الموضوع: استفسار بخصوص الجراند تيريوس

بص ناس كتيير مبتحبش العربية دى وبيقولو ماتورها ضعيف يعنى 1500 cc على حجم كبير و عداد 180 يعنى نسبيا ماتورها ضعيف

الف شكر علي ردك يا محمد ومستني باقي الردود ان شاء الله

شوف الكيا كارينز الشكل القديم استعمال نضيف على كونتاكت كار و ركب لها كنبه اضافيه لتصبح ٧ راكب
مع العلم انى مجربتش العربيه و عمرى ما سوقتها
و انا عامل موضوع هنا علشان كنت عايز اشترى الجراند تيريوس لكن الناس قالت الكارينز احلى

المشاركة الأصلية كتبت بواسطة sweetyboy32

السلام عليكم
انا كان عندي شويه استفسارات بخصوص الجراند تريوس .. انا ناوي ان شاء الله اشتريها بس في نا س كتير خوفوني منها فا قولت اسأل المجربين هنا ممكن يفيدوني .
1- انا كنت محتاج عربيه سبعه راكب ومش مهم السحب فهل انت شايف انها تأدي الغرض معايا .
2- لو هي 7 راكب الشنطه بتاعتها تبقي كبيره ولا صغيره . انا سمعت انها لو 7 راكب ممكن تأثر علي حجم الشنطه .
3- بطبيعه شغلي بسافر كل يوم تقريبا 200 كيلو فهل العربيه دي هتنفع معايا
4- قطع غيارها غالية ولا رخيصه . ومتوفره ولا لأ ؟؟
5- التكييف بتاعها فعلا ضعيف ؟؟؟
6- اخر حاجه انت شايف ان تمنها فيها ولا قيمتها قليله علي تمنها ؟؟ يعني الاحسن اجيبها زيرو ولا استعمال
انا طولت عليكم معلش بس ياريت ماحدش يبخل عليا بالمعلومه ..
مستني ردكم .......
السلام عليكم ,, اخوكم اسلام

وعليكم السلام ورحمة الله وبركاته
العربية معايا وهرد عليك عن تجربة
1- العربية ك 7 راكب ممتازة واحسن من الكارينز الجديدة فى الوسع بس هى مش بتاعة جرى اقصى سرعة جبتها لوحدى كانت 145 وماقرصتش زيادة عشان الار بى ام كان قرب على 5
2- لو 7 راكب تقريبا مش هتلاقى شنطة (مكان صغير جدا) وهتعتمد على سقف العربية
3- تنفع ونص :) (ما شاء الله اعتمادية وعالية جدا)
4- قطع الغيار متوفرة وبالنسبة لسعر العربية فهى مناسبة وفيه بدائل طبعا (مثلا التيل الاصلى فى التوكيل بحوالى 720 جنيه والبديل الماليزى بره ب 140 وريمسا الاسبانى ب 220 وكمان المساعدين الاصلى الجوز فى التوكيل ب 2200 وkyb اليابانى بره ب 1050)
5- التكييف معقول بس مش قوى زى النيسان مثلا :)
6- تمنها مش فيها عشان كده انا جبتها مستعملة بس تجيب هايلاين :)
وربنا يسهلك الحال ان شاء الله

بجد الله يباركلك . انت افادتني كتير
الف شكر