تحذير :: مطب قاتل في التجمع الخامس !! لسه معمول جديد

**Ahmod** · 14-12-2014 05:02 PM

السلام عليكم

بحكم ان شغلي في التجمع الخامس فانا رايح جاي على هناك

النهارده لقيت فجاءة في وشي مطب جديد في شارع التسعين ,, واضح انه لسه معمول مابقالوش

المطب بعد الملف اللى عند فندق دوست !! وحاجة كدة عملاقة ماشاء الله يعني اللى يلبسه يسلملي على نفسه وعلى عربيته وربنا معاه

تطلع من الملف تلاقي المطب في وشك علطول بيزغرطلك << يعني لو قاصدين ان الناس تلبس مش هيعموله في الحتة دي

المشكلة ان الطريق ده سريع جدا !! والملف واسع ولا هو منطقة سكنية ولا اي حاجة !! وماتفهمش ايه سبب المطب ؟؟

انا واحد من الناس كنت بدخل الملف ده 150 / 160 على الاقل وطبعا مافيش اي ارشدادت تحذيرية ولا علامات ولا اي حاجة خاالص تدل على ان فيه مطب اتعمل

والحمد لله اني النهارده كنت ماشي على مهلي وطبعا ماشي الصبح فالطريق زحمة ونوعا ما فاخدت بالي من المطب قبلها بفترة

انما لو كان بليل كنت هلبس المطب ده 100% مافيش كلام !!! والمطب عالي ويقطم !! يعني الى يلبسه بسرعة هيزعل في كتير اوي

انا قلت احذركم لانها منطقة مغرية للجري والناس كلها بتبقى ماشية فيها بسرعة والمطب معمول بعد ملف يعني مش هتاخد بالك منه !!

للى مش عارف مكان فندق دوست,, لو مشيت في التسعين وخليت الداون تاون في ضهرك وماشي لقدام (الداون تاون على شمالك) هتلاقي صينية في اخر الطريق لو قطعتها وكملت علطول الطريق بيفتح وبتلاقي ملف اهو المطب في الحتة دي

ربنا يسترها علينا وعليكم

وحسبي الله ونعم الوكيل

**kazamodia** · 14-12-2014 06:51 PM

قمة الغباء من الدولة ويقولك البلد زحمة
معدش في بلد بتعمل مطبات غيرنا

**ARKOON** · 14-12-2014 06:55 PM

مطب اهالي ( معمول بطريقة غبية اوي ) كلمت الناس الى بيعملوه ردهم ان عيالهم بيلعبوا في الشارع دا والعربيات بتمشي بسرعة .. اعتراضي مش على المطب انما على غباءه مش كدا يعني !
المطبات ليها مواصفات ومش اي حد يعملها المطب دا شوية اسمنت على زلط حاجة بشعة .
ربنا يسلم طريق الجميع .

**marwanragab** · 14-12-2014 07:17 PM

الف شكر علي التحذير ياباشا جزاك الله خيرا

**د-احمد عبد اللطيف** · 14-12-2014 10:09 PM

المشاركة الأصلية كتبت بواسطة ahmod

انا واحد من الناس كنت بدخل الملف ده 150 / 160 على الاقل

وحسبي الله ونعم الوكيل

150 /160 علي الاقل ومش عايز الناس يعملوا مطب

وازاي مش منطقة سكنية يعني حضرتك كل البيوت اللي علي يمينك دي قدام فندق دوسيت مش ساكن فيها ناس
انا على فكرة من سكان المنطقة
وحسبنا الله ونعم الوكيل

**mhmd_farouq** · 14-12-2014 10:17 PM

يانهار اسود مطب على ال na كماان .. هي احنا ناقصين .. وبالنسبه للاستاذ اللي بيقول انكم سكان المنطقه هل عشان فيه عماير على طريق سريع ان يتعمل مطب عالي بلا ارشادات والناس تتقلب عادي مش مشكله .. واللي عربيته تتكسر مش مهم .. المهم سكان المنطقه .. يا سيدي اعملو مطبات بس حطوا ارشادات قبلها ولا هي الارواح بقت رخيصه .. حسبي الله ونعم الوكيل .. انا بعد مطب جوزيف تيتو وانا متوقع انهم هيعملو مطبات غبيه زيهم في الشوارع الواسعه .. حسبي الله ونعم الوكيل الحمد لله انها جت على قد كده

**hossam_elwani** · 15-12-2014 12:19 AM

استمرار لسلسة المطبات المميته .. ايه الغباء الخام ده وهو فى حكومه بتقتتل شعبها كده !!!!!!!

**misry** · 15-12-2014 12:25 AM

يعني ايه مطب اهالي ,,, هو اي حد ساكن في اي حته يعمل مطب يقتل الناس بيه ...

طيب حتى خلوا عندكم شوية مسئولية وحطوا ارشادات قبلها ...

وفين الحي من الكلام ده ...!!!

**amr_8800** · 15-12-2014 12:35 AM

هو في ايه
كل يوم مطب جديد
ده ايه القرف ده
هي الشوارع ناقصه
بعدين حتى لو هيعملو مطب
لازم يعني يبقا جبل
مينفعش يتعمل مطب محترم زي بقيت دول العالم

لازم يكسرو عربيات الخلق
حسبي الله ونعم الوكيل