تقرير تركيب باور زيت وكهربا تويوتا كارينا 1983

**sonaeg** · 19-12-2014 05:43 PM

بسم الله الرحمن الرحيم

العبد لله معاه عربية تويوتا كارينا 1983 1600 سي سي اوتوماتيك خليجي من الزيرو .... مانزلتش مصر عشان كده مغلباني معاها في قطع الغيار

العربية اسكترا عادة مش باور ومش بلاقي الاسكترا بتاعتها وبضطر اصلح القديمة واعمل حشو وتتقل زيادة

فكرت كتير اقلبها باور وسألت ناس كتير بقالي كذا سنة في الموضوع ده

هي نزل منها باور,,, فللي يقوللي هاتلها حاجة الباور وانا اركبها,,,,, طب منا لو لاقيها حسالك ليه يا أخي !!

واللي يقوللي حنعدل موتور كهربا الالنترا عالقطمة عندي ونقص ونلحم

واللي يقوللي حنخرط قاعدة طرمبة الزيت عالموتور وحوارات

لحد ما لقيت فيديوهات عالنت عن تعديل حلو.... اسكترا زيت عادي ... لكن الطرمبة اللي بتضخ الزيت كهربا مش علي سير ...وده مريح في التركيب وتغنيك عن التعديل والخرط والسير والحمل عالموتور

قعدت ادرس الموضوع لقيت ان الطرمبة اللي ينفع تركب من غير الكنترول بتاعها وتشتغل علي طول: هي طرمبة تويوتا مارك 2 1992 ..... مش موجودة ف مصر اكيد وحتتجاب من بره وماتضمنهاش تطلع بايظة

في عضو في قسم الدايو عمل الموضوع ده زمااااااان ...حاولت اوصله عشان اعرف نوع الطرمبة وعملها فين ماعرفتش اوصله

المهم,,,, بعد البحث المضني الطويل لقيت طرمبة اوبل استرا 2004 ينفع تشتغل من غير الكنترول بتاعها

وموجودة في مصر ....

جت مرحلتين: اولا تقنع حد يعمل الفكرة دي وطبعا لما بحكي الموضوع ده لاي صنايعي يبرق ويفتح بؤه جامد

ثاني حاجة: الطرمبة فيها 5 سلوك ... عاوزين نعرف كل سلك بيتوصل فين وازاي عشان يشتغل

**اولا دي بعد البحث صنايعي بالعافية اقتنع بكلامي وقاللي انا عمري ما سمعت الموضوع ده وقاللي حعمل اللي تقوللي عليه بس انا مش مسئول

ثاني حاجة : بعد البحث عالنت كتييير لقيت التوصيلات الحمد لله وحكتبها ان شاء الله في اخر الموضوع

ده شكل طرمبة الاسترا2004 : لان الاسترا اللي بعدها شكلها غير دي

طبعا قابلنا صعوبات كتييييييييييييييييييير,,, تبيت الطرمبة ازاي لانها كبيرة .... تجيب اسكترا تعدلها وتركب....الخراطيم.... الكهربا.... مش حدخل في تفاصيل كتير عشان ما اطولش اكتر من كده

الشغل اخد 3 ايام بتكاليف كالاتي:

الطرمبة 400
اسكترا هيونداي اكسل 300
صليبة كورولا 100
بيضتين شاهين طرف 100
خراطيم ولحامات وكويلات وزيت 100
مصنعية 400

ده شكل الطرمبة في حوض العربية وعذرا ان الحوض مش نضيف واللي علي الاجناب ده شمع عشان البارومة,,,الطرمبة تحت عالشمال

الباور اشتغل الحمد لله زي الفل والطرمبة صوتها مش باين جنب صوت الموتور ومالهاش حمل علي الموتور ابدا .... كان تقيل حبة في الاول وقاللي مع المشي حيخف وبالفعل بدأ يخف الحمد لله

نيجي للتوصيلات:

عدد 2 سلك طخين:

الاحمر:بموجب البطارية بفيوز 80 أمبير

البني: أرضي

عدد 3 سلك رفيع:

البني في ابيض: ده لاغي لانه في عربيتها لتشخيص اعطال الطرمبة

الاسود: 12 فولت من الموبينة بفيوز 10 أمبير

الأزرق في أبيض : لمبة تشيك الدينامو اللي ف الطابلوه ...عشان لما الدينامو يشحن تشتغل .

الموضوع نجح بفضل الله وطبعا اخوكم من طنطا ف الموضوع جديد هنا والصنايعي و بتاع قطع الغيار ماكانوش مصدقين .....

عملت الطرمبة بزرار جوه عشان اقدر افصلها عالسريع توفيرا للكهربا وعشان الدريكسيون يتقل

اسف جدا علي الاطالة و أي استفسار اخوكم في الخدمة

والسلام عليكم ورحمة الله وبركاته

**cobraa** · 19-12-2014 05:55 PM

بارك الله فيك ككفاية احساسك بس بعد ما انجزت المهمة
اين انت يا اخ صدام

**Gelgel2004** · 19-12-2014 06:14 PM

مبروك يا باشا
المخ لما بيشتغل .. بيريح
الف مبروك مره تانية و شكرا لنقلكم التجربة.

**rotanamasoud** · 19-12-2014 06:53 PM

الفكره جامده بس لازم تشتغل مع الكونتاك ولا ايه اللى بيتحكم فى تشغيلها مع تشغيل المحرك
النقطه التانيه فى التعديل كل واحد يشوف نوع عربيته ويجيب اسكاترتها بور مش حيكون فى تعديلات كتير(الا لو عربيته ملهاش اسكاتره بور حيبدء يعدل)

**sonaeg** · 19-12-2014 07:22 PM

المشاركة الأصلية كتبت بواسطة cobraa

بارك الله فيك ككفاية احساسك بس بعد ما انجزت المهمة
اين انت يا اخ صدام

الله يبارك فيك يا فندم ... قعلا احساس رائع خصوصا ان تحويلها باور كانت فكرة شبه مستحيلة

**sonaeg** · 19-12-2014 07:24 PM

المشاركة الأصلية كتبت بواسطة gelgel2004

مبروك يا باشا
المخ لما بيشتغل .. بيريح
الف مبروك مره تانية و شكرا لنقلكم التجربة.

الله يبارك فيك يا فندم الحمد لله ... فعلا لان مشكلة الصنايعية اللي هنا ان اغلبهم مش عايز يتعب نفسه في التفكير

شكرا لمرورك الكريم

**sonaeg** · 19-12-2014 07:25 PM

المشاركة الأصلية كتبت بواسطة ahmedelrayan

فكرة حلوة وكويس انك عرفت تنفذها انا والدى كان معاه تيوتا كرونا 80 وكنا بردو بندوغ على قطع الغيار وكنا معدلين فيها كتير

فعلا هي قطع غيارها مشكلة كبيرة ...الكارينا مكس قطع غيار بين الكورونا والكرسيدا والكورولا

اذا ما لقتش بضطر اعدل والله المستعان

**sonaeg** · 19-12-2014 07:28 PM

المشاركة الأصلية كتبت بواسطة rotanamasoud

الفكره جامده بس لازم تشتغل مع الكونتاك ولا ايه اللى بيتحكم فى تشغيلها مع تشغيل المحرك
النقطه التانيه فى التعديل كل واحد يشوف نوع عربيته ويجيب اسكاترتها بور مش حيكون فى تعديلات كتير(الا لو عربيته ملهاش اسكاتره بور حيبدء يعدل)

الطرمبة بتشتغل يا فندم اول ما لمبة البطارية في التابلوه تطفي .... بمعني اصح الطرمبة تتاكد الاول ان الدينامو بيشحن فتشتغل عشان مايكونش الدينامو بايظ وهي تشتغل وتفضي البطارية

كلام حضرتك صحيح بس عربيتي مش لاقيلها الاسكترا العادة اصلا ف بالتالي مش لاقي الباور عشان كده اضطريت اعدل ...والعربية الحمد لله دفع خلفي ف التعديل في الاسكترا قدام مش صعب اوي

وشكرا لمرورك الكريم : )

**sherif_taher** · 20-12-2014 02:00 PM

شغل ممتاز ما شاء الله... ربنا يبارك

-

الموضوع: تقرير تركيب باور زيت وكهربا تويوتا كارينا 1983

LinkBack

أدوات الموضوع

عرض

-

-

المواضيع المتشابهه

خبراء التكييف وكهربا العربية

تويوتا كورولا 1983 اوتوماتيك للبيع

تركيب باور استيرنج فى عربيه مافيهاش باور

تركيب باور استيرنج فى عربيه مافيهاش باور

تركيب باور

الكلمات الدلالية لهذا الموضوع

المفضلات

المفضلات

ضوابط المشاركة