الموضوع: يا اهل الكورولا كورولا 2015 ولا فوكاس 2015 بكل موضوعيه

مع اترامى لحيرتك الشديه وبدون اى تردد اشترى التويوتا وانت بتقول انك تويوتا مان بص هتتمتع بالعربيه الجديدة صدقنى انا زيك كان مع تويوتا 2006 و2008 خليجى و2014 العربيه الجديدة محترمه واعتماديه فعلا وعلى رأى واحد تاجر قالى ده مش عربيه العمريعنى هتبيعها فى يوم من الايام قالى بالنص كدة التويوتا فلوسها ف الشنطه بتاعتهاواخيرا هى ثقافه شعب

الشكر كل الشكر لكل الناس الجميله اللي ردت
عندي مشاركه اخيره بس طويله شويه

انا معلش حعدل شوية في الاختيارات بس ححكي بالتفصيل شويه
معلش مش بحكي قصة حياتي بس
والله انا في المنتدي ومتابعه من سنين بس مشاركاتي قليله
بس عارف ان الناس هنا بتحب الخدمة بجد
وكمان من اكتر الناس خبره عالنت كله في العربيات
فمعلش استحملونا


اولا فكره عن نفسي في العربيات
انا بما اني كنت متغرب 6 سنين في السعوديه
والتاجير هناك سهل جدا والعربيات عموما ركوبها سهل سواء في الشغل او مع اصحابك او في اي مكان
لانها مش حاجه عزيزه اوي زي مصر كده
فكان متاح ليا اركب معظم انواع العربيات اللي ماشيه عالارض بلا استثناء
حتي الهامر
وامتلكت 8 عربيات 2 كورولا 3 ياريس سيفيك 2002 وليجانزا 2002 ومرسيدس c300
فعندي فكره عن اداء معظم العربيات

بس المشكله في مصر
احنا مش بنحط عربيه راس براس قدام عربيه تانيه ومين اسرع واقوي
لان الوضع مختلف
في مصر العربيه يعني ميزانيه وراس مال وكل يوم ممكن تتخبط حتي لو واقفه وتغير حاجه وكده يعني
فبنقارن ظروف للعربيه
باكج علي بعضها اداء وتوكيل وانتشار واعادة بيع واعتمادية وحاجات كتير
ومصاريف تشغيل
انتوا عارفي طروف الحياه يعني
فبالتالي ممكن تلاقي واحد بيقارن عربيه بعربيه في فئه تانية خالص

نيجي بقي لاصل السؤال
انا دماغي عملية في العربيات جااامد
وعمري ما اشتريت عربيه من الزيرو من التوكيل
لاني مقتنع ان الزيرو بيبقي سعره اوووفر اوي
ومجرد ما تطلع من التوكيل بتقل 10 الي 20 الف في لحظتها
ومعنديش حتة ريحة الفابريكا والحاجت دي
ومقتنع ان ايه المشكله انك تشتري كسر زيرو بحاله كويسه وفبريكه وتكشف عليها كويس
ايه رايكم في الكلام ده
لان الكلام ده حيخليني اخش في فئه اعلي من العربيات لاني ممكن اشتري مستعمل

كمان انا الكماليات بالنسبالي
زجاج ومرايات كهربا والحاجت الاساسيه ومن بره جنوط وزينون بس انا ممكن اركب الزينون عادي
لكن الحساسات والبلوتوث ومثبت السرعه والكارت الزكي وكراسي كهربا والحاجت دي مش اوي

بس الاهم اداء العرييه زات نفسه
والabs ووسائل الامان فقط
الثبات والسرعه وكده
وكمان بيهمني الشكل الي حد ما
يكون شبابي بس شيك وفخم سنه
مش زي شكل الالنترا مثلا من الخارج
تحس انها فيها حاجه غلط


انا طول عمري لما كنت في الجامعه قبل ما افهم اوي في العربيات والمواتير وال dsg والحاجات دي
كان حلم حياتي اركب عربيتن
اوكتافيا ودلوقتي ال a7


ثانيا ال bmw

حتي الان هما داخلين في اختياراتي

بس صراحه انا شايف سعر الاسكودا اووفر اوي اوي عليها دي قربت من البي ام
وموضوع الفتيس بتاعها بقيت بقراه كتير
بس انا ركبتها مع صاحبي وعجبتني من الداخل جااامد
وفعلا خاماتها احسن من الكورولا واتقل في المشي
ومره شفت ال a7 الجديده كانت بيضا وفل اوبشن وزينون كانت وهميه جدا جدا
كانت شبه دي وعالحقيقه كانت وهم اكتر من الصور




بس صاحبي بيقلي ان مصاريفها كتير
وتوكيلها مبالغ فيه لما بيرحله مصنعيات والحاجات دي
وغير ان سحبها بطئ سنه بسيطه عن الكورولا اللي ركبها معايا
وقريت هنا ان ثباتها وعزلها مش علي قد تمنها بس مش مقتنع بالكلام ده الصراحه

ايه رايكو في الكلام ده
وايه رايكو في العرييه عموما



ثانيا نيجي للرائعه bmw 320 او حتي 316i










انا كان عندي مرسيدس c300
فمجرب ركوبة الفئه دي والالماني الفخم
العربيه المرسيدس بلا استثناء وبدون افوره وحش ماشي عالطريق
لدرجه اخويا بقلي العربيه لما بتجري كانها بتفرش عالارض من كتر العزل والثبات تحس انك مش ماشي اصلا
بس عيبها ضيقه شويه رغم ابعادها كبيره
وطبعا المرسدس عواجيزي شويه وبرده تقيله الي حد ما كوزن وكده وسواقه
وسعرها في مصر مبالغ فيه برضه
وبرضه مش عرييه استخدام يومي لازم واحده تانيه تخدم عليها ومش عربيات شقا عموما
فمش حتنفع معايا مرسيدس


نيجي للبي ام
المهم انا سقت البي ام
وفهمت يعني ايه حاجه اسمها متعه قياده فعلا
وفعلا اللي ما سقش البي ام مش حيدرك المعني ده بجد
العربيه وهميه وخفيفه وتقيله في نفس الوقت مش عارف ازاي الباور نااااااعم والوزن ثابت وكل حاجه
غير ان شكلها شبابي بس فخم في نفس الوقت
وتصميمها سمبل ومش معقد زي الموضه اللي ماشيه في العربيات حاليا
غير ان البي ام اكيد في ناس كتير بتفهم فيها ووورش متخصصه فيها
يعني مش لازم توكيل

فهل تنصحوني بحاجه موديل سنتين فاتو في حدود 200 الف
علما ان العربيه مش حيكون معايا غيرها وحيكون استخدام يومي حتي لو مشاوير للبقال
فهل البي ام بتاعة كده
ولا عربيه محتاج راننج كوست عاليه ومصارف وصيانه وكده
ال 316 i بالنسبالي مناسبه جدا
1600 سي سي واوبشناتها عالقد وحلوه
بس مصاريفها بقي ودنيتها في مصرنا وشوارعنا تنفع ولا ايه


طبعا الانجنيا والبيجو 508 والباسات خارج المقارنه حتي لو كسر زيرو او كده
لانها لسه متجرتش بشكل كبير
واكيد محتاجين توكيل في كل فتفوته في العربيه وبنزين 95 وقصه تانيه
وفي عربيات محترمه زي السوبارو والمازدا والهوندا
بس برده مش منتشرين للدرجه ومخاطره الي حد ما


اكيد فهمتو دلوقتي سبب الحيره
لان الواحد عايز يركب عربيه نفسه فيها وتكون عجباه ومتوازنه من ناحية الشكل والاداء
مش خرافه يعني بس متوازنه عالاقل
بس برده حابب امشي بدماغ البلد والسوق
لاني جربت يعني ايه تبقي راكب عربيه محدش فاهمها ولا عارفها ولا قطعها متوفره
وده حصل في الليجانزا لما كنت في السعوديه
كانت اول بداية ليا في عالم السيارات
ومكنش معروفه وكنت بتبهدل جاااامد عشان اجبلها اي حاجه
وكانت بتقعد بال3 اسابيع عطلانه
وكرهتني في الكوري
ولما جيت بعتها قرفتني جدا جدا جدا

وده برده سبب حبي في الياباني
عمرها ما بتعطل بالمعني الحرفي للكلمه
الاعطال اللي هيا المقرفه دي
وبتتباع وهي واقفه
لدرجه مره كنت بغير زيت والله فمركز خدمه
قام صاحب المركز قاللي تبيع
وبعتها بمكسب عن التمن اللي اشترها بيه

بس هي عربيه والسلام
مش برستيج اوي ولا تقفيل فخم ولا متعه ولا ثبات للدرجه يعني مفيش حاجه وهميه
بس هي حلوه وتؤدي الغرض ولها احترامها برده
بس ركوبة الالماني غيييييير
بس الغاوي ينقط بطاقيتو زي ما بيقولو
علما اني حاطط ميزاينه 200 الف
ممكن يزيدو بسييط
وده ميمنعش ان الكورولا من ضمن الاختيارات القويه
نظرا لكونها ماركت ليدر عموما



اخيرا يا رجاله
انا اسف لو طولت عليكم
بس انا كان نفسي اقول الكلمتين دول
وقلتهم خلاص
وزي ما بيقولو لا خاب من استشار
هل من ناصح
وشكرا