبط زى الزبدة على القشطة ثبات خرافى ماشاء الله


الفتيس ناعم و متحسش بالنقلات خالص و تجميع فظيع و ولا فيه اى نتشات زى ما الناس بتقول


البوية جامدة جدا لدرجة انى مرة العربية اتحكت فى دبابة و نزلت لقيت المجند قاعد يعيط جنب الدبابة علشان صاج الدبابة دخل لجوة و عندى لقيت حكة خفيفة تتشال ببولش لكن سبتها علشان العين
و ده علشان ان الصاج محمل جدا ماشاء الله و ده مخلينى ابذل مجهود جدا و انا بقفل الباب بس اكيد مع الوقت هتعود عليه
التكييف بالظبط كأنك فى موسكو فى شهر يناير و ملوش تأثير على السحب خالص رغم ان العربية موتورها صغير و لكن ولا الهوا

نيجى للعيوب:

العربية شكلها تحفة و دا مخوفنى جدا من الحسد علشان اكيد بتتحسد طول ماهى ماشية

التأخير فى الاستلام علشان عليها ضغط فظيع

النور الواطى واطى جدا و مش متربى

اوقات بحس ان عزل الصوت وانا قافل الازاز مش قوى علشان اوقات بسمع صوت كلكسات العربيات اللى برا

اتمنى اكون قدرت اديكم....... اديكم فكرة عن العربية بشكل عام

و كل ده من معرض المفترس اللى فى شارع المجانين فى مدينة نصر ب50000 جنيه بس

و ياريت اللى يتكلم يقول رأيه عن تجربه مش اى كلام و خلاص و مايقلش رأيه من السمع لان طبعا اللى ربى خير من اللى اشترى (اى كلام)

اخيرا رجاء بجد من اى زميل هيعمل تقرير بعد شراء سيارة خاصتا الجديدة: ارجوك خليك محايد قول العيوب قبل المميزات علشان كلامك ممكن يفيد واحد او يلبسه فى الحيط
و مش معنى انك اشتريت عربية و دفعت فيها دم قلبك انك تطلعها بدون عيوب علشان نفسيا تبقى حاسس انك اخذت القرار الصح

و شكرا

طب معلش يا باشا ممكن موديل و ماركة العربية ربنا يجازيك خير علشان اروح اشتريها لحسن انا دايخ على عربية بالمواصفات ديه